Read O Debleskro Drom - I Bibla an o Romano Rakepen 2021 Ester 4 Bible Online

Ester 4 - O Debleskro Drom - I Bibla an o Romano Rakepen 2021 bible

Ester 4

¹Un har o Mordekai shunas, hoi djas, kras lo peskre koola paash, hoi ap leste his. Un riwas peske i gono an, un tchiwas jagakri tchik ap peste. Un djas dren mashkral o foro un rowas un das gole.

²Un jaake was lo bis glan o baro wudar o baro rajeskro kherestar. Un kote atchas lo. Kek, kai his rido an gone, nai djas dren.

³Un an hako them, kai o liil o baro rajestar was, his baro ropen mank i bibolde. Un bud kaman buder tchi te chal, rowan un riwan pen an gone un tchiwan jagakri tchik ap pende.

⁴Un i djuwja, kai i Esterake budrenn un kol pralstune, kai lake koi hi, wan pash late un penan lake kau koowa. Un kote tapras i rani bari daar. Un joi bitchras ripja pash o Mordekai, te riwell lo len an, un te tchiwell lo o gono pestar tele. Un job kamas gar.

⁵Kote mukas i Ester i murshes te kharell. Kowa kharas Hatach un his i pralstuno, koles o baro rai late das, te well lo lake koi. Un koles bitchras li pash o Mordekai te putchell lo lestar, hoske job jaake krell.

⁶Un o Hatach djas pash o Mordekai win ap i platsa, hoi his glan o wudar o baro rajeskro kherestar.

⁷Un o Mordekai penas leske lauter, hoi leske djas, un ninna har bud rup o Haman kamas te tchiwell lo pash o baro rajeskro brawlepen pashel, te wenn i tsele bibolde maredo.

⁸Un o Mordekai das les i liil peha, kai kol laba tele tchinlo his, hoi an o foro Susa ap i kasht dino his, kai tardo hi, te wenn i bibolde maredo. Kau liles te sikrell lo i Esterake, un te penell lo lake lauter, un mangell latar, te djal li pash o baro rajeste dren, un mangell les i ropah, te krell lo peskro dji pre lakre menshenge.

⁹Un o Hatach djas un penas i Esterake, hoi o Mordekai penas.

¹⁰Kote bitchras i Ester les pale pash o Mordekai, te penell lo leske:

¹¹“I tsele pralstune, kai o baro rajeske budrenn, ninna i menshe an hako them, koles o baro rai hi, kolla prindjrenn ko tchinlo lab, te well hako mursh un haki djuwel maredo, kai djal dren pash o baro rajeste un well ap i platsa an leskro kheer, un hi lestar gar kharedo. Kokres te lell o baro rai peskro sonakaskro raan un sikrell ap leste, atchell lo djido. Me wom trijanda diwessa buder gar pash o baro rajeste dren kharedo.”

¹²Har shunas o Mordekai, hoi mukas i Ester leske te penell,

¹³mukas lo lake pale te penell: “Ma pats, te nai weh tu tiro djipah krik, doleske, kai djiweh an o baro rajeskro kheer! Ma pats, te atchess tu kokres djido i tsele biboldendar!

¹⁴Tu te peneh tchi kanna an kau tsiro, palle well i wawar, kai men bibolden win lell. Un tu un tiro dadeskro kheer wenn maredo. Un koon djinell, te wal tu gar rani sawo tsireske har kawa kanna hi?”

¹⁵Kote mukas i Ester ap o Mordekai te penell:

¹⁶“Dja koi un de i tsele bibolden an o foro Susa khetne gole! Chan un pijenn triin diwessa tchi, gar ap o diwes, witar gar an i rati. Krenn kowa mange, te dikell o Dewel latches ap mande! Un me un kol djuwja, kai mange budrenn, mer kamah kowa ninna jaake te krell. Un pal kowa kamau pash o baro rajeste dren te djal, ninna te hi khatar[6] o tchinlo lab. Un te denn le man mulo, palle denn le man mulo.”

¹⁷Un o Mordekai djas peske un kras lauter jaake har i Ester leske penas.