Read O Debleskro Drom - I Bibla an o Romano Rakepen 2021 Esra 4 Bible Online

Esra 4 - O Debleskro Drom - I Bibla an o Romano Rakepen 2021 bible

Esra 4

¹I wawar menshe an o them, kolla, kai kaman gar i bibolden dran i khera Juda un Benjamin, jon shunan, te krenn kolla, kai wan pale pale dran o them Babilonia, i newo kheer o baro Debleske, kai o Israeleskro Dewel hi.

²Koi djan le pash o Serubbabel un pash i familjengre pralstunende un penan: “Mer kamah tumentsa o Debleske i kheer te krell. Mer mangah ninna tumaro Debles an, un maram leske viechen, jaake rah har o baro rai pral o them Assur, o Asarhaddon, men halauter kate an kau them mukas te anell.”

³Kote penan lenge o Serubbabel un o Jeshua un i familjengre pralstune: “Kowa hi gar mishto, te krenn tumer un mer khetne o Debleskro kheer. Mer kokres kamah o kheer te krell o baro Debleske, kai o Israeleskro Dewel hi. Kowa penas menge jaake o baro rai pral o them Persia, o Kirus.”

⁴Kote kran kol wawar menshe, kai djiwan ninna an o them, i biboldenge o djipen phares. Un jon kaman len daar te krell, te budrenn le buder gar dureder ap o Debleskro kheer.

⁵Un jon dan kolende lowe, kai budran o baro rajeske, te rikrenn jon kowa pre, hoi i bibolde penge glan lan. Kowa kran le jaake rah, har o Kirus o baro rai pral o them Persia his, un gomme an ko tsiro, kai o Darius o baro rai pral o them Persia his.

⁶Un har o Ahasveros baro rai was, an leskro ersto bersh, tchinan le i fullo liil pral i menshende dran o them Juda un Jerusalem.

⁷Un an ko tsiro, har o Artaxerxes o baro rai his, tchinan o Bishlam, o Mitredat, o Tabeel un lengre mala i tchilatcho liil o rajeske pral o them Persia. Ko liil his tchinlo an o aramtikro tchinepen un an o aramtikro rakepen.

⁸Ninna o pralstuno Rehum un o Shimshai, kai haiwas lila te tchinell, kolla dui tchinan i fullo liil pral Jerusalem, un bitchran les pash o baro rajeste Artaxerxes. An ko liil his tardo:

⁹Mer, o pralstuno Rehum un o tchinepaskro, o Shimshai, un kolla wawar halauter, i tchatchepangre mursha, i bare lurde, i tchinepangre, un i wawar pralstune, un i mursha dran Erech, dran Babilon, un dran Susa, kolla hi i Elamarja,

¹⁰mer tchinah kau liil khetne i menshentsa dran kol wawar themma, kolen o baro un sorelo Asenappar[3] an kau them mukas te anell, te djiwenn le an o foro Samaria un an i wawar forja ap i wawar rig o panjestar Eufrat.

¹¹Un kal laba his tardo an ko liil: Ap o baro rajeste Artaxerxes, i murshendar ap i wawar rig o panjestar Eufrat. Mer ham tire budepangre,

¹²un kamah tuke te penell, kai i bibolde, kolla kai dran tiro them kai pral pash mende wan, kolla hi kanna an o foro Jerusalem un kamenn ko foro pale pre te tchiwell, ko foro, kolestar i menshe jaake diwjo un tchilatcho hi. Jon tchiwenn bar ap bar, te wenn i massurja ko forestar kerdo. I telstune barra hi pale newes tchiddo.

¹³Mer halauter hunte penas o baro rajeske: Kau foro te well newes kerdo, un i massurja hi pale tardo, denn i menshe buder kek themeskre lowe, witar kek foreskre lowe, un wawar koowa witar gar. Kek lowe wenn kolendar pash maro rajeste.

¹⁴Mer halauter rikrah pash o baro rajeste un chah o loon dran leskro kheer, un mer kamah gar te dikell, har well ladj ap o baro rajeste anlo. Doleske bitchrah leske kau liil.

¹⁵Muk pal te dikell an i familjakre lila tire phurendar, palle hatseh un dikeh, kai kau foro pes pre hadas, un pral wawar rajende un themma doosh anas. Ninna an i phure tsirja hadan pen i menshe an kau foro pre. Doleske was kau foro ninna khetne maredo, un kek bar atchas ap o wawar.

¹⁶Un kanna penah mer o baro rajeske, kai job buder tchi an peskro wast nai rikrella, hoi ap i wawar rig o panjestar Eufrat tchiddo hi, te well kau foro pale newes kerdo, un i massurja pale pre-tchiddo wenn.

¹⁷Koi bitchras lenge o rai pral o them Babilonia kau liil un mukas lenge te penell: Tuke Rehum, ko pralstuneske un tuke Shimshai, ko tchinepaskro, un tumenge wawarenge halauterenge an o foro Samaria un kol wawarenge halauterenge ap i wawar rig o panjestar Eufrat: Bacht tumentsa!

¹⁸Un kanna kamau tumenge te penell: Ko liil, kai tumer mange tchinan, was mange lab pal lab glan drawedo.

¹⁹Un har me les penom, was pal diklo, un halauter hi tchatchepen, hoi tumer mange tchinan, kai hadas pes ko foro pale te pale an o phuro tsiro un anas tchingepen i tsele rajenge, un peras tele lengre rajentsa.

²⁰Ninna his sorele bare raja an o foro Jerusalem, kai his i raja pral halauter, hoi ap i wawar rig o panjestar Eufrat djiwella, jaake kai was lenge hunte themeskre lowe dino, ninna foreskre lowe un wawar koowa.

²¹Doleske kamau, te penenn tumer kol menshenge soreles, te nai budrenn le gar dureder, te nai well ko foro gar pale pre-tchiddo, jaake rah bis te me penau i wawar lab!

²²Denn jak, te krenn kowa sik, te well kek doosh pral maro them, un te nashrap kek lowe.

²³Un ko liil o baro rajestar Artaxerxes was drawedo glan o Rehum un ko tchinepaskro, o Shimshai, un glan kol tsele wawar murshende, kai pash lende his. Koi djan le sik an o foro Jerusalem pash i bibolde, un rikran len sorjah pengri budjatar pale, jaake te nai budran le buder gar dureder.

²⁴Kote atchas i budi ap o Debleskro kheer an o foro Jerusalem tardo. Un kowa atchas jaake bis o rai Darius an o duito bersh o baro rai his pral o them Persia[4].