Read O Debleskro Drom - I Bibla an o Romano Rakepen 2021 2. Mose 29 Bible Online

2. Mose 29 - O Debleskro Drom - I Bibla an o Romano Rakepen 2021 bible

2. Mose 29

¹Un kowa kre, te well o Aron un leskre tchawe rashaja mange. Le i terno gurum[58] un dui mursh bakre, hoi sasto hi.

²Le ninna latcho jarro, tchip kek shutlo jarro dren, un kre pesse un sane mare, ninna merklia. An i merklia tchip djet dren, un ap i sane mare mak djet pre.

³Tchip len an i korba un an len o Debleske! Ko terno gurum un kol dui bakre an leske ninna!

⁴An o Arones un leskre tchawen pash o wudar glan o Debleskro plachteno kheer, un le pani un thob len!

⁵Palle le i koola un rib o Arones an: o gad un i baja, o rashajeskri damdira un i betcheskri possita ninna. Pande ko pereskro pandepen, hoi ap i damdira hi, trul leste!

⁶Palle tchip o shereskro pandepen trul leskro shero! Un tchip o tikno sonakaskro kotar glan ap koleste!

⁷Le o makepaskro djet un tchore les pral leskro shero, mak les o Debleske!

⁸Muk ninna leskre tchawe pash tute te well! Kolenge rib ninna i gada an!

⁹Palle tchip lenge o pereskro pandepen trujel un tchip i rashajengre stadja ap lengre shere, te wenn le mange rashaja hako tsireske. Un jaake aneh tu len an lengri budi:

¹⁰An ko terno gurum glan o Debleskro plachteno kheer. Un o Aron un leskre tchawe tchiwenn pengre wasta ap leskro shero.

¹¹Un tu mareh les pash o baro Debleskri chatchepaskri glan o Debleskro plachteno kheer glan o wudar.

¹²Tchip tiro gushto an o rat un mak les ap i shinga, hoi pral ap o Debleskri sasterni chatchepaskri[59] hi. Un o tselo wawar rat tchore tella glan o Debleskri chatchepaskri win!

¹³Le o tselo thulepen, hoi ap i buke hi un ko thullo kotar, hoi pral i lebra hi, un kol dui niere[60] un lengro thulepen, hoi ap lende hi! Kowa lauter chatchress tu ap o Debleskri sasterni chatchepaskri, te djal lauter an i jagakro ducho pre.

¹⁴O mass, i hauta un ko chapen, hoi an i buke hi, chatchress tu win glan koi platsa, kai tumer djiwenna. Kowa lauter well jaake kerdo, te well i rashajengri doosh krik lino.

¹⁵Palle le ko jek bakro! Un o Aron un leskre tchawe tchiwenn pengre wasta ap leskro shero.

¹⁶Palle mare les, le leskro rat un tchore les trul o Debleskri chatchepaskri win.

¹⁷Tchin o mass an kotja! Thob leskre buke un leskre herja, un tchip o shero un kol wawar kotja ap o Debleskri chatchepaskri!

¹⁸Un chatche o tselo bakro ap i chatchepaskri, jaake te djal lauter pre an i jagakro ducho. Ko bakro hi mange, o baro Debleske, un well tseles chatchedo. Un o latcho sungepen, hoi well win, sungell mange mishto.

¹⁹Le o duito bakro! Un o Aron un leskre tchawe tchiwenn pengre wasta ap leskro shero.

²⁰Palle mare les, le leskro ratestar un tchip les tella ap o Aroneskro tchatcho kand, ninna ap i tchatche kanda leskre tchawenge! Ninna ap o pesso gushto ap lengro tchatcho wast, un ap o baro tsebo ap lengro tchatcho piro tchiwess tu o rat. O tselo wawar rat tchoress tu trul o Debleskri chatchepaskri[61] win.

²¹Le ko ratestar, hoi ap o Debleskri chatchepaskri hi, un tchip les an o makepaskro djet un witse les ap o Aron un leskre koola un ap leskre tchawende un lengre koola, te well job un leskre koola o Debleske, ninna leskre tchawe un lengre koola, te wenn le o Debleske.

²²Kau duito bakro well doleske maredo, te nai well o Aron peskre tchawentsa an pengri budi dren tchiddo. Le o thulepen kai maredo bakrestar: i thulli pori, ninna o thulepen, hoi ap i buke hi un ko kotar, hoi pral i lebra hi un kol dui niere un lengro thulepen, hoi ap lende hi! Le ninna o pralstuno kotar i tchatchi herjatar.

²³Palle le jek pesso maro, ninna jek sano maro un jek djeteskri merkli dran koi korba, kai o maro dren hi, kai kek shutlo jarro dren hi, un hoi pash o wudar glan o baro Debleskro kheer tardo hi.

²⁴Tchip kowa lauter an o Aroneskre wasta un an i wasta leskre tchawendar. Un jon hadenn kowa pre glan mande, o baro Debleste, te sikrenn le, kai kowa mange hi.

²⁵Palle le les dran lengre wasta un chatche les pre ap o Debleskri chatchepaskri pral ko wawar bakro, hoi tu tseles chatchral, jaake te djal kawa lauter ninna pre an i jagakro ducho. Un o latcho sungepen, hoi well win, sungell mange, o baro Debleske, mishto.

²⁶Le o betch kau duito bakrestar, un hade les pre glan o baro Debleste, te sikress, kai kowa leske hi. Palle nai chah tu les.

²⁷Hako kopo, kai well i mursh mange i rashai, well o betch kau bakrestar un o pralstuno kotar i herjatar glan o baro Debleste pre hadedo, te sikrenn le, kai kowa o Debleske hi.

²⁸Kol dui kotja mass wenn pre hadedo glan mande, o baro Debleste. Palle nai chal len o Aron peskre tchawentsa. Un jaake well kowa kerdo hako kopo, kai marenn i Israelitarja i bakres mange, hoi chan le palle khetne glan mande.

²⁹Un i rashajengre koola, hoi o Aron riwas, lenn pal leste leskre tchawe ap ko diwes, kai wenn le rashaja.

³⁰Koon leskre tchawendar rashai wella, kowa riwell o Aroneskre koola an ap ko diwes, kai well lo rashai. Job hidjrell len an kol efta diwessa, kai djal lo an o Debleskro plachteno kheer, te budrell lo o Debleske.

³¹Ko mass ko duito bakrestar keress tu an pani ap i Debleskri platsa.

³²Palle chan o Aron un leskre tchawe o mass o bakrestar khetne o maro dran i korba pash o wudar glan o Debleskro plachteno kheer.

³³Jon kokres chan kol kotja mass ko viechestar, hoi maredo was, te well lengri doosh krik lino, te nai wenn le o Debleskre rashaja. Kek wawar nai chal ko mass, — kowa hi o Debleskro chapen.

³⁴Te atchell mass un maro pral i rati pral, hunte well kowa chatchedo. Kek nai chal les. Kowa hi o Debleskro chapen.

³⁵Jaake kress tu o Aroneha un leskre tchawentsa lauter, hoi me tuke penom. Efta diwessa kress tu jaake, te wenn le rashaja.

³⁶An kol efta diwessa maress tu hako diwes i terno gurum o Debleske, te well i doosh krik lino. Leskro rateha well i doosh krik lino, hoi ap o Debleskri chatchepaskri was. Palle mak djet ap o Debleskri chatchepaskri! Jaake well diklo, te hi kai chatchepaskri o Debleske.

³⁷Efta diwessa kress tu kawa hako diwes, te well i doosh ap o Debleskri chatchepaskri krik lino. Ninna makess tu koi chatchepaskri o djeteha dren, te well li o Debleske kokres un kek wawareske. Un hakeno, koon taprell lat an, kowa hi o Debleskro.

³⁸Un kawa hi, hoi tu hako diwes ap o Debleskri chatchepaskri chatchress: dui terne bakre, hoi jek bersh phuro hi,

³⁹ko jek bakro taissarlakro un ko wawar bakro ap i rat.

⁴⁰Le ninna i khoro latcho jarro un jek litari olivtikro djet, un tchore o djet an o jarro, un kre les khetne, un tchip kowa pash ko bakro pashel! Un le jek litari mool un tchore les win glan o Debleste!

⁴¹Kowa kre taissarlakro un rati ninna! Jaake aneh tu chapen un pipen o Debleske. Un o latcho sungepen, hoi well win, te well kowa lauter chatchedo an i jag, sungella mishto o baro Debleske.

⁴²An o tsiro, hoi wella, krenn jaake, tumer un tumare tchawe, hoi pal tumende wenna! Un denn man hako diwes taissarlakro un rati i bakro! Kowa chatchrenn glan mande pash o wudar glan o Debleskro plachteno kheer! Un kote wau pash tumende un rakrau tuha.

⁴³Kote wau pash i Israelitarja. Un miro railepen well mantsa an ko kheer. Un jaake well o kheer miro kheer.

⁴⁴Jaake lau miro plachteno kheer un i sasterni chatchepaskri mange, ninna o Arones un leskre tchawen, te wenn le mange rashaja.

⁴⁵Un me djiwau mashkral i Israelitarja un hom lengro Dewel.

⁴⁶Un jon dikenna, te hom me o baro Dewel, un lom len win dran o them Egiptia, te djiwap mashkral lende, me, lengro baro Dewel.