Read O Debleskro Drom - I Bibla an o Romano Rakepen 2021 Esra 6 Bible Online

Esra 6 - O Debleskro Drom - I Bibla an o Romano Rakepen 2021 bible

Esra 6

¹Kote mukas o rai Darius te penell, te wenn i familjakre lila rodedo an i khera, kai o brawlepen un i phure lila tchiddo hi an o them Babilonia.

²Koi was i liil hatslo an o foro Ekbatana[5] an o them Media. Ap ko liil his tchinlo: Laba, hoi hunte wenn gar bistedo:

³An o ersto bersh, kai o Kirus baro rai was, mukas lo te penell: O Debleskro kheer an o foro Jerusalem hunte well pale pre-tchiddo, jaake te well lo i platsa, kai wenn vieche anlo un pre chatchedo o Debleske. Un i massurja hunte wenn newes kerdo. O kheer hunte well trijanda metarja bares, un trijanda metarja buchles,

⁴un well dran djudje dine barra jaake kerdo, te wenn triin barra jek ap o wawar tchiddo, un koi pral kasht, un palle pale triin barra jek ap o wawar, un koi pral kasht, un jaake dureder. Un i lowe koleske lautereske nai well dran o baro rajeskro kheer lino.

⁵Ninna hunte wenn pale pale dino kol tsele sonakangre un rupene kotja, hoi an o Debleskro kheer an Jerusalem tardo his, kolla kai mukas o Nebukadnezar krik te anell an o them Babilonia. Halauter hunte well pale anlo an o Debleskro kheer an Jerusalem, un kote pre-tchiddo, kai lo tardo his an o Debleskro kheer.

⁶Ap o Tattenai, ko pralstuneste pral o them ap i wawar rig o panjestar Eufrat, un ap o Shetar-Bosnai, un tumare tsele malenge, kol tchatchepangre mursha, penau me: Rikrenn tumen pale kau kowestar!

⁷Mukenn o pralstunes i biboldendar un lengre phureden pengri budi te krell ap o Debleskro kheer, te nai tchiwenn le les kote pale pre, kai lo tardo his.

⁸Me mukau tumenge ninna te penell, hoi tumer lengre pralstunen hunte denn, te nai well o Debleskro kheer pale pre-tchiddo. Lenn dran o rajeskro brawlepen kol lowendar, hoi dren well pash tumende ap i wawar rig o panjestar Eufrat, un denn len jaake bud, hoi len hunte well, te hi len hako tsiro doha halauterestar.

⁹Denn len ninna hako diwes kol viechen, hoi len hunte well, te anenn le len o bolepaskro Debleske: terne gurma[6], bakre un terne bakre. Ninna djob, loon, mool un djet denn len jaake bud har penenn tumenge lengre rashaja an o foro Jerusalem. Denn jak, te well kowa lende jaake sik dino, te hunte mangenn le gar.

¹⁰Palle nai chatchrenn le kol viechen jaake o bolepaskro Debleske, te dikell lo latches ap lende, un jon nai mangenn lestar latchepen mange, miro djipen un koleske mire tchawendar.

¹¹Un pale mukau tumenge te penell: Te rikrell pes jek tumendar gar ap mire laba, hunte well i baro kasht dran leskro kheer win tserdedo, un job hunte well koi pre dino. Un leskro tselo kheer hunte well tele phagedo, doleske kai job gar mire laba dren rikras.

¹²Un ko Dewel, kai o Jerusalem win rodas, te well lo kote an-mangedo, job mu te phagell hako baro rajes un hako them, kai rikrell pes gar ap kau lab, hoi penom, un hadell peskro wast, te phagell lo ko Debleskro kheer tele an Jerusalem. Me, o Darius, penom kau lab un mukom les pre te tchinell, te rikrell pes hakeno ap leste!

¹³Kote kras o Tattenai, ko pralstuno pral o them ap i wawar rig o panjestar Eufrat, un o Shetar-Bosnai un kol mursha, kai pash lende his, pal hako lab, hoi lenge o rai Darius penas.

¹⁴Un o phureder i biboldendar kran pengri budi ap o Debleskro kheer dureder. Un i budi djas mishto, jaake har penan kowa o Debleskre rakepangre, o Haggai un o Sacharja, koleskro dad o Iddo his. Un jon tchiwan o kheer pre, un kran halauter jaake har les lenge o Israeleskro Dewel penas un pal i laba, kai penan i raja pral o them Persia, o Kirus, o Darius un o Artaxerxes.

¹⁵Un koi tseli budi was kerdo ap o triinto[7] diwes an o tchon Adar. Kowa his, har o Darius an o shobto bersh o baro rai his.

¹⁶Un i Israelitarja, i rashaja, i Levitarja un kolla wawar, kai wan dran o pandepen pale pale, rikran kol bare diwessa i bachtele djijentsa, kai dan le o Debleskro newo kheer an leskre wasta.

¹⁷Koleske anan le an o Debleskro kheer 100 (sheel) gurma, 200 (dui-sheel) bakre, un star-sheel (400) terne bakre, te wenn le maredo o Debleske, ninna deesh-te-dui mursh busja, jek haki bari familjake, hoi well o deesh-te-dui Israeleskre tchawendar. Kol busja wan chatchedo o Debleske, te well i doosh i Israelendar krik lino.

¹⁸Un jon tchiwan i rashajen un i Levitarjen an pengri budi dren an o Debleskro kheer an Jerusalem, un kran win, hawe rashaja hunte khetne budrenn, un hawe Levitarja hunte khetne budrenn. Lauter kran le jaake har tele tchinlo was an o Moseskre lila.

¹⁹Un kolla, kai wan dran o pandepen pale an o them Israel, rikran o Passa ap o 14. (deesh-te-starto) diwes an o ersto tchon.

²⁰Koleske thowan pen i Levitarja jaake har glan tchinlo his, te wenn le djudjo glan o Debleste. Un hake mursha lendar his djudjo un maran i terne bakre, hoi wenn Passa kharedo, lauterenge, kai wan dran o pandepen pale, ninna lengre phralenge un i rashajenge un penge kokres.

²¹Un i Israelitarja, kai wan dran o pandepen pale, chan o Passa, un lentsa khetne ninna i tsele wawar menshe an kau them, kai mukan pengre menshen, kai wawar deblen an-mangenn. Un jon rikran pen kanna pash i Israelitarjen, te mangenn le kolengro Debles an. Kowa hi o baro Dewel.

²²Un jon lauter rikran kol bare diwessa, kai chan le efta diwessa maro, kai kek shutlo jarro dren hi. Halauterenge his i gipaskro tsiro. O baro Dewel das len bachtele djia un kras, te dikas o rai pral o them Assur kamles ap lende. Jaake wan lengre wasta soreles, te nai kran le o kheer o Israeleskro Debleske.