Read O Debleskro Drom - I Bibla an o Romano Rakepen 2021 Ester 2 Bible Online

Ester 2 - O Debleskro Drom - I Bibla an o Romano Rakepen 2021 bible

Ester 2

¹Un pal ko koowa, har djas i choli o baro rajestar Ahasveros pale, djas leske an o shero trujel, hoi i Wasti kras, un hoi lah kerdo was.

²Kote penan leskre budepangre ap leste: “Maro rai, pen, te wenn shukar terne tchen rodede, kolen kek murshestar an-tapedo wan.

³Un bitche murshen an i tsele themma, kai baro rai hal, te anenn le i tsele shukar terne tchen kate an tiro sorelo kheer an o foro Susa, un kote an o djuwjengro kheer. Un de len an o wast ko pralstunestar, o Hegai, kai dell jak ap i djuwjende. Un job mukell lauter ap lende te krell, hoi i djuwjat shukar krell.

⁴Palle le koi terni tchai, hoi an tire jaka i shukeder hi, te well li rani, har i Wasti glan late rani his.” Un kol laba his mishto an i jaka o baro rajestar. Un job kras kowa jaake.

⁵Un an o sorelo kheer an Susa djiwas i biboldo. Kowa kharas Mordekai. Leskro dad his o Jair, un leskro papo his o Shimi. Koleskro dad his o Kish. Kowa his i Benjaminari.

⁶Leskri familja his mank kol menshende, kai pandlo wan, har lengro baro rai, ko baro rai pral o them Juda, o Jekonja, pandlo was. Un o baro rai pral o them Babilonia, o Nebukadnezar, mukas len an peskro them te anell.

⁷Un pash o Mordekai djiwas i terni tchai, i Hadassa, kai ninna Ester kharedo was. Joi his leskro kakeskri tchai, un lat his buder kek dad un kek dai. Un joi his i shukar un raili tchai. Un har lakro dad un lakri dai meras, las o Mordekai lat pash peste un was lake har lakro dad.

⁸Har kanna kol laba o baro rajestar trujel djan, wan bud tcha anlo an o sorelo kheer an o foro Susa. Un ninna i Ester his mank lende un was an o djuwjengro kheer anlo, un an o wast ko murshestar Hegai dino, kai dell jak ap o djuwjengro kheer.

⁹Un joi his shukar an koleskre jaka, un las jaake leskro latchepen. Un job dikas koi pre, te lell li sik kutch makepaskro djet un sasto chapen, hoi i djuwjat shukar krell. Un job das lat efta wi-rodede djuwjen, te wenn le lake koi. Un anas lat un lakre budepaskretse an i feteder iseme an o djuwjengro kheer.

¹⁰Glan kowa penas o Mordekai ap i Ester, te penell li gar, dran hawo them un hawe menshendar joi hi. Jaake penas i Ester tchi kolestar.

¹¹Un o Mordekai djas hako diwes glan ko djuwjengro kheer pre te tele, te nai hatsell lo win, har i Esterake djal, un hoi jon lah krenn.

¹²Jek bersh rah was haki tchai shukar kerdo ko diweske, kai djal li pash o baro rajeste dren: shob tchonna was li dren maklo o djeteha, kai Myrrhe dren hi, un pale shob tchonna o djeteha, kai Balsam dren hi un wawar kutch sungepaskro koweha.

¹³Un palle djas jek tchai pal i wawar pash o baro rajeste dren. Un lauter, hoi kamas li peha te lell, hunte was lat dino. Un joi was dran o djuwjengro kheer an o baro rajeskro kheer anlo.

¹⁴Ap i rat djas li dren un taissarlake djas li palle an i wawar djuwjengro kheer, tel i wasta ko pralstunestar, kai kharas Shaashgas. Kowa das ap kol djuwjende jak, kai o baro rajeskre wawar djuwja[3] his. Un kek kol djuwjendar was i duito kopo pash o baro rajeste, kokres kolla, kai his shukar an leskre jaka, un kolen job mukas pash pengro lab te kharell.

¹⁵Ko tsiro was, te djal i Ester pash o baro rajeste. Lakro dad his o Abichajil un lakro kako o Mordekai, kai lat pash peste las, har well li leskri tchai. Un joi kamas tchi budeder peha te lell, har o Hegai, ko pralstuno pral i djuwjende, lake penas. Un an i jaka lauterendar, kai dikan lat, his li shukar.

¹⁶Un jaake was i Ester pash o baro rajeste Ahasveros an leskro rajeskro kheer anlo. Un kowa his an o deshto tchon, har job an o eftato bersh o baro rai his. Kau tchon kharas Tebet.

¹⁷Un o baro rai kamas lat budeder har i tsele wawar djuwjen. An leskre jaka his li shukeder un feteder har haki wawar terni tchai. Un job tchiwas ko shereskro sonakai ap lakro shero, hoi i rani hidjrell. Un kras latar i newi rani, jaake har i Wasti glan late his.

¹⁸Un o baro rai kras i baro chapen i tsele rajenge un pralstunenge, te well i Ester hadedo. Un i tsele themenge mukas lo lowe palla, hoi jon leste hunte dans. Un mukas djob tchitcheske win te dell, jaake har bare raja krenna.

¹⁹His an ko tsiro, har i duito kopo terne tcha khetne anlo wan o baro rajeske. Koi his o Mordekai beshdo an o baro wudar glan o baro rajeskro kheer.

²⁰I Ester shunas ap o Mordekai jaake har an ko tsiro, har joi gomme pash leste his. Un jaake har lo lake penas, penas li gar dran hawo them un hawe menshendar joi hi.

²¹An kol diwessa har o Mordekai an ko baro wudar glan o baro rajeskro kheer beshdo his, wan dui budepangre an i bari choli. Kolla dan jak ap i wudja un kharan Bigtan un Teresh. Un jon lan penge glan, te denn le o baro rajes Ahasveros mulo.

²²Un ko koowa shunas o Mordekai un penas les ap i rani Ester, un penas lake ninna, te penell li les o baro rajeske dureder. Un i Ester kras kowa.

²³Un har dikan le palla, was win, te his kowa tchatcho. Un kol dui wan ap o kasht bladedo[4]. Un o baro rai mukas kau koowa dren te tchinell an o bershengro liil o themestar.