Read O Debleskro Drom - I Bibla an o Romano Rakepen 2021 Nehemia 10 Bible Online

Nehemia 10 - O Debleskro Drom - I Bibla an o Romano Rakepen 2021 bible

Nehemia 10

¹Un doleske rakrah men kanna tele un tchinah kowa pre, te rikrah men ap lauter, hoi mer kate penam. Un mare pralstune, mare Levitarja, un mare rashaja tchiwenn pengre laba tel kau liil un pandenn palle o liil khetne.

²Un kalla hi i laba kolendar, kai tchiwan pengro lab tel kau liil: Nehemia, ko moskro, koleskro dad o Hachalja his, un o Zedekja.

³I rashaja: Seraja, Asarja, Jirmeja,

⁴Pashur, Amarja, Malkija,

⁵Hattush, Shebanja, Malluch,

⁶Harim, Meremot, Obadja,

⁷Daniel, Ginneton, Baruch,

⁸Meshullam, Abija, Mijamin,

⁹Maasja, Bilga, Shemaja.

¹⁰I Levitarja: o Jeshua, koleskro dad o Asanja his, o Binnui, koleskro dad o Henadad his, un o Kadmijel;

¹¹un lengre phrala: Shechanja, Hodija, Kelita, Pelaja, Hanan,

¹²Micha, Rehob, Hashabja

¹³Sakkur, Sherebja, Shebanja,

¹⁴Hodija, Bani, Beninu.

¹⁵I pralstune pral i Israelitarja: Parosh, Pahat-Moab, Elam, Sattu, Bani,

¹⁶Bunni, Asgad, Bebai,

¹⁷Adonija, Bigwai, Adin,

¹⁸Ater, Hiskija, Asur,

¹⁹Hodija, Hashum, Bezai,

²⁰Harif, Anatot, Nebai,

²¹Magpiash, Meshullam, Hesir,

²²Meshesabel, Zadok, Jaddua,

²³Pelatja, Hanan, Anaja,

²⁴Hoshea, Hananja, Hashub,

²⁵Lohesh, Pilha, Shobek,

²⁶Rehum, Hashabna, Maaseja,

²⁷Achija, Hanan, Anan

²⁸Malluch, Harim, Baana.

²⁹I tsele Israelitarja, i rashaja, un i Levitarja, un kolla, kai jak denn ap o foreskre wudja, un i gipangre, un i budepangre an o Debleskro kheer, un kolla i wawar menshendar, kai mukan pengre menshen un djan kanna o Debleskro drom, ninna lengre romja, lengre tchawe un tcha, kai haiwenn kowa,

³⁰jon dan pen khetne pengre phralentsa, kol pralstunentsa mank lende, un dan pen sowel, te djan le ap o Debleskro drom, jaake har sikras lende o Mose, koles o Debleskro wast his, te djiwenn le pal hako lab un pal o tchatchepen, hoi das len o baro Dewel, lengro rai, un te kamenn kowa te krell, hoi job lendar kamell.

³¹Mer kamah mare tchen gar i murshentsa i wawar menshendar an kau them te romedinerell, un ninna lengre tchen gar mare tchawenge te lell.

³²Mer kamah gar ap o Debleskro diwes djob un wawar koowa te ginell kol menshendar, kai an kau them djiwenn, te wenn jon pengro koweha ginepaske ap o Debleskro diwes un ap wawar bare diwessa. An hako eftato bersh budrah gar ap mari hachetikri phub. Un mer mukah hakeneske peskri sijaan tele.

³³Koi budjake an o Debleskro kheer dell hakeno mendar star gramme rup.

³⁴Ko rup hi i marenge, hoi o Debleske koi tchiddo wenn, un ko chapaske un kol viechenge, hoi wenn leske chatchedo hako diwes; ninna kolenge, kai wenn o Debleske anlo ap hako Debleskro diwes, un ap hako newo tchon un ap i wawar bare diwessa. Ko rupeha well ninna o wawar koowa plaissedo, hoi denn le o Debleske, ninna kol vieche, hoi wenn chatchedo, te well i Israelengri doosh krik lino, un i tseli budjake an maro Debleskro kheer.

³⁵Mer anah hako bersh o kasht chatchepaske an maro Debleskro kheer, te nai well les chatchedo ap i chatchepaskri maro baro Deblestar, jaake har tchinlo hi an o Moseskro liil. Mer, i rashaja, i Levitarja un i wawar Israelitarja, witsrah tikne barra, te sikrenn le, koon mare familjendar an hawo tsiro kau kasht anell.

³⁶Ninna hako bersh dah o feteder halauterestar, hoi was baro ap mari phub un ap mare ruka, un anah kowa an o baro Debleskro kheer.

³⁷Mer anah hako phureder mursh tchawes un hako vieches, hoi o phureder peskri datar hi, an maro Debleskro kheer. Ninna i grumjendar un i bakrendar anah ko phureder pash kol rashajende, kai budrenn an maro Debleskro kheer.

³⁸Mer dah len ninna fun o newo jarro un kol newe rukengre, hoi ap mare ruka bares wan, ninna fun i newi mool un o newo djet un tchiwenn kowa lauter an i iseme pash maro Debleskro kheer. Ninna i Levitarjen te well, hoi lenge hi: o deshto kotar lauterestar, hoi ap maro phub baro was. Kolla te wenn un lenn penge o deshto kotar an hako gab un hako foro, kai mari hachetikri phub hi.

³⁹Un jek rashai kol menshendar Aron hunte djal lentsa ap ko tsiro, kai lenn le ko deshto kotar dren. Un i Levitarja hunte anenn o deshto kotar fun lengro deshto kotar an maro Debleskro kheer un tchiwenn kowa an ko kheer, kai sawo koowa pre garedo well.

⁴⁰An kau kheer anenn i Israelitarja un i Levitarja ko djob, i mool un o djet, hoi denn le o Debleske. Kote hi ninna kol koola, kolentsa budrenn le an o Debleskro kheer, ninna i rashaja, kai kote budrenn, un kol mursha, kai ap i wudja jak denn, un i gipangre. Jaake dah jak, te well lauterestar doha an o kheer maro Deblestar.