Read O Debleskro Drom - I Bibla an o Romano Rakepen 2021 Esra 8 Bible Online

Esra 8 - O Debleskro Drom - I Bibla an o Romano Rakepen 2021 bible

Esra 8

¹Kalla hi i pralstune pengre familjendar kol murshentsa, kai wan mantsa khetne dran o them Babilonia pre an o foro Jerusalem an ko tsiro har o Artaxerxes o baro rai his.

²dran i familja Pinhas: o Gershom; dran i familja Itamar: o Daniel; dran i familja David: o Hattush, koleskro dad o Shechanja his;

³dran i familja Parosh: o Secharja, un khetne leha his 150 mursha, kai an i liil tchinlo wan;

⁴dran i familja Pahat-Moab: o Eljoenai, koleskro dad o Serachja his, un khetne leha 200 mursha;

⁵dran i familja Sattu: o Shechanja, koleskro dad o Jahasijel his, un leha 300 mursha;

⁶dran i familja Adin: o Ebed, koleskro dad o Jonatan his, un khetne leha 50 mursha;

⁷dran i familja Elam: o Jeshaja, koleskro dad o Atalja his, un khetne leha 70 mursha;

⁸dran i familja Shefatja: o Sebadja, koleskro dad o Michael his, un khetne leha 80 mursha;

⁹dran i familja Joab: o Obadja, koleskro dad o Jehijel his, un khetne leha 218 mursha;

¹⁰dran i familja Bani: o Shelomit, koleskro dad o Josifja his, un khetne leha 160 mursha;

¹¹dran i familja Bebai: o Secharja, koleskro dad o Bebai his, un khetne leha 28 mursha;

¹²dran i familja Asgad: o Johanan, koleskro dad o Katan his, un khetne leha 110 mursha;

¹³dran i familja Adonikam ninna i palstune, kai wan pale. Un jon kharan: Elifelet, Jehijel un o Shemaja, un khetne lentsa 60 mursha;

¹⁴dran i familja Bigwai: o Utai, koleskro dad o Sabbud his, un khetne leha 70 mursha.

¹⁵Un me anom len khetne pash ko lengsto pani, hoi an o foro Ahawa nashella. Un mer atcham kote triin diwessa. Un har lom kote i menshen an o jak, dikom rashajen mank lende. Me dikom kek Levitarjen.

¹⁶Kote mukom i gosewe pralstune pengre familjendar pash mande te well: o Elijeser, o Arijel, o Shemaja, o Elnatan, o Jarib, o wawar Elnatan, o Natan, o Secharja un o Meshullam, un kol dui sikepangre, o Jojarib un o Elnatan,

¹⁷un bitchrom len pash o Iddo, ko moskro an o foro Kasifja, kai i Levitarja djiwenn, te bitchrenn le menge budepangre o khereske maro Deblestar. Un me penom lenge, hoi te rakrenn le o Iddeha un leskre phralentsa, kai pash leste his an o foro Kasifja.

¹⁸Un maro Debleskro kamlo wast his pral mende. Un jon anan menge i gosewo mursh dran i familja Machli, i Levitari. O Levi his i tchawo o Jakobestar. Kau mursh kharas Sherebja. Un pash leste his leskre tchawe un phrala. Khetne his le 18 (deesh-te-ochta) mursha.

¹⁹Koi pashel wan o Hashabja un o Jeshaja dran i familja Merari, un leskre phrala un lengre mursh tchawe, khetne 20 (biish) mursha.

²⁰Palle wan gomme 220 (dui-sheel-te-biish) budepangre, te budrenn le an o Debleskro kheer. Lengre laba hi lauter pre-tchinlo. Jon wan kol menshendar, kai o David un i pralstune win rodan, te budrenn le i Levitarenge an o wast.

²¹Un me mukom kote pash o pani Ahawa i tsiro win te kharell, kai chas mer tchi, un djas ap i tchanga glan maro Debleste, te djal lauter mishto ap maro drom, te djah an maro them, un te wenn kek tchilatche menshe pral mende un mare tchawende un halauter hoi men hi.

²²Kamom gar o rajestar klissepangre te mangell, kai denn jak ap mende un kurenn pen menge, te wenn tchilatche menshe pral mende. Ladjom man te mangap kowa lestar. Glan i tikno tsiro penam leske: O wast maro Deblestar hi kamlepah pral kolende, kai les rodenn, un leskri soreli choli well pral kolende, kai kamenn lestar tchi te djinell.

²³Doleske cham tchi un mangam halauter maro Deblestar, un job shunas ap maro mangepen.

²⁴Un me rodom mange 12 (deesh-te-dui) dran i pralstune rashajende win, koi pashel o Sherebja un o Hashabja un deesh wawar Levitarja.

²⁵Kolen dom ko tselo rup un ko tselo sonakai un kol tsele kutch kotja an o wast, hoi wan dino o Debleskre khereske, kowa lauter, hoi das o baro rai un leskre tchatchepangre un kol pralstune un i tsele Israelitarja, kitse kai le his, an o them Persia.

²⁶Me dom ko tselo koowa an lengre wasta: 20.000 (biish serja) kilogramme rup, un rupene koola, hoi khetne 3.000 (triin serja)[11] kilogramme pharo his, un 3.000 (triin serja) kilogramme sonakai,

²⁷20 (biish) sonakangre tchare, kolla his enja kilogramme pharo un jaake bud moldo har 1.000 (jek sero) sonakangre lowe, un dui khore dran lolo saster, hoi win dikan har sonakai un jaake bud moldo his har sonakai.

²⁸Un me penom ap lende: “Tumer han o Debleske wi-rodedo, un kol tsele kotja hi o Debleske ap i rig tchiddo: Un ko rup un ko sonakai was o Debleske dino dran o menshengro kamlepen. Jon dan kowa pendar o baro Debleske, koles ninna pengre phure an-mangan.

²⁹Denn mishto jak koi pre, bis te wan an Jerusalem an o baro Debleskro kheer. Kote tchiwenn tumer kowa lauter ap i waga, un denn les an i wasta i pralstune rashajendar un i Levitarendar un i pralstunendar i familjendar an Israel.”

³⁰Kote lan i rashaja un i Levitarja ko tselo rup un sonakai un kol tsele kutch kotja o Debleskro khereske pentsa, te anenn le kowa an o foro Jerusalem an o kheer maro Deblestar.

³¹Ap o deesh-te-duito diwes an o ersto tchon kram men ap o drom un mukam ko pani Ahawa pal mende, te djas an o foro Jerusalem. Un maro Debleskro wast his pral mende un das men gar an i wasta kolendar, kai kaman maro merepen un kai men ap o drom palla lan.

³²Un mer wam an Jerusalem, un kram triin diwessa tchi, te well men newi soor.

³³Ap o starto diwes djam an o Debleskro kheer, un dam ko tselo rup un sonakai un kol wawar kutch kotja o rashajeske Meremot an o wast, koleskro dad o Urija his. Un pash leste his o Eleasar, koleskro dad o Pinhas his. Un khetne lentsa his kol Levitarja, o Josabad, koleskro dad o Jeshua his, un o Noadja, koleskro dad o Binnui his.

³⁴Hako kotar, hoi lende dam, was ap i waga tchiddo un an i liil tchinlo, har pharo lo his, un kitse kotja kolendar koi his.

³⁵Un kol menshe, kai wan pale dran o pandepen, anan viechen o Israeleskro Debleske, un maran len leske: 12 (deesh-te-dui) terne gurma i tsele menshenge an Israel, 96 (enja-deesh-te-shob) mursh bakre, 77 (efta-deesh-te-efta) terne bakre. Ninna anan le 12 (deesh-te-dui) mursh busja, kai wan maredo, te well i doosh i menshendar krik lino. Un kol tsele vieche wan pre chatchedo o baro Debleske.

³⁶Un jon anan ko liil, hoi o baro rai dran o them Babilonia len lentsa das, pash i pralstunende un i themeskre rajende wergel o panjestar Eufrat. Un kolla wan i Israelenge ap i rig, un dikan ninna, te well o Debleskro kheer pale pre-tchiddo.