Read O Debleskro Drom - I Bibla an o Romano Rakepen 2021 2. Mose 30 Bible Online

2. Mose 30 - O Debleskro Drom - I Bibla an o Romano Rakepen 2021 bible

2. Mose 30

¹[62] Kre i bob dran o kasht ko rukestar, hoi kharella Akatsia. Koi pre well sawo koowa chatchedo, hoi o Debleske shukar sungella.

²Kre kau bob i paash metari lengsto un ninna jaake buchlo. Les hi star rigja, un kote, kai jon khetne wenna, well i kotar win un djal pre har i shing[63][64]. O tselo bob hi jek metari baro.

³Trul o tselo bob tchip latcho sonakai: pral pre un ninna ap i star rigja un ap i shinga. Un tchip i sonakaskro pandepen[65] trul o bob.

⁴Muk star sonakangre gustria te krell. Kolla wenn ap kol dui rigja o bobestar kerdo: ap haki rig dui sonakangre gustria tel ko sonakaskro pandepen, hoi djal trul o bob. An kol gustria wenn lengste kashta tchiddo. Kolentsa hidjrenn le o sonakaskro bob.

⁵Kre kol kashta dran akatstikro kasht un de sonakai trujel.

⁶Tchip o sonakaskro bob glan o wudar dran o kutch kotar than. Pal ko wudar hi o mochton, kai o Debleskre deesh laba dren hi, un kai o pralstuno kotar pre hi, hoi sikrella, kai o Dewel peskre menshenge latcho hi.

⁷Ap ko sonakaskro bob chatchrell o Aron ko kutch koowa, hoi o Debleske shukar sungella. Kowa krell lo hako diwes taissarlakro, te tchorell lo o djet an i momlia,

⁸ninna haki rat, te chatchell lo i momlia an. Un kowa well hako diwes mange kerdo. Ninna pash tumare tchawende un lauterende, kai pal lende wenna, well kowa jaake kerdo.

⁹Tumer chatchrenn tchi ap kau bob, hoi o Dewel tumenge gar penas, witar kek viecho un kek chapen dran jarro. Un kek mool well ap leste win tchoredo.

¹⁰Jek kopo an o bersh lell o Aron o rat o bakrestar, hoi maredo was, te lell lo i doosh krik, un djal pash o Debleskro sonakaskro bob un makell ko rat ap i shinga, hoi pral ap o bob hi. Kowa krell lo, te well i doosh krik lino, hoi ap o bob hi. Ninna pash tumare tchawende un kolende, kai pal lende wenna, well kowa hako bersh jek kopo jaake kerdo. O sonakaskro bob hi o baro Debleske kokres.

¹¹Un o baro Dewel penas ap o Mose:

¹²Dik, har bud mursha hi mank i Israelitarja! Un pen lenge, te hunte denn le man lowe, te atchenn le djido, te well kek bibacht ap lende an kol diwessa, kai wenn lengre laba pre tchinlo.

¹³Hako mursh, kai hi biish bersh un phureder, kowa dell man i paash kotar rup. Ko paash rupeno kotar hunte well jaake pharo har kolla an o Debleskro kheer: shob gramme pharo.

¹⁵O brawelo dell gar i bareder kotar, un o tchorwelo gar i tikneder kotar. Hako mursh dell i paash kotar rup o baro Debleske, te atchell lo djido.

¹⁶Un tu less kol lowe, hoi i Israelitarja tut denna, un dess len kolende, kai ap o Debleskro plachteno kheer budrenna. Jaake bistrau i Israelitarja gar un dikau latches ap lende, te atchenn le djido.

¹⁷Un o baro Dewel rakras ap o Moseste un penas:

¹⁸Kre i thopaskro tcharo dran lolo saster, un tchip les ap herja, hoi ninna dran lolo saster hi. Un tchip les mashkral o Debleskro plachteno kheer un o Debleskri sasterni chatchepaskri[66]. Un tchore pani dren,

¹⁹jaake te nai thowell o Aron un leskre tchawe pengre wasta un herja,

²⁰glan kowa kai djan le an o Debleskro plachteno kheer un pash o Debleskri sasterni chatchepaskri, te chatchrenn le i vieches o baro Debleske.

²¹Te thowenn le pen gar, hunte merenn le. Ko lab hi o Aroneske un leskre tchawenge un kolenge, kai pal lende wenna, hako tsireske.

²²Un o baro Dewel rakras o Moseha un penas:

²³Tu less i khoro olivtikro djet un tchiwess kutch sungepaskro koowa dren: shob kilo Myrrhe, triin kilo Zimto, triin kilo gudlo sungepaskro khass un shob kilo sungepaskro kasht, hoi kharella Kassia. Jek kilo hi jaake bud har jek kilo an o Debleskro kheer hi.

²⁵Kre kolestar i kutch djet, hoi maklo well ap o tselo koowa, hoi o Debleske hi. Muk les jekestar khetne te krell, kai kowa mishto haiwell.

²⁶Tu makess ko djet ap o Debleskro plachteno kheer, ap ko mochton, kai o Debleskre deesh laba dren hi,

²⁷ninna ap i chapaskri un ap o tselo koowa, hoi koi pre hi, ninna ap i momelengri un lauter, hoi koi pashel hi. Ninna ap o Debleskro sonakaskro bob, kai kutch sungepaskro koowa pre chatchedo wella, well ko djet maklo,

²⁸ninna ap o Debleskri sasterni chatchepaskri, kai i vieche o Debleske chatchedo wenna, un ap kol tsele koola, kolentsa budrenn le. Mak ninna o thopaskro tcharo, un leskre herja, hoi les hidjrenna.

²⁹Te makeh len jaake, sikreh tu, kai hi le o Debleske, un leske kokres. Un hakeno, koon taprell len an, hi o Debleskro.

³⁰Jaake kress kowa ninna o Aroneha un leskre tchawentsa. Mak len o djeteha, te wenn le rashaja mange.

³¹Ap i Israelitarja pen: Ko djet hi o Debleskro djet. Lenn les kokres te makenn i rashaja mange. Ma makenn les ap i wawar mensheste. Un ma krenn tumenge i djet, hoi ninna kowa lauter dren hi har an kawa djet. O Debleskro djet atchell lo. Rikrenn tumen ap kowa hako tsiro, tumer un tumare tchawe, hoi pal tumende wenna.

³³Koon peske sawo djet krella, nai atchell gar djido mank peskre menshende. Temerl dino well ninna kowa, kai makell jekeste, kai hi kek rashai.

³⁴[67] Un o baro Dewel penas ap o Mose: Le tuke ko kutch koowa, hoi mishto sungella: rukengro djet[68], Onycha[69], burrengro djet[70], ninna djudjo sungepaskro koowa, hoi kharella Weihrauch. Hakenestar le jaake bud har ko wawarestar!

³⁵Un tchip kowa jaake khetne, har kolla krenna, kai kowa mishto haiwenna, te well lestar i sungepaskro koowa, hoi chatchedo well o Debleske. Tchip ninna loon koi pashel, te well ko koowa djudjo. O Debleske hi lo.

³⁶Palle kre les tiknes, jaake tiknes har djala, un tchip ninna lestar glan ko mochton, kai o Debleskre deesh laba dren hi, an o Debleskro plachteno kheer, kote, kai wau me pash tute. Denn jak! Kau sungepaskro koowa, hoi tumer o Debleske kran, hi leske kokres!

³⁷Ma krenn sawo koowa tumenge. Shunenn, mange kokres hi kowa!

³⁸Koon sawo koowa peske krella, te nai sungell lo o shukar sungepen, kawa nai atchell gar djido mank peskre menshende.