Read O Debleskro Drom - I Bibla an o Romano Rakepen 2021 Nehemia 3 Bible Online

Nehemia 3 - O Debleskro Drom - I Bibla an o Romano Rakepen 2021 bible

Nehemia 3

¹Un o baro rashai Eljashib kras pes ap i budi peskre phralentsa, kol wawar rashajentsa, un jon tchiwan o foreskro wudar pale pre, hoi kharas Bakrengro Wudar. Un jon rakran o Debleskri bacht pral leste win, un tchiwan kol dui wudja dren. Un jon tchiwan ninna koi massuri pale pre bis pash ko turmo, hoi kharell Mea, un bis pash ko turmo, hoi kharell Hananel, un rakran o Debleskri bacht pral i massuri win.

²Un leske ap i rig budran i mursha dran Jericho. Un ap kolengri rig budras o Sakkur, koleskro dad o Imri his.

³Un ko foreskro wudar, hoi kharella Matchengro Wudar tchiwan i mursha pre, kolengro dad o Senaa his. Jon tchiwan kol pesse buchle kashta pre, un tchiwan kol dui wudja dren, ninna i kashtengre un o saster, hoi kol wudja pandella.

⁴Un kolenge ap i rig budras o Meremot, koleskro dad o Urija his un koleskro dad o Hakkoz his. Un ap koleskri rig budras o Meshullam, koleskro dad o Berechja his, koleskro dad o Meshesabel his. Un ab koleskri rig budras o Zadok, koleskro dad o Baana his.

⁵Un ap koleskri rig budran i mursha dran o foro Tekoa. Un lengre pralstune kaman gar te budrell un kran gar, hoi lenge penlo was.

⁶Un o foreskro wudar, hoi kharell Phuro Wudar, kras o Jojada, koleskro dad o Paseach his, khetne o Meshullam, koleskro dad o Besodja his. Jon tchiwan kol pesse sorele kashta pre, un tchiwan kol dui wudja dren, ninna i kashtengre un o saster, hoi kol wudja pandella.

⁷Un kolenge ap i rig budras o Melatja dran Gibeon un o Jadon dran Meronot, ninna i mursha dran Gibeon un Mizpa, kai ko themeskro rai djiwas, kai ap i wawar rig o lengsto panjestar o rai his.

⁸Un kolenge ap i rig budras o Usijel, koleskro dad o Harhaja his. Job his i mursh, kai kras shukar koowa dran sonakai. Un koleske ap i rig budras o Hananja. Kowa his i mursh, kai kras makepaskro djet. Un jon kran o kotar bis pash i Buchli Massuri.

⁹Un kolenge ap i rig budras o Refaja, koleskro dad o Hur his. O Refaja his o pralstuno pral o paash foro Jerusalem.

¹⁰Un koleske ap i rig budras o Jedaja, koleskro dad o Harumaf his. Leskro kheer his ap i wawar rig o dromestar, kai jon budran. Un koleske ap i rig budras o Hattush, koleskro dad o Hashabneja his.

¹¹Un i wawar kotar massuri kras o Malkija, koleskro dad o Harim his. Job budras khetne o mursheha Hashub, koleskro dad o Pahat-Moab his. Jon kran ninna o bobeskro turmo.

¹²Un kolenge ap i rig budras o Shallum, koleskro dad o Lohesh his. Job his o pralstuno pral o wawar paash o forestar Jerusalem. O Shallum budras peskri tchentsa.

¹³O Telstuno Wudar kras o Hanun un kol menshe, kai an foro Sanoach djiwan. Un jon tchiwan kol dui wudja dren, un i kashtengre un o saster, hoi i wudja pandenna. Un jon kran ko kotar massuri bis pash o Viechengro Fuleskro Wudar. Ko kotar massuri his jek seri mussja lengsto.

¹⁴Un o Viechengro Fuleskro Wudar tchiwas o Malkija pre, koleskro dad o Rechab his. Kowa his o pralstuno pral o them trul Bet-Kerem. Un job tchiwas kol dui wudja dren, un i kashtengre un i saster, hoi i wudja pandenna.

¹⁵Un o Djido Panjeskro Wudar kras o Shallum, koleskro dad o Kol-Hose his. O Shallum his o pralstuno pral o them trul o foro Mizpa. Job kras ko Djido Panjeskro Wudar un tchiwas i dacha pre, un kol dui wudja dren, ninna i kashtengre un i saster, hoi i wudja pandenna. Un job tchiwas i massuri pale pre pash ko tikno pani Shelah, hoi pash o baro rajeskri baar his, bis pash o barrengro drom, hoi djal tele dran o Davideskro foro.

¹⁶Pal koleste budras o Nehemja, koleskro dad o Asbuk his. O Nehemja his o pralstuno pral o paash ko themestar trul o foro Bet-Zur. Job kras i massuri bis pash o Davideskro mulengro kheer un bis pash ko tikno pani, hoi kerdo was, un bis pash o kheer, kai i lurde djiwan.

¹⁷Pal koleste budran i Levitarja: o Rehum, koleskro dad o Bani his; o Hashabja, kowa his o pralstuno pral o paash them trul o foro Kehila. Job budras ap i massuri ap kau kotar them;

¹⁸o Binnui[1], koleskro dad o Henadad his. O Binnui his o pralstuno pral o wawar paash ko themestar trul o foro Kehila;

¹⁹o Eser, koleskro dad o Jeshua his. O Eser his o pralstuno pral o foro Mizpa. Un job budras ap ko kotar ap i massuri, hoi hi tchiddo ap i wawar rig ko kherestar, kai i marepaskre koola dren hi, un djal bis pash i bangi ekka;

²⁰o Baruch, koleskro dad o Sabbai his. O Baruch budras peskro tselo djijeha ap ko kotar ap i massuri, hoi djal dureder bis pash o kheer, kai o baro rashai Eljashib djiwas;

²¹o Meremot, koleskro dad o Urija his, koleskro dad o Hakkoz his. Job kras ko kotar, kai djal fun kotar, kai o wudar hi an o Eljashibeskro kheer bis kote, kai leskro kheer pre heras.

²²Pal koleste budran i rashaja ap i massuri: i mursha dran o telstuno them pash o pani Jordan;

²³o Benjamin un o Hashub. Jon kran ko kotar an i massuri, kai lengre khera ap i wawar rig o dromestar his; o Asarja, koleskro dad o Maaseja his, koleskro dad o Ananja his. O Asarja kras ko kotar an i massuri, hoi pash peskro kheer his;

²⁴o Binnui, koleskro dad o Henadad his. Job kras ko kotar an i massuri, pash o Asarjeskro kheer bis pash i bangi ekka un dureder bis pash i ekka;

²⁵o Palal, koleskro dad o Usai his. Job budras ap ko kotar an i massuri, hoi hi wergel i bangi ekka un ko pralstuno turmo o baro rajeskro kherestar. Ko turmo hi pash i lurdengri platsa. o Pedaja, koleskro dad o Parosh his, kras i massuri dureder

²⁶bis wergel o Panjeskro Wudar ap koi rig, kai o kham pre djal, un ko turmo, hoi pash o Debleskro kheer glan tardo hi. Kowa his gar dur fun koi platsa Ofel, kai kol budepangre djiwan, kai an o Debleskro kheer budran.

²⁷Pal koleste budran i mursha dran o foro Tekoa ap i massuri, wergel kotar, kai ko turmo glan tardo his, bis pash koi massuri trul i platsa Ofel.

²⁸Ko kotar massuri pral o Grajengro Wudar kran i rashaja newes, hakeno wergel peskro kheer.

²⁹Pal kolende budras o Zadok, koleskro dad o Immer his. Job budras wergel peskro kheer. Un pal leste budras o Shemaja, koleskro dad o Shechanja his. Job his kowa, kai ap o Glanstuno Wudar jak das.

³⁰Pal koleste budras o Hananja, koleskro dad o Shelemja his, un o Hanun, o shobto tchawo ko murshestar Zalaf. Kolla kran i wawar kotar an i massuri newes. Pal kolende budras o Meshullam, koleskro dad o Berechja his. Un job budras wergel peskri isema.

³¹Pal koleste budras o Malkija. Kowa his jek kolendar, kai dran sonakai kutch koowa krenn. Un job kras i massuri dureder bis pash o kheer, kai djiwenn i parepangre un kol budepangre, kai an o Debleskro kheer budrenn. Kowa his ap i wawar rig ko wudarestar, hoi kharell Mifkad Wudar, un wergel koi pralstuni isema ap i ekka an i massuri.

³²Un mashkral i pralstuni isema ap i ekka un i Bakrengro Wudar budran i parepangre un kolla, kai krenn shukar koowa dran sonakai.

³³Har shunas o Sanballat, te tchiwah mer i massuri pale pre, kote was lo chojedo, un leskri choli his baro. Un job praassas i bibolden,

³⁴un penas glan peskre phralende un ap i kurepangre dran Samaria: “Hoi krenn kol paash-mule bibolde? Kamenn le tchatchepah o foro Jerusalem pale pre te tchiwell? Patsenn jon, te denn le viechen o Debleske, palle nai krenn le kowa lauter an jek diwes? Kamenn le kol chatchede barra dran koi tele-phagedi tchik pale djides te krell?”

³⁵Un o Tobija, ko Ammonari, his pash leste tardo un penas: “Muk len, te well i tikno diwjo djuklo un stell ap koi massuri pre, palle phagell li khetne.”

³⁶Me mangom miro Debles: “Shun maro Dewel, har praassenn le men. Un muk lengro praassepen ap lengre sherja pale te well. De lenge, te wenn le win randedo un pandles anlo an i wawar them.

³⁷Lengri doosh te well gar tele tchakedo tutar! Ma biste ko tchilatchepen, hoi le kran: Jon praassan men, kai krah i massuri trul tiro foro newes.”

³⁸Mer budram dureder ap koi massuri, jaake te was li paash pre kerdo. Un i tsele menshe his o tselo djijeha pash i budi pashel.