Read O Debleskro Drom - I Bibla an o Romano Rakepen 2021 Ester 6 Bible Online

Ester 6 - O Debleskro Drom - I Bibla an o Romano Rakepen 2021 bible

Ester 6

¹An koja rat nai sowas o baro rai gar, un mukas peske glan te drawerell dran o bershengro liil o themestar.

²Un koi hatsas pes dren tchinlo, har kaman kol dui mursha, o Bigtan un o Teresh, o baro rajes mulo te dell. Kol dui his pralstune, kai dan jak glan o wudar o baro rajeskro kherestar. Ninna his kote tchinlo, kai o Mordekai kowa win hatsas un an-sikras.

³Kote putchas o baro rai: “Hoi las o Mordekai koleske? Har was lo bares kerdo?” Un kol budepangre, kai leske koi hi, penan: “Leske was tchi kerdo.”

⁴Kote putchas o baro rai: “Koon hi win ap i glanstuni platsa?” Un kote his o Haman ap ko tsiro ap i glanstuni platsa glan o baro rajeskro kheer, te penell lo o baro rajeske, te mukell job o Mordekajes pre te bladell ap ko kasht, hoi lo koleske pre-tchiwas.

⁵Un kol budepangre o baro rajestar penan ap leste: “O Haman hi ap i platsa tardo.” Un o baro rai penas: “Job well dren!”

⁶Un o Haman was dren. Un o baro rai putchas les: “Hoi te krap ko mursheske, koles me, o baro rai, kamau o djijestar te hadell?” Kote penas o Haman an peskro dji: “Kones kamell o baro rai budeder te hadell har man?”

⁷Un o Haman penas ap o baro rajeste: “Ko mursheske, koles kamell o baro rai o djijestar te hadell,

⁸mu wenn rajeskre koola anlo, ninna i rajeskro grai. Un ap leskro shero well i rajeskri stadi tchiddo.

⁹Un jek o pralstunendar o baro rajestar riwell ko murshes an, un anell les ap o grai pral i foreskri platsa, un mukell glan leste win te kharell: ‘Jaake krell o baro rai ko mursheha, koles job kamell o djijestar te hadell.’”

¹⁰Kote penas o baro rai ap o Haman: “Le sik kol koola un o grai, jaake har tu penal. Un kre kowa jaake ko biboldeha, o Mordekai. Kowa hi beshdo an o wudar glan o baro rajeskro kheer. Un muk tchi kolestar lauterestar krik, hoi tu penal!”

¹¹Kote las o Haman kol koola un ko grai un djas pash o Mordekai un riwas leske kol koola an, un anas les pral ko foreskri platsa, un kharas glan leste win: ‘Jaake krell o baro rai ko mursheha, koles job kamell o djijestar te hadell.’

¹²Palle djas o Mordekai pale an o wudar pale glan o baro rajeskro kheer. Un o Haman ladjas pes un khatras peskro shero, un djas sik khere.

¹³Un job penas peskri romjake, i Seresh, un peskre tsele malenge, lauter hoi leske djas. Kote penan leskre mala un leskri romni, i Seresh, ap leste: “Te peral tu kanna glan o Mordekai, koon i biboldendar hi, palle nai kreh tu buder tchi khatar[7] leste. Na-a, tu djah tele un nashreh lauter.”

¹⁴Un har jon gomme leha rakran, wan o baro rajeskre budepangre un anan les sik pash o chapen, hoi i Ester lenge kras.