Read O Debleskro Drom - I Bibla an o Romano Rakepen 2021 Nehemia 4 Bible Online

Nehemia 4 - O Debleskro Drom - I Bibla an o Romano Rakepen 2021 bible

Nehemia 4

¹Un i budi ap o foreskri massuri djas mishto dureder, un kol kotja, kai i barra gomme win phagedo his, wan pale newes kerdo. Har shunas kowa o Sanballat un o Tobija, ninna kol menshe dran Arabia, dran Ammon un dran Ashdod, koi tapras len bari choli.

²Un jon tchiwan pen khetne, te djan le ap o foro Jerusalem, un te krenn le i menshen kote jaake diwjo, te djinell kek buder, hoi te krell lo.

³Kote mangam maro Debles an, un tchiwam murshen pre, kai jak hunte dan ap o diwes un an i rat, kaana jon wans.

⁴I menshe dran Juda kran i gili, hoi le giwan: Koi hi tchiddo jaake bud tchik, hoi hunte hidjras mer gomme krik. Mari soor men mukas, koi massuri gar dureder nai kras.

⁵Kolla, kai mentsa tchingepen rodan, penan jek ap o wawareste: “Mer kamah sik un tchorchanes mank lende te well, te dikenn le men gar, bis te mer mashkral lende wam. Palle dah len mulo. Jaake krah, te djal koi budi gar buder dureder.”

⁶Kol bibolde, kai gar dur lendar djiwan, wan pale te pale pash mende un penan menge, hoi kolen glan his.

⁷Doleske tchiwom me i murshen kote pash i massuri pre, kai i barra gomme win phagedo his. Un me tchiwom len jaake pre, te hi hako kopo kolla dran jek bari familja khetne tardo. Un len his pengre chare un witsepangre tchurja un boge pash pende.

⁸Un har lengri daar dikom, djom pash lende un penom ap i pralstunende un ap i tchatchepangre murshende un ap i tsele murshende: “Ma darenn lendar! Dikenn ap o Debleste, kai hi baro un jaake sorelo, te darell hunte hakeno lestar! Un djan an o kurepen tumare phralenge, un tumare tchawenge un tchenge, tumare romjenge un tumare kherenge!”

⁹Un kolla, kai kaman maro merepen, shunan, kai menge penlo was, hoi len glan his. Jaake mukas len o Dewel gar te krell, hoi len glan his. Kanna nai djam mer pale pale pash i massuri, hakeno kote, kai job budras.

¹⁰Un o paash mendar budras ap i massuri. Un ko wawar paash das jak, un len his i witsepaskre tchurja, un i shilte un i boge pash pende un i kurepaskre gada ap pende. Un i pralstune his tardo pal i tsele menshende dran Juda,

¹¹kai ap i massuri budran. Un kolla kai i tchik krik hidjrenn, budran jaake: Koi jek wasteha budran le, un an o wawar wast rikran le pengro witsepaskro tchuri.

¹²Un hakeno kolendar, kai i barra pre tchiwan, hidjras an peskri pereskri dori peskro charo trul peste pandlo. Un jaake budran le. Un ko mursh, kai an i phurdepaskri dren hunte phurdell, his pash mande tardo.

¹³Un me penom ap i pralstunende un tchatchepangre murshende un ap lauterende, kai kote his: “Hi gomme bud budi te krell, un hakeno mendar hi tardo ap i massuri dur krik o wawarestar.

¹⁴Tumer te shunenn koi phurdepaskri, djan koi un awenn kote mentsa khetne. Un maro Dewel kurell pes menge.”

¹⁵Jaake budram mer o tselo diwes jaake rah har o kham pre djas bis pash ko tsiro, kai i bolepangre momlia glan wan. Un o paash mendar das jak un rikras o witsepaskro tchuri an o wast.

¹⁶An ko tsiro penom me ap i pralstunende: “Hakeno te atchell peskre murshentsa rati an o foro Jerusalem, jaake te hi men doha mursha, kai denn jak an i rat un budrenn ap o diwes.”

¹⁷Un kek mendar riwas peskre koola rati win, me un mire phrala gar, un witar gar kolla, kai tel mande budran un kolla, kai jak dan. Un hakenes his peskro witsepaskro tchuri tchiddo ap peskri tchatchi rig.