Read O Debleskro Drom - I Bibla an o Romano Rakepen 2021 Nehemia 8 Bible Online

Nehemia 8 - O Debleskro Drom - I Bibla an o Romano Rakepen 2021 bible

Nehemia 8

¹Un har o eftato tchon was, un i Israelitarja pale an pengre forja his, wan i tsele menshe khetne har jek mursh ap i platsa glan o Panjeskro Wudar. Un jon penan ap o Esra, te anell job o Moseskro liil, kai dren tardo hi, hoi o baro Dewel penas, hoi i Israelitarja hunte krenn un rikrenn. O Esra his i sikepaskro, kai prindjras mishto o Debleskro lab.

²Jaake anas o rashai Esra ap o ersto diwes an o eftato tchon o Moseskro liil glan i tsele Israelitarja, kai khetne wan, glan kol tsele murshende un djuwjende, un lauterende, kai nai haiwan les.

³Un sik taissarlakro bis mashkral o diwes draweras job dran ko liil glan, kote ap koi platsa glan ko Panjeskro Wudar. Un hakeno das jak ap kowa, hoi an ko liil dren tardo his.

⁴Un o sikepaskro, o Esra, his tardo pre ap i kashteno mochton[5], hoi koleske kerdo was, te dikenn un nai shunenn les lauter. Un pash leste his tardo, ap i tchatchi rig: O Mattitja, un o Shema, un o Anaja, un o Urija, un o Hilkija, un o Maaseja. Un ap leskri serwi rig: O Pedaja, un o Mishael, un o Malkija, un o Hashum, un o Hashbaddana, un o Secharja, un o Meshullam.

⁵Un o Esra his tardo pral ap o kashteno mochton. Un i tsele menshe dikan, har kras lo o liil pre. Koi stan le lauter pre.

⁶Un o Esra sharas o baro Debles, kai bareder hi har lauter wawar. Un i tsele menshe penan: “Amen, Amen!” Un har le kowa penan, hadan le pengre wasta pre. Un palle witsran le pen tele glan o baro Debleste lengre mujentsa ap i phub.

⁷Palle stan le pale pre hakeno ap peskri platsa. Un i Levitarja penan i menshenge, hoi kol laba an o Moseskro liil kamenn te penell. Kol Levitarja his o Jeshua, un o Bani, un o Sherebja, un o Jamin, un o Akkub, un o Shabbetai, un o Hodija, un o Maaseja, un o Kelita, un o Asarja, un o Josabad, un o Hanan, un o Pelaja.

⁸Un ko liil, kai o Debleskro lab dren tchinlo his, his an o hebretikro rakepen. Un i Levitarja rakran kol laba an o aramtikro rakepen, hoi kal menshe kote rakran. Un palle sikran le len, hoi kol laba kamenn te penell, jaake te haiwan le, hoi koi glan drawedo was.

⁹Un i tsele menshe rowan, har shunan le kol laba, hoi an o Moseskro liil tardo his. Un o Nehemia, kowa his o moskro pral o foro Jerusalem, un o rashai Esra, kowa his o sikepaskro, un kol Levitarja, kai i menshenge penan, hoi o Debleskro lab kamell te penell, kolla penan ap lauterende: “Kau diwes hi i baro diwes o baro Debleske, kai tumaro Dewel hi. Doleske mukenn tumare djia gar phares te well! Un ma rowenn!”

¹⁰Un job penas pale ap lende: “Djan koi un chan thullo chapen un pijenn gudlo pipen! Un bitchrenn kolestar ninna kolenge, kai kran pen kek chapen! Kau diwes hi i baro diwes o Debleske, maro rajeske. Mukenn tumenge o dji gar phares te well! Na-a, mukenn tumare djia giwenn o baro Debleske! Palle han sorelo.”

¹¹Un i Levitarja rakran latches ap i menshende un penan: “Atchenn kanna! Kawa diwes hi i Debleskro diwes. Mukenn tumare djia gar jaake phares te well!”

¹²Kote djan i tsele menshe koi, te chan le un pijenn le. Un jon bitchran pengro chapastar kolenge, kai len tchi his, un giwan un khelan i bachtjatar. Jon haiwan kol laba, hoi lenge penlo wan.

¹³Un ap o duito diwes wan i pralstune kol Israelengre familjendar un i rashaja un i Levitarja khetne pash o Esra, ko sikepaskro, kai o Debleskro lab mishto djinas, te sikrell lo len, hoi an o Moseskro liil tardo hi, te haiwenn le o Debleskro drom feteder.

¹⁴Un an ko liil hatsan le kol laba, kai penas o baro Dewel ap o Moseste, te hunte rikrenn i Israelitarja kol bare diwessa, kai kharenn ‘Patjengre Khera[6]’ an o eftato tchon. Un an kol diwessa hunte djiwenn le an tikne khera, hoi jon penge dran patria krenn.

¹⁵Jaake dan le win gole an pengre tsele forja, ninna an Jerusalem, un penan: “Djan win ap i berge un anenn kashta i djeteskre rukendar, ninna i diwje djeteskre rukendar, un i mirtetikre rukendar un i palmtikre rukendar un wawar rukendar, kolen bud patria hi. Un krenn kolendar tikne khera dran patria, jaake har an o Moseskro liil tchinlo hi.”

¹⁶Kote djan i menshe win un anan kashta i patjentsa un kran penge patjengre khera. Un hakeno kras peske sau kheer, kol jek pral ap pengre khera, kol wawar pal pengre khera, ninna ap koi platsa glan o Debleskro kheer un ap i platse pash o Panjeskro Wudar un pash o Efrajimeskro Wudar.

¹⁷Un i tsele menshe, kai khere wan dran i themma, kai le pandle his, kolla kran penge khera dran patria un djiwan an lende. Kowa kran i Israelitarja buder gar jaake rah, har o Josua mulo hi, koleskro dad o Nun his. Un jon his bud bud bachtelo.

¹⁸Hako diwes draweras o Esra dran o liil glan, kai o Debleskro drom siklo well, o tselo tsiro, kai jon kol bare diwessa rikran. Un kol bare diwessa djan efta diwessa. Un ap o ochtato diwes wan le lauter jaake khetne, har tchinlo his an i tchatchepaskre laba.