Read O Debleskro Drom - I Bibla an o Romano Rakepen 2021 Nehemia 13 Bible Online

Nehemia 13 - O Debleskro Drom - I Bibla an o Romano Rakepen 2021 bible

Nehemia 13

¹Ap ko diwes draweran le dran o Moseskro liil glan i tsele menshende. Un jon hatsan, te hi an ko liil tchinlo: ‘Kek i menshendar Ammon, witar kek i menshendar Moab nai djiwenn o Debleskre menshentsa khetne, un kowa kek tsireske.’

²Glan i rah tsiro dan i Ammonarja un i Moabarja i Israelende kek maro un kek pani, har kolla ap o drom his. Un i Moabarja plaissran o Bileames, te rakrell lo i bibacht pral i Israelitarja win. Maro Dewel kras dran i bibacht i bacht.

³Un har shunan i Israelitarja kanna kau tchinlo lab, rodan le lauter kolen win, kai wawar menshendar his un mank lende djiwan. Un kolla nai atchan gar buder pash lende.

⁴Glan jek tsiro was o rashai Eljashib o pralstuno pral i chapangre khera pash o Debleskro kheer. Un jek leskre menshendar his o Tobija.

⁵Koles das lo ko baro kheer, kai glan kowa o djob tchiddo his, hoi o Debleske chatchedo was, ninna o sungepaskro koowa un kol tsele koola, hoi i budjake koi his, un ninna o djob un i mool, un o djet, hoi o deshto kotar kolestar his, hoi ap i Israelengri phub bares was. Kowa lauter his i Levitarenge un i gipangrenge un kolenge, kai ap o foreskre wudja jak dan un ninna i rashajenge.

⁶Har o Eljashib ko baro chapaskro kheer o Tobijaske das, te djiwell lo koi, homs me gar an o foro Jerusalem. An ko bersh, har o Artaxerxes an o 32. (trijanda-te-duito) bersh o baro rai pral Babilonia his, djom me pash leste pale. Pal i tsiro putchom lestar, te mukell lo man pale pale te djal an Jerusalem.

⁷Un har wom pale an o foro Jerusalem, dikom me kowa, hoi kote glan djas, un hoi gar pal o tchatchepen his, hoi o Eljashib koi o Tobijaske kras, har lo leste ko chapaskro kheer das ap platsa glan o Debleskro kheer.

⁸Un miri choli pral kowa his baro. Un me djom koi un witsrom ko tselo koowa, hoi o Tobijas his, dran o kheer win,

⁹un penom soreles, te krenn le ko kheer djudjo, un ninna kol khera, kai pashel his. Un pal kowa anom pale ko tselo koowa, hoi i budjake an o Debleskro kheer hi, ninna o djob chatchepaske, un o sungepaskro koowa.

¹⁰Un kote dikom ninna, te anan i Israelitarja gar i Levitarenge ko koowa, hoi len hunte dino wals. Doleske kran i Levitarja un i gipangre buder gar pengri budi an o Debleskro kheer, un nashan penge hakeno ap peskri kotar phub.

¹¹Kote tchingrom ap i tchatchepangre murshende un putchom: “Har nai well jaake dur, te well buder kek budi kerdo an o Debleskro kheer?” Un me mukom i Levitarjen un i gipangren pale pale te anell, un dom hakenes peskri budi!

¹²Un i tsele menshe dran Juda anan pale o deshto kotar pengro djobestar un djetestar un pengri moljatar an kol chapangre khera.

¹³Un me rodom murshen win, te wenn le i pralstune pral i chapangre khera. Kolla his o rashai, o Shelemja, un o tchinepaskro, kai lila tchinell, o Zadok, un o Levitari, o Pedaja. Kolenge ap i rig his tardo o Hanan, koleskro dad o Sakkur his, koleskro dad o Mattanja his. Kolla star his mursha o labestar. Kolenge was penlo, te denn le ko chapen ap pengre phralende.

¹⁴Dik, hoi kai krom, miro Dewel! Ma biste ko latchepen, hoi krom ap tiro kheer, te well koi budi an leste mishto kerdo.

¹⁵An kol diwessa dikom me an o them Juda menshen, kai ap o Debleskro diwes molengre drake stakran, un wawar, kai anan djob un tchiwan les ap burike, ninna mool, drake, faige un wawar koowa, un anan kowa an o foro Jerusalem. Un me rikrom len pre un dom len trad, te bikrenn le kowa gar ap ko diwes.

¹⁶An o foro Jerusalem djiwan ninna menshe dran Tirus. Kolla anan matchen un wawar koowa un bikran kowa ap o Debleskro diwes ap i menshende dran Juda.

¹⁷Kote tchingrom ap i pralstunende an Juda un putchom lendar, hoi kowa te well. “Tumer lenn o Debleske leskro diwes krik”, penom me. “Ko diwes, kai leske kokres hi.

¹⁸Kran kowa tumare phure gar ninna jaake, te anas maro Dewel koi bari bibacht pral mende un pral kau foro? Un tumer krenn i choli pral o Israel gomme bareder, doleske te budrenn tumer ap o Debleskro diwes.”

¹⁹Un me penom, te wenn o foreskre wudja pandlo glan te was o Debleskro diwes, an ko tsiro har o kham tele djas[13], un te wenn le gar pale pre kerdo glan ko tsiro, kai hi o Debleskro diwes trujel. Un me bitchrom murshen an o foreskre wudja, te denn le jak, te well kek koowa an o foro Jerusalem dren hadedo.

²⁰Kote atchan kol parepangre un bikepangre pengro koweha jek, dui kope win glan o foro Jerusalem pral i rat.

²¹Un me dom len trad un penom ap lende: “Hoske atchenn tumer pral i rat win glan i massuri? Te krenn kowa gomme jek kopo, mukau tumen an o stilepen te witsrell.” Fun ko tsiro wan le gar buder ap o Debleskro diwes.

²²Un me penom ap i Levitarja, te krenn le pen djudjo o Debleske. Palle te wenn le pash o foreskre wudja un denn koi jak, te well o Debleskro diwes dren rikedo. Ninna kawa biste mange gar, miro Dewel. Un dik latches ap mande an tiro baro kamlepen.

²³An ko tsiro dikom me bibolden, kai lan penge romjen dran o Filistarengro foro Ashdod, ninna dran i themma Ammon un Moab.

²⁴Un o paash kolengre tchawendar rakran ashdodikes un haiwan gar o biboldengro rakepen. Jon rakran o rakepen kol wawar menshendar.

²⁵Un me tchingrom kol murshentsa, praassom len, un dom ninna murshen lendar, un tserdom lengre balla win. Un krom, te denn le pen sowel pash o Debleste, te denn le kek pengre tchendar kol wawarengre tchawende, un lenn kek kolengre tchendar penge un pengre tchawenge.

²⁶“Djinenn gar”, penom, “te kras o baro rai Salomo sawo koowa un anas doosh ap peste? Un an bud wawar themma, his kek baro rai har job his. Un o Dewel kamas les jaake, te kras lo, te well lo rai pral o tselo them Israel. Ninna les anan peskre romja dran kol wawar themma jaake dur, te anas lo doosh ap peste!

²⁷Un kanna hunte shunap tumendar, te anenn sawi bari doosh ap tumende, un rikrenn tumen gar ap ko lab, hoi o Dewel das, un lenn tumenge romjen dran wawar themma!”

²⁸Un o tchawo o baro rashajestar Eljashib, o Jojada, koles his mursh tchawe, kolendar jek i romjat las, kolakro dad o Sanballat hi dran o foro Bet-Horon. Un koles tradom mandar krik!

²⁹Miro Dewel, ma biste, kai anan jon ladj ap o rashajeskri budi, un rikran pen gar ap ko lab, hoi tu i rashajentsa un i Levitarentsa win kral.

³⁰Un jaake krom me i Israelitarjen pale djudjo un erligo glan o Debleste, un las dran lende lauter krik, hoi dran o wi-them an lende dren was. Un penom lenge, koon i rashajendar un i Levitarendar hawi budi hunte krell, jaake te djinas hakeno, hoi te krell lo.

³¹Un penom ninna, koon ap hawo tsiro o kasht hunte anell chatchepaske, un krom, te well o newo djob un i newe rukengre anlo. Biste kowa mange gar, miro Dewel, un dik latches ap mande!