Read O Debleskro Drom - I Bibla an o Romano Rakepen 2021 Esra 10 Bible Online

Esra 10 - O Debleskro Drom - I Bibla an o Romano Rakepen 2021 bible

Esra 10

¹Un har o Esra glan o Debleskro kheer ap peskre tchanga tchiddo his, un ropah o Debleha rakras un koi tseli doosh win rakras, wan bud menshe dran Israel trul leste trujel, mursha, djuwja un tchawe; un jon halauter rowan soreles.

²Un o Shechanja, koleskro dad o Jehijel his, i menshendar Elam, penas ap o Esra: “Awa, mer peram maro Deblestar tele, har lam menge romjen wawar menshendar, kai kate an kau them djiwenna. Un kanna dell gomme i drom menge, i Israelitarjen, te was mer dran kau tselo koowa win!

³Mer kras maro Debleha win, te bitchras mer kol tsele djuwjen un lengre tchawen mendar krik, jaake har penan tumer — tu, miro rai, un kolla, kai rikrenn maro Debleskre laba. Mer kamah les jaake te krell, har an o Moseskre lila tchinlo hi.

⁴Kanna ste pre! Ap tute hi kau koowa tchiddo. Un mer ham halauter tuha. Ab kanna soreles un kre kowa!”

⁵Kote stas o Esra pre, un las i sowel i pralstune rashajendar un i Levitarendar un i tsele Israelendar, te krenn le pal kau lab. Un jon dan pen sowel.

⁶Un o Esra djas peske krik o Debleskro kherestar, un djas an i kheer o Johananestar, koleskro dad o Eljashib his. Kote atchas lo i tseli rati, chas kek maro un pijas kek pani; leske his phares pral kolende, kai dran o pandepen dran o them Babilonia win wan un o Debleskro dromestar tele peran.

⁷Un an o them Juda un an o foro Jerusalem was win kharedo halauterenge, kai pandle his an o them Babilonia: “Awenn khetne an o foro Jerusalem.

⁸Un koon gar well an triin diwessa, jaake har i pralstune un i phureder penan, koleskro brawlepen un halauter hoi les hi, hunte well lestar krik lino. Un job te well infam kerdo un nai djiwell buder gar mank peskre menshende, kai wan win dran o pandepen an o them Babilonia.”

⁹Kote wan i tsele mursha i menshendar Juda un Benjamin an o foro Jerusalem khetne. Ap o triinto diwes his le lauter koi. Kowa his o 20. (biishto) diwes an o 9. (enjato) tchon. Un i tsele menshe his beshdo ap i platsa glan o Debleskro kheer un trissan i trashatar pral kau koowa, hoi jon kran, un ninna o baro brishinestar.

¹⁰Un o Esra, ko rashai, stas pre un rakras lentsa un penas: “Tumer peran o Deblestar tele, kai lan tumenge romjen kol menshendar, kai gar tumendar hi, un jaake anan tumer budeder doosh ap Israel.

¹¹Un kanna, penenn tumari doosh leske, ko baro Debleske tumare phurendar! Un krenn, hoi job kamella, un rikrenn tumen pale kol wawar menshendar, un bitchrenn tumare romjen, kai lendar hi, tumendar krik!”

¹²Un lauter penan sorjah, har jek mursh: “Jaake har tu penal, jaake krah kowa!”

¹³Un jon penan palle: “Dik, mer ham jaake bud menshe, un kanna hi brishinengro tsiro, un mer nai atchah gar halauter win tardo an o brishin. Ninna hi ko koowa gar an jek, dui diwessa kerdo, jaake bud mendar anan an kau koowa doosh pral mende.

¹⁴Muk mare pralstune menge kate atchenn. Un hakeno, kai las peske i romjat wawar menshendar an mare forja, job te well glan lende ap i wi-kerdo tsiro, un khetne leha i phureder un i tchatchepangre mursha dran leskro foro. Jaake krah mer lauter, bis te was maro Debleskri choli pral kau koowa mendar krik lino.”

¹⁵Kokres o Jonatan, koleskro dad o Asahel his, un o Jachseja, koleskro dad o Tikwa his, jon kaman kowa gar te krell. Un ap lengri rig his o Meshullam un o Levitari, o Shabbetai.

¹⁶Kolla wawar halauter, kai wan win dran o pandepen an o them Babilonia, rikran pen ap kowa, hoi le penan. Un o rashai Esra kharas dran haki bari familja lengro pralstunes peskro labeha. Un tchiwas kol pralstunen ap i rig, te dell lo kau koowa an lengre wasta. Un kolla beshan pen khetne ap o ersto diwes an o deshto tchon, te dikenn le, hoi kerdo hunte wals pash hako mursheste,

¹⁷kai las peske i romjat wawar menshendar. Un i pralstune kran pengri budi an triin tchonna. Ap o ersto diwes an o ersto tchon ko newo bershestar his halauter kerdo.

¹⁸Kalla hi i mursha, kai lan penge romjen kol menshendar, kai kek Israelitarja his: an i familja o murshestar Jeshua, koleskro dad o Jozadak his, un pash leske phralende: o Maaseja, o Elijeser, o Jarib un o Gedalja.

¹⁹Un jon dan pengro wast pre, kai bitchrenn le pengre romjen pendar krik, un kai kamenn le o Debleske i mursheskro bakro te dell, te well lengri doosh krik lino.

²⁰Un an i familja Immer: o Hanani un o Sebadja;

²¹Un an i familja Harim: o Maaseja, o Elija, o Shemaja, o Jehijel un o Usija;

²²Un an i familja Pashur: o Eljoenai, o Maaseja, o Jishmael, o Netanel, o Josabad un o Elasa;

²³o Josabad, o Shimi un o Kelaja — ko hi o Kelita, o Petachja, o Juda un o Elijeser;

²⁴o Eljashib; o Shallum, o Telem un o Uri.

²⁵an i familja Parosh: o Ramja, o Jisija, o Malkija, o Mijamin, o Eleasar, o Malkija un o Benaja;

²⁶an i familja Elam: o Mattanja, o Secharja, o Jehijel, o Abdi, o Jeremot un o Elija;

²⁷an i familja Sattu: o Eljoenai, o Eljashib, o Mattanja, o Jeremot, o Sabad un o Asisa;

²⁸an i familja Bebai: o Johanan, o Hananja, o Sabbai un o Atlai;

²⁹an i familja Bani: o Meshullam, o Malluch, o Adaja, o Jashub, o Sheal un o Jeremot;

³⁰an i familja Pahat-Moab: o Adna, o Kelal, o Benaja, o Maaseja, o Mattanja, o Bezalel, o Binnui un o Manasse;

³¹an i familja Harim: o Elijeser, o Jishija, o Malkija, o Shemaja, o Simeon,

³²o Benjamin, o Malluch un o Shemarja;

³³an i familja Hashum: o Mattenai, o Mattatta, o Sabad, o Elifelet, o Jeremai, o Manasse un o Shimi;

³⁴an i familja Bani: o Maadai, o Amram, o Uel,

³⁵o Benaja, o Bedja, o Keluhi,

³⁶o Wanja, o Meremot, o Eljashib,

³⁷o Mattanja, o Mattenai, o Jaasai;

³⁸an i familja Binnui: o Shimi,

³⁹o Shelemja, o Natan, o Adaja,

⁴⁰o Machnadbai, o Shashai, o Sharai,

⁴¹o Asarel, o Shelemja, o Shemarja,

⁴²o Shallum, o Amarja un o Josef;

⁴³an i familja Nebo: o Jehijel, o Mattitja, o Sabad, o Sebina, o Jaddai, o Joel un o Benaja.

⁴⁴Kolla halauter lan penge romjen wawar menshendar, kai kek Israelitarja his; un kanna bitchran le kol djuwjen un lengre tchawen pendar krik[12].