Read O Debleskro Drom - I Bibla an o Romano Rakepen 2021 Esra 7 Bible Online

Esra 7 - O Debleskro Drom - I Bibla an o Romano Rakepen 2021 bible

Esra 7

¹Pal kau koowa, an ko tsiro, kai o Artaxerxes o baro rai pral o them Persia his, djiwas an o them Babilonia i biboldo, koleskro lab Esra his. Leskro dad his o Seraja, koleskro dad o Asarja, koleskro dad o Hilkija,

²koleskro dad o Shallum, koleskro dad o Zadok, koleskro dad o Ahitub,

³koleskro dad o Amarja, koleskro dad o Asarja, koleskro dad o Merajot,

⁴koleskro dad o Serachja, koleskro dad o Usi, koleskro dad o Bukki,

⁵koleskro dad o Abishua, koleskro dad o Pinhas, koleskro dad o Eleasar, koleskro dad o Aron, ko baro rashai.

⁶Kau mursh Esra djas win dran o them Babilonia, te djal lo an o foro Jerusalem. Job his i sikepaskro, un djinas kol laba mishto, hoi an o Moseskre lila tchinlo hi. Kol laba das o baro Dewel peskre menshende Israel. Un har o Esra gomme an Babilonia his, rikras o baro Dewel peskre wasta pral leste, un kras, te das o baro rai o Esraes halauter, hoi job lestar mangas.

⁷Un khetne leha djan wawar Israelitarja pral an Jerusalem, rashaja, Levitarja, gipangre, mursha kai denn jak ap i wudja, un budepangre, kai budran an o Debleskro kheer. Kolla halauter wan an Jerusalem an o eftato bersh, kai o Artaxerxes o rai pral o them Persia his.

⁸An o pantchto tchon an kau bersh wan le kote an.

⁹Ap o ersto diwes an o ersto tchon kran le pen ap o drom, un ap o ersto diwes an o pantchto tchon wan le an o foro Jerusalem. O Debleskro kamlo wast his pral leste.

¹⁰O Esra tchiwas peskre djijeskre jaka ap o Debleskro drom, te haiwell lo les bud un budeder, un te djiwell lo pal o Debleskro lab, un te sikrell lo halauterenge an o them Israel, hoi o baro Dewel lendar kamell, un har nai djiwenn le pal leskro tchatchepen.

¹¹Un o rai Artaxerxes mukas i liil te tchinell, te dell lo les o rashajeste, o Esra. Kowa his i sikepaskro un prindjras mishto o Debleskre laba un djinas, hoi o baro Dewel peskre menshendar, o Israel, kamell. An ko liil his kal laba tardo:

¹²Me, o Artaxerxes, o rai pral i tsele raja, penau ap o Esra, ko rashai un sikepaskro i labendar ko Deblestar, kai an o bolepen hi. Bud bacht tuke!

¹³Un kanna well mandar penlo, kai halauter kolla, kai dran o them Israel an miro them wan, ninna lengre rashaja un Levitarja, jon te kamenn tuha te djal an o foro Jerusalem, palle nai djan le.

¹⁴O baro rai un leskre efta gosewe mursha bitchrenn tut, te djas an o them Juda un an o foro Jerusalem, te dikess, har rikrenn pen i menshe kote ap tiro Debleskro lab, hoi an tiro wast hi.

¹⁵Tu aneh lenge rup un sonakai, hoi tut o baro rai un peskre gosewe mursha tuha denna, te dess kowa o Debleste pral o them Israel, koleskro kheer an Jerusalem hi.

¹⁶Le ninna ko tselo rup un sonakai, hoi nai leh khetne an o tselo them Babilonia, un koi pashel hoi kol menshe un i rashaja pendar kokres kamenn te dell o khereske lengro Deblestar an Jerusalem.

¹⁷Halauter kowa le un gin goswepah kol lowentsa gurma[8], bakre, terne bakre; koi pashel djob un mool o Debleske; te nai well kowa lauter chatchedo ap i chatchepaskri an o kheer tumaro Deblestar an Jerusalem.

¹⁸Te atchenn lowe pral, krenn kolentsa, hoi tuke un tire phralentsa mishto hi, jaake har tumaro Dewel kowa kamella.

¹⁹Un kol pirja un tchare un wawar koowa, hoi tuke dino wan i budjake an o kheer tiro Deblestar, an leske an o foro Jerusalem!

²⁰Ninna hoi tut budeder hunte well tiro Debleskro khereske, un hoi hunte plaissress, kowa well tut halauter dino dran i khera, kai o rajeskro brawlepen tchiddo hi.

²¹Me, o rai Artaxerxes, penom ap halauterende, kai an o them wergel o panjestar Jordan ap i khera garda denn, kai miro brawlepen dren hi: Halauter, hoi mangell tumendar o Esra, ko rashai un sikepaskro kol labendar o bolepaskro Deblestar, kowa denn les sik;

²²rup bis 3.500 (triin-te-paash serja) kilogramme, un 100 (sheel) gone[9] bijalo gib, un 100 (sheel) pirja mool[10], un 100 (sheel) pirja djet, un loon jaake bud har kamenn le.

²³Halauter, hoi o bolepaskro Dewel penas, te well an leskro kheer, kowa hunte well leste jaake dino, har lo penas, te well leskri choli gar pral o rajeste, leskre tchawende un leskro them.

²⁴Ninna penau tumenge: Kekeste tumendar dau me o tchatchepen, te nai mangell lo themeskre lowe, foreskre lowe un wawar koowa kol rashajendar un kol wawarendar, kai budrenn an o kheer kau Deblestar, har Levitarja, gipangre, mursha, kai jak denn ap i wudja un budepangre.

²⁵Un tu Esra, tchip o goswepah, hoi tiro Dewel tut dell, tchatchepangren un rakepangren an i budi dren, te rakrenn le o tchatchepen win i tsele menshenge, kai wergel o panjestar Eufrat djiwenna, halauterenge, kai i laba tiro Deblestar prindjrenn. Un koon kal laba gar prindjrell, koleske sikrenn, hoi tumaro Dewel lestar kamell!

²⁶Hakeno, kai dell gar jak ap o lab tiro Deblestar un rikrell pes gar ap o lab o rajestar, kowa lell peskri phagi: nai well, te well lo maredo, pale-tchiddo, hunte plaissrell lowe, oder well an o stilepen.

²⁷Sharedo well o baro Dewel, ko Dewel mare phurendar! Job hi kowa, kai tchiwas sau koowa an o rajeskro dji, te nai well o baro Debleskro kheer an o foro Jerusalem jaake railo un shukar!

²⁸O Dewel kras, te dikas o rai un leskre gosewe un pralstune mursha latches ap mande. Un o baro Debleskro wast his pral mande un kras man soreles, un nai anom bud murshen khetne, kai his pralstune pral pengre familje, te djan le lauter mantsa pre an maro them.