Read O Debleskro Drom - I Bibla an o Romano Rakepen 2021 Nehemia 5 Bible Online

Nehemia 5 - O Debleskro Drom - I Bibla an o Romano Rakepen 2021 bible

Nehemia 5

¹Un pal i tsiro was i bari gole pre, un i mursha un lengre romja tchingran pral i brawelende mank lengre biboldengre phralende.

²His sawe koi, kai penan: “Mer un mare tchawe un tcha ham bud! Mer hunte ginas djob, te hi men chapaske jaake te nai djiwas!”

³Un wawar penan: “Mer hunte dam mari hachetikri phub koi, ninna maro drakengro them un mare khera, te nai las lowe pre, te nai ginas chapen an kau tsiro, kai lauter bokenna.”

⁴Un pale wawar penan: “Mer hunte patsam menge lowe ap mari hachetikri phub un ap maro drakengro them, te nai plaissras kol themeskre lowe o baro rajeske.”

⁵Jon lauter penan: “Mer ham har mare phrala, lengro mass un rat. Mare tchawe hi har lengre tchawe! Un mer hunte das mare tchawen un tchen lende, te wenn le lengre budepangre. Un mank mare tchende hi sawe, kai wan sorjah an-tapedo. Un mer nai krah tchi. Un mari hachetikri phub un maro drakengro them hi wawaren.”

⁶Koi was i bari choli an mande pre, har shunom koi bari gole un kol laba dran lengro mui!

⁷Un rakrom miro djijeha, un djom pash i pralstunende un i tchatchepangre murshende un tchingrom ap lende un penom: “Tumer pijenn o rat tumare phralendar win!” Un me krom i baro tsillo,

⁸un penom ap lende: “Kai kowa an maro wast his, ginam i bibolden, mare phralen, pale, kai ap i wawar menshende bikedo wan. Un kanna kamenn tumer, te bikrenn pen tumare phrala ap tumende, kai lengre menshendar han!” Kote atchas lenge o mui pre, un jon hatsan kek laba, hoi le nai penans.

⁹Un me penom: “Gar mishto hi kowa, hoi tumer kai krenna! Tumer hunte djiwans glan o baro Debleskre jaka, un krans, hoi mishto hi, te nai praassens men kol wawar menshe gar, kai trul mende djiwenn un maro merepen kamenn.

¹⁰Shunenn! Ninna me un mire phrala un mire budepangre patsan len lowe win un ninna djob. Mer te mukas lenge koi sijaan tele, jaake te hunte denn le tchi pale!

¹¹Denn len gomme kau diwes lengri hachetikri phub pale, ninna lengro drakengro them, lengre djeteskre ruka un lengre khera! Un mukenn lenge lengri tseli sijaan tele, hoi jon pash tumende hi, lowe, djob, mool un djet!”

¹²Kote penan le: “Mer kamah kowa pale te dell, un tchi lendar pale te lell! Mer kamah jaake te krell har tu menge penal!” Un me mukom i rashajen te well, un mukom i pralstunen pen sowel te dell glan lende, te krenn le les jaake, har le kowa penan.

¹³Ninna trisslom[2] miri baja win, un penom: “Jaake trissell o Dewel hakenes tumendar, kai rikrell gar peskro lab. O Dewel lell lestar leskro kheer un lauter, hoi les hi.” Un lauter, kai kote khetne wan, penan: “Amen!” Un jon sharan o baro Debles. Un i menshe kran pal kol laba, har jon penan.

¹⁴Fun ko diwes an, kai mange penlo was, te wap o rai pral o them Juda, lom me mange un mire menshenge tchi kolestar, hoi o themeskro rajeste hunte dino wals. Deesh-te-dui bersha krom jaake. Kowa his an ko tsiro, kai o Artaxerxes an o 20. (biishto) bersh baro rai his, bis an leskro 32. (trijanda-te-duito) bersh.

¹⁵Kol wawar themeskre raja glan mande tchiwan pharo koowa ap i menshende. Hako diwes lan le lendar maro un mool un kote pashel gomme 40 (star-deesh) rupene beme. Un kolengre budepangre kran pen ninna rai pral i menshende, jaake har le kaman! Me krom kowa gar jaake, djinom, o Dewel dikell man!

¹⁶Miri tseli sorjah budrom ap i massuri un ginom mange kek phub. Un mire tsele budepangre hunte budran kote mantsa khetne.

¹⁷Un i biboldendar chan 150 (jek-sheel-te-paash) tchatchepangre mursha ap mari chapaskri, un ninna kolla, kai wan pash mende dran i wawar themma trul mende.

¹⁸Un kowa, hoi an jek diwes o chapaske koi hunte his, his jek grumni, shob thulle bakre, ninna papja un kachja. Un hako deshto diwes ginom bud newi mool. Ninna te ginom jaake bud chapen, lom me gar kowa, hoi i themeskro rajeste hunte wals dino. Kowa, hoi i menshe hunte plaissrenn, his phares doha.

¹⁹Ma biste kowa mange, miro Dewel, hoi lauter kol menshenge krom!