Read O Debleskro Drom - I Bibla an o Romano Rakepen 2021 Nehemia 6 Bible Online

Nehemia 6 - O Debleskro Drom - I Bibla an o Romano Rakepen 2021 bible

Nehemia 6

¹O Sanballat un o Tobija un o Geshem, ko Arabari, un kol tsele wawar, kai menge tchilatchepen kaman, kolla shunan, kai his i massuri kerdo, un kek kotar pral atchas, kai barra wi-phagedo his. An ko tsiro his kokres i wudja gomme gar dren.

²Kote bitchras o Sanballat un o Geshem murshen pash mande, un mukan mange te penell: “Ab pash mende an o gab Kefirim an o telstuno them pash o foro Ono!” Len his glan, te krenn le mange tchilatchepen.

³Un me bitchrom lenge bitchepangre pale, un mukom lenge te penell: “Me krau kate i bari budi, un me nai wau gar tele. Te mukoms kate lauter tchiddo un woms tele pash tumende, nai wals jaake, te djals koi budi gar dureder.”

⁴Star kope bitchran le murshen pash mande kol labentsa. Un star kope penom lenge kal emlige laba pale.

⁵Kote bitchras o Sanballat o pantchto kopo peskro bitchepaskres pash mande un das les i liil peha, hoi gar pandlo his.

⁶An koleste his tchinlo: Mank i tsele menshende djal o rakepen trujel, un o Geshem penell les ninna: Tut hi glan, te hadess tut khetne i biboldentsa pral mende! Doleske tchiweh tu i massuri pale pre. Un pal kowa, hoi rakedo well, kameh tu lengro baro rai te well,

⁷un mukal Debleskre rakepangre pash tute gole te dell, kai glan tute win kharenn an o foro Jerusalem, te hal tu o baro rai pral o them Juda. Djiness, kowa well ninna o baro rajeske penlo. Jaake ab pash mande, te rakras mer khetne pral lauter, hoi hunte kras!

⁸Kote mukom leske te penell: “Tchi kolestar, hoi tu kai rakreh, hi tchatcho. Dran tiro dji well kawa lauter!”

⁹Jon lauter kaman menge daar te krell, te budras gar dureder, te well i massuri gar kerdo. Doleske krom mire wasta sorleder.

¹⁰Un me wom an o kheer, kai o Shemaja djiwas, koleskro dad o Delaja his, un koleskro dad o Mehetabel his. O Shemaja nai djas gar dran peskro kheer win, un penas mange: “Me un tu hunte was khetne an o Debleskro kheer un hunte pandas men dren an i palstuni isema. Jon wenna, te denn le tut temerl. Rati wenn le, te denn le tut temerl.”

¹¹Me penom: “I mursh, har me hom, nashell gar krik. Patseh, te djoms an o Debleskro kheer, te atchap djido? Me djau gar dren!”

¹²Me haiwom, koles bitchras gar o Dewel! His o Tobija un o Sanballat, kai dan les lowe, te penell job sau koowa mange,

¹³te darap man un krap kowa un anap jaake doosh ap mande. Palle wals len doha, hoi le pal mande nai rakrans, un nai praassans man koleha!

¹⁴Miro Dewel, biste kowa lenge gar, hoi o Tobija un o Sanballat kran, un ninna hoi i Noadja an o Debleskro lab pral mande win rakras, un kol tsele wawar, kai kran, har te rakrans le Debleskre laba win, un kaman mange daar te krell.

¹⁵Un ap o biish-te-pantchto diwes an o tchon Elul his lauter ap i massuri kerdo. Paash-sheel-te-dui diwessa djas koi tseli budi.

¹⁶Har shunan kowa kolla lauter, kai menge tchilatchepen kaman, trashan i menshe an i tsele themma, hoi trul mende hi. Un lengro pre-phurdepen djas krik. Un jon haiwan, te his maro Dewel pal koi budi tardo.

¹⁷An kol diwessa tchinan bud pralstune dran Juda lila ap o Tobija, un lila lestar djan ap lende.

¹⁸An o them Juda his bud, kai pen sowel dan, te rikrenn le pash leste. O dad leskri romjatar his o Shechanja, koleskro dad o Arach his. Un leskro tchawo, o Johanan, romedineras i tchat fun o Meshullam, koleskro dad o Berechja his.

¹⁹Un jon rakran glan mande pral ko tselo latchepen, hoi job lauter kras. Un penan leske, hoi me penom. Un o Tobija bitchras mange lila, kolentsa job kamas mange daar te krell.