Read O Debleskro Drom - I Bibla an o Romano Rakepen 2021 2. Mose 12 Bible Online

2. Mose 12 - O Debleskro Drom - I Bibla an o Romano Rakepen 2021 bible

2. Mose 12

¹[8] Un o baro Dewel penas ap o Mose un ap o Aron an o them Egiptia:

²“Kawa tchon well tumenge o ersto tchon an o bersh.

³Rakrenn ap i tsele Israelitarja un penenn: Ap o deshto diwes an kawa tchon lell peske hako dad i terno bakro peskre menshenge an peskro kheer.

⁴Te hi gar doha menshe an leskro kheer, te chan le ko tselo bakro, palle chan le les khetne kol menshentsa, kai langs lende djiwenna. Hakenes te well i kotar mass.

⁵Lenn jek viecho, hoi sasto hi, i mursh, hoi jek bersh phuro hi, nai well i bakrendar, nai well i busjendar[9].

⁶Un rikrenn les pash tumende bis ap o deesh-te-starto diwes. Rati ap ko diwes, hunte marell haki Israeltikri familja peskro bakro.

⁷Palle lenn le ko rat un makenn les ap kol kashta, hoi tchatches un serwes pash o wudar hi, un pral o wudar ninna, an ko kheer, kai chan le o bakro.

⁸Ko mass well peklo pral i jag. Un jon hunte chan les an koi rat khetne o maro, kai kek shutlo jarro dren hi. Un shutlo senlepen chan le pashel.

⁹Ma chan ko mass jales, witar gar keredo an o pani! Pral i jag well o tselo bakro peklo, o shero, i herja, ninna i buke.

¹⁰Tchi kolestar atchell pral bis ap o wawar diwes. Te atchas tchomone pral, hunte chatchrenn kowa.

¹¹Jaake hunte chan les: trul tumaro per i dori pandlo, i kircha ap tumare herja, un i kasht an tumaro wast. Chan o chapen sik! Ko chapen kharell Passa. Tumer chan les, te sharenn man, tumaro baro Debles.

¹²Un me djau an kaja rat mashkral o tselo them Egiptia, un dau i tsele mursh tchawen temerl, kai hi i phureder tchawe pengre dajendar, kolla, kai i menshestar, ninna i viechestar boldo wan. Jaake dau me kolende lauterende i phagi, kai kharenn pen dewel, un kolen i Egiptarja an-mangenna. Me hom o baro Dewel.

¹³O rat ap i khera sikrell mande, kai tumer han. Un dikau me o rat, djau me dureder, te djal tumenge tchi. Un ko merepen, hoi anau ap o them Egiptia, well gar ap tumende.

¹⁴Bistrenn kau diwes gar! Krenn lestar i baro diwes, kai sharenn o baro Debles, tumer un tumare tchawe, kai wenna pal tumende! Hako bersh well kawa jaake pash tumende kerdo kanna un hako tsiro.

¹⁵Efta diwessa chan tumer maro, kai kek shutlo jarro dren hi. Ap o ersto diwes tchiwenn tumer o shutlo jarro krik. Kowa, kai an kol efta diwessa maro chal, kai shutlo jarro dren hi, kowa well pale-tchiddo, un hunte djiwell buder gar mank i Israelitarja.

¹⁶Ap o ersto diwes awenn khetne, te mangenn man an. Ninna ap o eftato diwes krenn kowa! Ma budrenn ap kol dui diwessa! Kokres o chapen, hoi hakeno chala, nai krenn tumer.

¹⁷Rikrenn tumen ap kal laba: An kol efta diwessa chan tumer maro, kai kek shutlo jarro dren hi. Ap kau diwes lom me tumen lauteren dran o them Egiptia win. Doleske rikrenn tumen ap kawa, un krenn kowa hako bersh, tumer un tumare tchawe, kai wenna pal tumende hako tsiro.

¹⁸An o ersto tchon ap o deesh-te-starto diwes ap i rat chan tumer maro, kai kek shutlo jarro dren hi, bis ap o biish-te-jekto diwes ap i rat.

¹⁹Efta diwessa hunte well kek shutlo jarro an tumare khera hatslo. Hakeno, kai maro chala, kai shutlo jarro dren hi, well pale-tchiddo, un hunte djiwell buder gar mashkral i Israelitarja. Kowa nai well i wi-themari, ninna i Israelitari.

²⁰Ma chan shutlo maro, kai tumer ninna djiwenn! Chan kokres maro, kai kek shutlo jarro dren hi!”

²¹Un o Mose mukas i tsele phureden i menshendar Israel pash peste te well, un penas ap lende: “Lenn tumenge tumare familjenge bakre win ko chapaske, hoi kharella Passa! Marenn len!

²²Palle lenn patria kol kashtestar, hoi kharella Ysop, un rikrenn len an ko tcharo, hoi o rat dren hi! Un makenn lentsa o rat win pral o wudar un ap kol dui kashta, hoi tchatches un serwes pash o wudar hi! Un kek tumendar djal dran o wudar win koi tseli rati.

²³Un o baro Dewel djala mashkral o them, te dell lo i Egiptarja temerl. Te dikell lo o rat pral ap o wudar un ap kol dui kashta, hoi tchatches un serwes pash o wudar hi, palle djal job dureder un mukell koles, kai anell o merepen, gar pash tumende dren te djal, te dell lo jekes tumendar temerl.

²⁴Doleske rikrenn tumen ap kal laba, tumer un tumare tchawe, kai wenna pal tumende, kanna un hako tsiro.

²⁵Ninna an ko tsiro, kai wenn tumer an ko them, hoi o baro Dewel tumenge peskro lab das, te anell job tumen koi dren, krenn pal kal laba!

²⁶Un te putchenna tumare tchawe tumendar: Hoske krah mer kowa?

²⁷Palle penenn lenge: ‘Kau bakro, hoi maram ap ko diwes, hoi kharella Passa, kau bakro maram o baro Debleske. Har das job an o them Egiptia i Egiptarja temerl, djas job gar an i khera, kai i Israelitarja djiwan. Job djas dureder. I menshe an mare khera mukas lo te djiwell.’” Kote witsran pen i Israelitarja tele un mangan o Debles an.

²⁸Palle djan le un kran jaake, har o baro Dewel o Moseske un o Aroneske penas.

²⁹Un mashkral an i rat maras o baro Dewel i tsele mursh tchawen, kai his i phureder tchawe pengre dajendar, an o tselo them Egiptia: o Faraeskro phureder tchawes, kai ap o rajeskri beshepaskri beshdo hi, un ninna i phureder tchawen kolendar, kai stilde hi. Awa, ninna i mursh vieche, hoi his i phureder tchawe pengre dajendar, wan temerl dino.

³⁰Koi rati stas o Farao pre, ninna i tsele pralstune un i tsele Egiptarja, un kote djas i ropaskri gole an, hoi o dji tchinella. O merepen his an hako kheer.

³¹Un o Farao mukas an kaja rat o Moses un o Arones gole te dell un penas ap lende: “Sik, mukenn kau them, tumer un i wawar Israelitarja! Djan tumenge mire menshendar krik! Djan un mangenn tumaro baro Debles an, jaake har tumer kaman.

³²Lenn tumare bakre un busja un tumare grumja, jaake har tumer kaman! Un djan un mangenn tumaro baro Debles, te well lo mange latches.”

³³Un i tsele Egiptarja mangan len, te djan le jaake sik har djala, un tradan len dran o them. Jon penan penge: “Te djan le gar sik, hunte meras mer lauter.”

³⁴Jaake lan i Israelitarja i tchare, kai ko maro dren hi, hoi gomme gar peklo was, un kai kek shutlo jarro dren his, un tchiwan kol tchare an pengre koola, un hidjran len ap pengro phik.

³⁵Un i Israelitarja kran pal i laba, hoi o Mose ap lende penas, un djan pash i Egiptarja un mukan pen lendar rupeno un sonakaskro koowa te dell, ninna shukar ripja.

³⁶Un o baro Dewel das i Egiptarjen an o dji, te wenn le kamles ap i Israelitarja, jaake te nai mangens le, hoi jon kaman. Un i Egiptarja dan len lauter. Jaake lan i Israelitarja kolendar lengro brawlepen krik un lan les lentsa.

³⁷Un i Israelitarja djan win dran o foro Ramses un djan pash o foro Sukkot. Kokres i mursha his 600.000 (shob-sheel-serja). Ninna lengre romja un tchawe his pashel.

³⁸Lentsa djan ninna bud menshe, kai his kek Israelitarja, ninna bud bud bakre, busja un grumja.

³⁹I Israelitarja mukan o them Egiptia jaake sik, te nai tchiwan le kek chapen penge khetne, te lan le les lentsa ap o drom. Kokres kol mare, hoi gar peklo his, lan le peha. Kolla mare, kai kek shutlo jarro dren hi, pekan le kanna.

⁴⁰Ko tsiro, kai i Israelitarja an o them Egiptia djiwan, his 430 (star-sheel-te-triin-deesh) bersha.

⁴¹Un har kal bersha trujel his, ap ko diwes, djan o baro Debleskre menshe win dran o them Egiptia.

⁴²Koja rat, kai o baro Dewel kokres ap lende garda das, te lell lo len win dran o them Egiptia, kaja rat hunte well o baro Debleske an hako bersh. An kaja rat hunte atchenn i Israelitarja pre, te sowenn le gar. Jaake sharenn le o baro Debles.

⁴³Un o baro Dewel rakras ap o Mose un ap o Aron: “Hako kopo, kai chan tumer o chapen, hoi kharella Passa, rikrenn tumen ap kal laba: Kek wi-themari chal kau chapen.

⁴⁴Hako ginlo budepaskro well tchinlo ap peskro mass. Palle nai chal lo ko Passa.

⁴⁵I wi-themari, kai djiwell jek tsiro pash tumende, kowa hunte chal gar ko Passa, witar kek budepaskro, kai budrell i lowenge tumenge.

⁴⁶Ko tselo mass well an o kheer chalo. Kek kotar mass hidjress tu win glan o wudar! Un kek kokale phagess tu!

⁴⁷I tsele Israelitarja hunte chan ko Passa.

⁴⁸Te djiwell i wi-themari pash tumende, kai kamell o baro Debleske o Passa te chal, palle hunte well hako mursh an leskri familja tchinlo ap peskro mass. Kowa te kras lo, palle well lo, un nai chal lo. Un job well har jek tumendar. Kowa, kai gar tchinlo hi ap peskro mass, kowa chal ko Passa gar.

⁴⁹Ko lab hi tumenge un kolenge dran wawar themma, kai mashkral tumende djiwenna.”

⁵⁰Har i tsele Israelitarja shunan, hoi o baro Dewel ap o Mose un ap o Aron penas, kran le les jaake har jon lenge penan.

⁵¹Un ap kau diwes anas o baro Dewel i tsele Israeleskre familjen win dran o them Egiptia, jek familja pal i wawar.