Read O Debleskro Drom - I Bibla an o Romano Rakepen 2021 Esra 5 Bible Online

Esra 5 - O Debleskro Drom - I Bibla an o Romano Rakepen 2021 bible

Esra 5

¹Un o Debleskre rakepangre, o Haggai un o Sacharja, koleskro dad o Iddo his, kolla rakran i biboldentsa, kai djiwan an o them Juda un an o foro Jerusalem, un penan lenge, hoi lengro Dewel, ko Dewel pral o Israel, lenge kal biboldenge penas.

²Kote kran pen ap i budi o Serubbabel, koleskro dad o Shealtijel his, un o Jeshua, koleskro dad o Jozadak his. Un jon budran dureder ap o Debleskro kheer an Jerusalem. Un lentsa khetne budran o Debleskre rakepangre un dan len soor.

³An ko tsiro wan mursha pash lende: o Tattenai, ko his o pralstuno pral o them ap i wawar rig o panjestar Eufrat, un o Shetar-Bosnai un lengre mala un penan: “Koon penas tumenge, te tchiwenn kau kheer pale pre un te krenn kal massurja pale newo?”

⁴Un palle putchan le lendar: “Har kharenn kol mursha, kai tchiwenn kau kheer pale pre?”

⁵Un o Debleskre jaka his pral i phureder an o them Juda, un jon nai budran dureder, bis i liil pash o Darius bitchedo was un i liil lestar pale pale was.

⁶Kawa hi ko tele tchinlo liil, hoi was bitchedo ap o rajeste Darius. Kau liil mukas o Tattenai te tchinell khetne o mursheha Shetar-Bosnai un lengre malentsa, kol tchatchepangre an o them, kai ap i wawar rig o panjestar Eufrat his.

⁷Kalla hi i laba, hoi jon leske tchinan: O baro rajeske Darius bud bacht!

⁸Mer kamah tuke te penell, kai mer nasham an o them Juda, pash o kheer o baro Deblestar. Ko kheer well bare barrentsa kerdo. Un kasht well an i massurja dren tchiddo. Un i budi well mishto kerdo, un djal an lengro wast sik dureder.

⁹Kote putcham mer palle lengre pralstunendar: ‘Koon penas tumenge, te krenn kau kheer un te tchiwenn kal massurja pale pre?’

¹⁰Un ninna putcham mer lendar pal lengre laba, jaake te nai tchinas mer len pre un nai penas tuke, koon i pralstune pral kai budi hi.

¹¹Un kowa hi, hoi jon menge penan: “Mer ham i budepangre o Deblestar, kai kras o bolepen un i phub, un tchiwah kau kheer pale pre, kai glan bud bersha kate tardo his, un koles i baro sorelo rai dran o them Israel mukas pre te tchiwell. Jaake his ko kheer shukar koi tardo.

¹²Mare phure choiran o bolepaskro Debles; un palle das lo len an o wast o baro rajestar dran o them Babilonia. Kowa his o Nebukadnezar, ko Kaldeari. Job mukas kau kheer khetne te phagell, un anas i menshen, kai kate djiwan, an o them Babilonia.

¹³An o ersto bersh, kai o Kirus o baro rai pral o them Babilonia was, mukas lo te penell, te well kau Debleskro kheer pale pre-tchiddo.

¹⁴Ninna kol sonakangre un rupene kotja, hoi tchoras o Nebukadnezar dran o Debleskro kheer an Jerusalem, un mukas len an peskro debleskro kheer te anell an o them Babilonia, kolen las o baro rai Kirus pale win, un das halauter ko mursheste Sheshbazar. Koles tchiwas lo pral o them Juda,

¹⁵un penas ap leste: ‘Le kal tsele kotja tuha, un dja an o foro Jerusalem, un an len kote an o Debleskro kheer! Un o Debleskro kheer hunte well pre-tchiddo kote, kai lo tardo his.’

¹⁶Kote was o Sheshbazar un tchiwas i telstune barra pre o Debleskro khereske kate an Jerusalem. Jaake rah budrah ap o Debleskro kheer, un kowa hi gomme gar tseles kerdo.”

¹⁷Un kanna, maro baro rai, te hi tuke mishto, palle muk an tiro kheer pal te dikell, kote kai tiro brawlepen un i phure familjakre lila hi, te hi tchatcho, kai mukas o baro rai Kirus te penell, te well o Debleskro kheer an o foro Jerusalem pale pre-tchiddo. Un ab jaake kamles un muk men te djinell, hoi tu pral kowa peneh.