Read O Debleskro Drom - I Bibla an o Romano Rakepen 2021 Nehemia 1 Bible Online

Nehemia 1 - O Debleskro Drom - I Bibla an o Romano Rakepen 2021 bible

Nehemia 1

¹Kawa hi, hoi pral o Nehemia tchinlo hi, koleskro dad o Hachalja hi. Har his o Artaxerxes an o biishto bersh o baro rai, homs an o tchon Kislew an baro rajeskro kheer an o foro Susa.

²Ap ko tsiro was o Hanani pash mande, jek mire phralendar, wawar murshentsa dran o them Juda. Un me putchom lendar, har djal i biboldenge, kai wan gar pandles krik anlo un atchan an o them Juda. Ninna putchom lendar, har djal o foreske Jerusalem.

³Un jon penan mange: “Kol menshe an o them Juda, kai wan gar pandles krik anlo, djiwenn an bari bibacht un ladj. Un i massuri trul Jerusalem hi tele phagedo, un i bare wudja hi pre-chatchedo.”

⁴Un har me kol laba shunom, beshom man koi un rowom an bari duk budeder diwessa. Un me chom tchi, un mangom o Debles an o bolepen,

⁵un penom: “Ach, baro Dewel, tu hal o Dewel an o bolepen, un hal baro un jaake sorelo, te daras hunte tutar. Tu rikreh koi sowel, hoi tu mentsa kral, un dikeh latches ap kolende, kai kamenn tut o djijestar un shunenn ap tire laba.

⁶Dik latches ap mande, tiro budepaskro, un shun, hoi tutar mangau. Diwes un rati mangau i Israelenge, tire budepangre. Un o tchilatchepen, hoi mer ap tute kram, anau me pash tute: Me un miro dadeskro kheer anam ninna doosh ap mende.

⁷Tchilatcho koowa kram ap tute, har shunam gar ap tire laba, hoi tu penal ap o Mose, koles tiro wast his. Un kram gar, hoi tu mendar kamal un djiwam gar pal tiro tchatchepen.

⁸Ma biste tiro lab, hoi dal tu leske, har tu penal: ‘Tumer te phagenn mantsa, palle tradau me tumen dran tumaro them, un tumer hunte djiwenn mank wawar menshende.

⁹Te rissrenn tumer pale trujel pash mande, un rikrenn mire laba un djiwenn pal lende, palle anau tumen pale ap koi platsa, hoi win rodom, te wap kote prindjedo. Kowa krau me, ninna te wans tumer krik tradedo bis an o palstuno kotar ap i phub.’

¹⁰Jon hi tire budepangre, tire menshe, kolen tu win lal dran i tchilatche wasta tiri bari sorjah un tiro sorelo wasteha.

¹¹Ach rai, shun ap miro mangepen un ap o mangepen kolendar, kai ninna tire budepangre hi, kai mangenn tut o djijestar an. Jaake muk kowa mishto te djal, hoi man glan hi, un kre, te dikell o baro rai, o Artaxerxes, latches ap mande.” An ko tsiro homs ko mursh, dran koleskro wast o pipen o baro rajeske was.