Read O Debleskro Drom - I Bibla an o Romano Rakepen 2021 2. Mose 16 Bible Online

2. Mose 16 - O Debleskro Drom - I Bibla an o Romano Rakepen 2021 bible

2. Mose 16

¹An o duito tchon, ap o deesh-te-pantchto diwes pal ko diwes, kai jon penge dran o them Egiptia djan, mukan le koi platsa Elim un djan dureder. Un i tsele Israelitarja wan an o mulo tato them Sin. Kowa hi mashkral Elim un i berga Sinai.

²Kote an o mulo tato them wan le chojedo ap o Moseste un o Aroneste.

³Un jon penan: “Wals feteder, te dals men o baro Dewel mulo an o them Egiptia, har hams beshdo pash i pirja pherdo mass, un kai his men doha maro, te nai cham men tchalo. Tumer anan men kate an o mulo tato them, te meras halauter i bokatar.”

⁴Kote rakras o baro Dewel ap o Moseste: “Me mukau tumenge maro dran o bolepen tele te perell. Pen i menshenge te djan le hako diwes win, te lenn le penge jaake bud, har jon an jek diwes nai chan. Jaake nai dikap me palla, te kamenn le tchatchepah pal miro lab te djiwell.

⁵Ap o shobto diwes lenn le dui kope jaake bud khetne har hako diwes un pekenn les.”

⁶Un o Mose un o Aron penan ap i tsele Israelitarja: “Kau diwes ap i rat dikenn tumer, te hi kowa o baro Dewel, kai las tumen win dran o them Egiptia.

⁷Un taissarlakro dikenn tumer o railepen o baro Deblestar. Job shunas, har tumer tumen ap leste choiran. Har choiran tumen ap mende, choiran tumen tchatchepah ap leste, gar ap mende. Hoi ham mer, te choirenn tumen ap mende?”

⁸Palle penas o Mose: “Ap i rat dell lo tumen mass un taissarlakro jaake bud maro, te wenn tchalo. O baro Dewel shunas, har choiran tumen ap leste. Koon ham mer? Gar ap mende choiran tumen, na-a, han chojedo ap o baro Debleste.”

⁹Un o Mose penas ap o Aroneste: “Pen ap i tsele Israelitarja: ‘Awenn glan o baro Debleste! Job shunas tumari choli.’”

¹⁰Har o Aron ap i tsele Israelitarja rakras, dikas hakeno kote, kai o mulo tato them hi. Un ap jek kopo was o railepen o baro Deblestar an i wolka diklo.

¹¹Un o baro Dewel rakras ap o Moseste un penas:

¹²“Me shunom, har chojedo i Israelitarja his. Rake ap lende un pen: ‘An i rat chan tumer mass. Un taissarlakro chan tumer tumen tchalo ap o maro, te dikenn, te hom me tumaro baro Dewel.’”

¹³Un har i rat was, wan pesse tchirkle, un wan tele ap i tseli platsa. Un taissarlakro his i phub sapeno trul i tseli platsa.

¹⁴Un har o kham was, un i phub buder gar sapeno his, his tikne sane kotja ap i phub tchiddo, hoi dikan win har tikne kotja djajedo pani.

¹⁵Kawa dikan i Israelitarja un penan jek ap o wawareste: “Hoi hi kawa?” Jon djinan gar, hoi kowa hi. O Mose penas ap lende: “Kawa hi ko maro, hoi o baro Dewel tumenge bitchras.

¹⁶Un kawa hi o lab o baro Deblestar, hoi hunte rikrenn: Hakeno lell jaake bud khetne, har job nai chala. I khoro jekeske an tumare familje.”

¹⁷Un jaake kran i tsele Israelitarja, un lan khetne, ko jek bud un ko wawar gar jaake bud.

¹⁸Har jon palla dikan, har bud hakeno khetne las, his koles, kai bud khetne las, gar budeder har les hunte wals. Un koles, kai gar bud khetne las, his ninna doha. Hakenes his jaake bud, har les hunte well chapaske.

¹⁹Un o Mose penas ap lende: “Kek tumendar hadell tchomone pre pral i rat.”

²⁰His sawe koi, kai shunan gar ap o Moseste un mukan tchomone pral o wawar diweske. Kowa was lauter khandlo, un kirme his dren. Un o Mose choiras pes pral lende.

²¹Un hako diwes taissarlakro djan le win un lan o maro khetne, jaake bud har jek nai chal. Pal i tsiro, har o kham tateder was, nashas kowa har pani.

²²Ap o shobto diwes lan le dui kope jaake bud maro khetne: dui khore jekeske. Un i tsele pralstune pral i Israelitarja wan pash o Moseste un penan kowa leske.

²³Un job penas ap lende: “Kawa hi, hoi o baro Dewel penas: Taissar hi i diwes, kai well kek budi kerdo. Kowa hi i diwes o baro Debleske, te well job sharedo. Kau maro, hoi kamenn te pekell, kowa pekenn! Kowa, hoi kamenn te kerell an o pani, kowa kerenn an o pani! Lauter, hoi pral atchella, hadenn pre i taissarlake!”

²⁴Kote hadan le pre o wawar diweske taissarlakro, jaake har o Mose penas. Un tchi khandas un kek kirmo was dren.

²⁵O Mose penas: “Chan les kau diwes! Kau diwes hi o baro Debleskro diwes. Kau diwes hatsenn tumer kek maro win.

²⁶Shob diwessa lenn tumen maro khetne! O eftato diwes hi o Debleskro diwes. Ap ko diwes dell kek maro.”

²⁷Har o eftato diwes was, his sawe koi, kai djan win, te lenn le maro khetne. Jon hatsan tchi.

²⁸Kote rakras o baro Dewel ap o Moseste: “Har rah krenn tumer kowa gar, hoi me tumenge penau, un djiwenn gar jaake, har me tumenge penom?

²⁹Dom me, o baro Dewel, tumen gar o Debleskro diwes? Doleske dau me tumen ap o shobto diwes doha maro, te nai chan les dui diwessa. Jaake atchell hakeno tumendar khere. Kek mukell ap o eftato diwes i platsa, kai lo khere hi.”

³⁰Jaake kran i tsele Israelitarja tchi ap ko diwes.

³¹Un i Israelitarja dan ko maro o lab ‘Manna’. Un job his har tikno parno djob, un latcho har i merkli, kai gwin[14] dren hi.

³²Un o Mose penas: “Kawa hi, hoi o baro Dewel menge penas, te kras mer: Jek khoro pherdo well pre hadedo mare menshenge, kai pal mende wenna. Jaake nai dikenn le o maro, hoi das lo men te chal an o mulo tato them, har anas lo men dran o them Egiptia.”

³³Un o Mose penas ap o Aroneste: “Le i khoro un tchip jaake bud Manna dren, har jek mursh ap jek diwes chal. Un tchip ko khoro glan o baro Debleste tardo, te dikenn les tumare tchawe, kai pal tumende wenna.”

³⁴Jaake har o baro Dewel o Moseske penas, tchiwas o Aron ko khoro glan o sonakaskro mochton[15], kai o Debleskre deesh laba dren hi, te atchell ko khoro koi.

³⁵Un i Israelitarja chan ko Manna star-deesh bersha, jaake rah bis te wan le pash ko them Kanaan.

³⁶Kowa, hoi hakeno ap jek diwes chas his i khoro pherdo. Kowa hi jaake dui litarja.