Read O Debleskro Drom - I Bibla an o Romano Rakepen 2021 Nehemia 12 Bible Online

Nehemia 12 - O Debleskro Drom - I Bibla an o Romano Rakepen 2021 bible

Nehemia 12

¹Un kalla hi i rashaja un i Levitarja, kai wan pale dran o pandepen khetne kol dui murshentsa, o Serubbabel, koleskro dad o Shealtijel his, un o Jeshua: o Seraja, o Jirmeja, o Esra,

²o Amarja, o Malluch, o Hattush,

³o Shechanja, o Rehum, o Meremot,

⁴o Iddo, o Ginneton, o Abija,

⁵o Mijamin, o Maadja, o Bilga,

⁶o Shemaja, o Jojarib, o Jedaja,

⁷o Sallu, o Amok, o Hilkija, un o Jedaja. Kalla his i pralstune pral i rashaja un lengre phrala an ko tsiro, har o Jeshua djiwas.

⁸I Levitarja: o Jeshua, o Binnui, o Kadmijel, o Sherebja, o Juda, o Mattanja; jon his i gipangre, kai giwan i sharepaskre gilja.

⁹o Bakbukja, o Unni, un lengre phrala. Jon his i gipangre, kai giwan pale, har i wawar glan giwan.

¹⁰O Jeshua las i tchawo. Leskro lab his Jojakim. Koleskro tchawo his o Eljashib, koleskro tchawo his o Jojada,

¹¹koleskro tchawo his o Jonatan, koleskro tchawo his o Jaddua.

¹²Har his o Jojakim o baro rashai, his kal wawar rashaja i pralstune pral pengre familje: o Meraja pral i familja Seraja; o Hananja pral i familja Jirmeja;

¹³o Meshullam pral i familja Esra; o Johanan pral i familja Amarja;

¹⁴o Jonatan pral i familja Meluki; o Josef pral i familja Shebanja;

¹⁵o Adna pral i familja Harim; o Helkai pral i familja Merajot;

¹⁶o Secharja pral i familja Iddo; o Meshullam pral i familja Ginneton;

¹⁷o Sichri pral i familja Abija; … [10] pral i familja Minjamin; o Piltai pral i familja Moadja;

¹⁸o Shamua pral i familja Bilga; o Jonatan pral i familja Shemaja;

¹⁹o Mattenai pral i familja Jojarib; o Usi pral i familja Jedaja;

²⁰o Kallai pral i familja Sallu; o Eber pral i familja Amok;

²¹o Hashabja pral i familja Hilkija; o Netanel pral i familja Jedaja.

²²An ko tsiro, har o Eljashib, un o Jojada, un o Johanan, un o Jaddua bare rashaja his, wan i laba an i liil tchinlo kol pralstunendar i familjendar, dran kolende i Levitarja un i rashaja wan. Kowa was jaake rah kerdo bis te was o Darius o baro rai pral o them Persia.

²³I laba kol pralstunendar pral i Levitarja wan jaake rah an i familjakro liil tchinlo, bis te was o Johanan o baro rashai, koleskro dad o Eljashib his.

²⁴Un i pralstune pral i Levitarja his: o Hashabja, o Sherebja, o Jeshua, o Binnui, un o Kadmijel. Lengre phrala, o Mattanja, o Bakbukja, un o Obadja his tardo wergel lende, har giwan le o Debleske. Lentsa khetne giwan le sharepaskre gilja o Debleske jaake, har o Debleskro mursh, o David penas. Kol jek giwan glan un kol wawar giwan pal. Pash i bare wudja, kai i khera hi, kai o chapen dren hi, dan kolla mursha jak: o Meshullam, o Talmon un o Akkub.

²⁵

²⁶Jon djiwan an ko tsiro, kai o Jojakim rashai his, koleskro dad o Jeshua his, koleskro dad o Jozadak his. An ko tsiro djiwas ninna o Nehemia, kai o themeskro rai his, un o Esra, ko rashai un sikepaskro, kai o Debleskre laba mishto djinas.

²⁷Un har i massuri trul o foro Jerusalem kerdo was, kran le i baro festo, un mukan i Levitarjen gole te dell dran lengre tsele gaba, te denn jon i massuri an o Debleskro wast un parkrenn pen pash leste bachtele djijentsa, un giwenn un bashrenn leske ap sasterne patria, hoi wenn khetne dino[11], un ap dorjengre bashepangre, hoi kharenna Harfe un Laute.

²⁸Kote wan i gipangre khetne dran i gaba, hoi trul Jerusalem hi, un dran i gaba pash o gab Netofa,

²⁹ninna dran Bet-Gilgal un dran o them trul i forja Geba un Asmawet.

³⁰Un i rashaja un Levitarja tchoran Debleskro pani ap pende, te krenn le pen djudjo glan o Debleste. Un palle tchoran le ninna o Debleskro pani ap i menshende, ap o foreskre wudja un ap i massuri.

³¹Un me — penas o Nehemia — mukom i pralstunen o themestar Juda pre ap i massuri te djal; un mukom gipangren ap i tchatchi rig un ap i serwi rig te djal, te sharenn le o Debles. Kolla, kai tchatches pre djan, djan dureder pash o Viechengro Fuleskro Wudar.

³²Un kolenge palla djas o Hoshaja un o paash i pralstunendar dran o them Juda.

³³Pal lende wan i rashaja: o Asarja, un o Esra un o Meshullam,

³⁴un o Juda, un o Benjamin, un o Shemaja, un o Jirmeja, un wawar, kai phurdan an i phurdepangre.

³⁵Pal lende was o Secharja, koleskro dad o Jonatan his, koleskro dad o Shemaja his, koleskro dad o Mattanja his, koleskro dad o Mikaja his, koleskro dad o Sakkur his, koleskro dad o Asaf his;

³⁶un leskre phrala: o Shemaja un o Asarel, un o Milalai, un o Gilalai, un o Maai, un o Netanel, un o Juda, un o Hanani. Len his sawe bashepangre, har o Debleskro mursh, o David, bashras. Un glan lende djas o Esra, ko sikepaskro, kai o Debleskre laba mishto djinas.

³⁷Un jon djan pash ko wudar, hoi Djido Panjeskro Wudar kharell; un dureder pre an o Davideskro foro, kote, kai djal i massuri bis pral o Davideskro kheer, un dureder bis pash o Panjeskro Wudar. Kowa hi ap koi rig o forestar, kai o kham pre djala.

³⁸Un kol wawar gipangre djan serwes. Un me djom pal lende khetne ko wawar paash kol pralstunendar. Un mer djam pral ap koi massuri bis pash ko bobeskro turmo un dureder pash ko kotar an i massuri, hoi kharell Buchli Massuri,

³⁹un palle dureder bis pash o Efrajimeskro Wudar, un palle pash ko Phuro Wudar un palle dureder pash ko Matchengro Wudar un dureder bis pash ko turmo, hoi kharell Hananel, un dureder bis pash ko turmo, hoi kharell Mea[12], un dureder bis pash o Bakrengro Wudar. Un pash ko Stilepaskro Wudar atchan le tardo.

⁴⁰Jaake wan i gipangre i tchatchi rigjatar un i serwi rigjatar, un atchan tardo pash o Debleskro kheer. Me ninna un ko paash kol pralstunendar, kai mantsa djam, wam un atcham koi tardo.

⁴¹Un i rashaja, o Eljakim, un o Maaseja, un o Minjamin, un o Mikaja, un o Eljoenai, un o Secharja, un o Hananja, bashran ap i phurdepangre.

⁴²Pash lende his kol Levitarja tardo: o Maaseja un o Shemaja un o Eleasar un o Usi un o Johanan un o Malkija un o Elam un o Eser. Un i gipangre giwan bari goljah. Un lengro pralstuno his o Jisrachja.

⁴³Un ap ko diwes anan le bud viechen o Debleske. Un jon giwan un khelan i bachtjatar. O Dewel kras, te wan lengre djia bachtelo un san. Un ninna i djuwja un i tchawe dan gole i bachtjatar. Un koi bari bachteli gole an o foro Jerusalem was shunlo fun dural.

⁴⁴An ko tsiro wan mursha win rodedo, kai jak hunte dan ap kol khera, kai o chapen dren anlo was, hoi i Israelitarja jaake hunte dan, har an o Moseskro liil tchinlo his: newo djob un newe rukengre, un o deshto kotar lauterestar, hoi le ap pengri phub trul i forja dren anan. Kowa lauter his i rashajenge un i Levitarenge. Un kol menshe an Juda his bachtelo pral pengre rashaja un Levitarja,

⁴⁵kai o Debleske budran, un o thopaskri budi kran, te wenn i menshe djudjo un erligo glan o Debleste. Un ninna i gipangre un kolla, kai ap o foreskre wudja jak dan, kran pengri budi jaake har o David un leskro tchawo, o Salomo, lenge penas.

⁴⁶Glan i rah tsiro, har o David o baro rai his, his o Asaf o pralstuno pral i gipangre, kai giwan o Debleske un sharan les.

⁴⁷Un kau tsiro, kai o Serubbabel un o Nehemia i pralstune pral o them Juda his, dan i tsele Israelitarja i gipangren un kolen, kai jak ap i foreskre wudja dan, kowa, hoi len hako diwes o djipaske hunte well. I menshe anan kowa, hoi le o Debleske dan, pash i Levitarja. Un kolla dan palle i rashajen jaake bud kolestar, har glan tchinlo his.