Read O Debleskro Drom - I Bibla an o Romano Rakepen 2021 2. Mose 38 Bible Online

2. Mose 38 - O Debleskro Drom - I Bibla an o Romano Rakepen 2021 bible

2. Mose 38

¹Un job kras i sasterni chatchepaskri[86], kai wenna vieche o Debleske chatchedo. Job kras lat dran akatstikro kasht, dui-te-paash metarja lengsto un ninna jaake buchlo un jek-te-paash metari pral. Pral i tseli chatchepaskri was lolo saster dino. Ap haki pralstuni ekka was i shing[87] win. Kol shinga wan kerdo dran jek kotar kasht har i chatchepaskri.

³Un job kras kol tsele koola dran lolo saster, kolentsa budrenn le ap i sasterni chatchepaskri: i pirja, an kolende i jagakri tchik dren wella, bare roja, tchare, kai o rat dren wella, massengre forshette[88], jagakre tchare.

⁴Un job kras i netsa dran lolo saster, hoi was tella jaake an i sasterni chatchepaskri[89] tchiddo, te djal li paash pre har i sasterni chatchepaskri.

⁵Ap lakre star rigja, kote, kai i rigja khetne wenna, tchiwas lo star gustria dran lolo saster, te wenn an lende lengste kashta tchiddo.

⁶Kolla kras lo dran akatstikro kasht, tchiwas lolo saster trul lende,

⁷un tchiwas len an i gustria jaake, te nai hidjrenn le koi sasterni chatchepaskri. An late his tchi dren.

⁸Un job kras o thopaskro tcharo dran lolo saster un tchiwas les ap herja, hoi ninna dran lolo saster hi. Ko lolo saster las lo dran kol blendarja[90], hoi dan les kol djuwja, kai pash o wudar glan o Debleskro plachteno kheer pengri budi kran.

⁹Un jon kran kol laintikre kotja dran latcho sorelo than, hoi wenn trul koi platsa pandlo, hoi hi glan o Debleskro kheer. Ninna kran le kol pesse kashta, mank kolende kol laintikre kotja pandlo wenna. Ap koi rig, kai o kham pralstunes hi, hi koi platsa paash-sheel metarja baro. Kate rikrenn biish pesse kashta kol laintikre kotja. Kal pesse kashta wenn tardo ap biish herja dran lolo saster. I rikepangre un kol shelle, hoi rikrenn i laintikre kotja, kran le dran rup.

¹¹Koi rig, kai o kham gar wella, hi jaake baro har koi rig, kai o kham pralstunes hi: paash-sheel metarja lengsto. Ninna kate rikrenn biish pesse kashta kol laintikre kotja. Kal pesse kashta wenn tardo ap biish herja dran lolo saster. I rikepangre un kol shelle, hoi rikrenn i laintikre kotja, kran le dran rup.

¹²Ap i rig, kai o kham tele djal, hi koi platsa biish-te-pantch metarja buchlo. Kote wenn i laintikre kotja ap deesh pesse kashta rikedo, hoi ap deesh herja tardo wenn. I rikepangre un i shelle, hoi rikrenn i laintikre kotja, kran le dran rup.

¹³Ninna glan o kheer, ap i rig, kai o kham pre djala, hi i platsa biish-te-pantch metarja buchlo.

¹⁴Mashkral hi i wudar. Ap koi jek rig hi efta-te-paash metarja: kote wenn triin pesse kashta tardo ap triin herja. Ap koi wawar rig hi ninna efta-te-paash metarja: Kote wenn ninna triin pesse kashta tardo ap triin herja.

¹⁶I tsele laintikre kotja his dran latcho sorelo laintikro than.

¹⁷Un i herja tel kol pesse kashta his dran lolo saster. Un i rikepangre un shelle, hoi rikrenn i laintikre kotja, his dran rup. Un i pesse kashta, len his shere, kai rup trul tchiddo his.

¹⁸Un koi bari plachta, hoi well pandlo an o wudar glan i glanstuni platsa kran le an shukar wastengri budi dran latcho sorelo laintikro than, kai ninna kutch bakrengro bal dren hi. Kowa his blaueto un lolo un lolo har jag. Koi plachta his deesh metarja lengsto un dui-te-paash metarja baro, jaake baro har ninna i wawar laintikre kotja hi, hoi trul i platsa pandlo wenn.

¹⁹Koi pashel kran le star pesse kashta un star herja dran lolo saster, ninna rupene rikepangre un rupene shelle, hoi rikrenn koi bari plachta. I pesse kashta, len hi shere, kai rup trul tchiddo his.

²⁰Ninna kol tikne kotja his dran lolo saster, hoi denn le an i phub, te well o plachteno kheer un i plachte trul i platsa soreles rikedo.

²¹O Bezalel, — leskro dad his o Uri un leskro papo o Hur, dran o kheer Juda — job kras koi tseli budi jaake, har o baro Dewel kowa o Moseske penas. Un o Oholiab, — leskro dad hi o Ahisamach, dran o kheer Dan — job was leske pash o wast. Un peskre wastentsa kras lo shukar koowa dran lolo saster, sonakai, rup un kasht. Ninna haiwas lo mishto latcho laintikro than te krell, un siwas shukar koowa dran kutch bakrengro bal dren, hoi blaueto, lolo un lolo har jag his. O Mose penas ap o Itamar, ko tchawo o rashajestar Aron: “Pen ap i Levitarja, te tchinenn le lauter an i liil, hoi i Israelitarja khetne tchiwan, te krenn le o Debleskro kheer, — ko kheer, kai o Debleskre deesh laba dren hi.”

²⁴Ko sonakai, hoi jon pendar dan, his budeder har 29 (biish-te-enja) zentnarja. Jek zentnari his jaake bud har jek zentnari an o Debleskro kheer pharo his.

²⁵Ko rup, hoi was khetne, har an i liil tchinlo was, har bud mursha koi hi, ko rup his budeder har 100 (sheel) zentnarja. Jek zentnari his jaake bud har jek zentnari an o Debleskro kheer pharo his.

²⁶I tsele mursha, kai phureder his har biish bersha, his 603.550 (shob-sheel-te-triin-serja-pantch-sheel-te-pantch-desha) mursha. Hakeno lendar das i paash rupeno kotar. Jek paash kotar rup his jaake bud har jek paash kotar rup an o Debleskro kheer pharo his.

²⁷Sheel zentnarja rup lan le un kran lestar kol sheel herja, ap kolende i tchinle kashta tardo wenna, ninna kolla, kai rikrenn o wudar dran o kutch kotar than. Haki rupeni heri his jek zentnari pharo.

²⁸Ko rup, hoi pral atchas, his jaake deesh-te-triin kilogramme. Kolestar kran le i gustria un i shelle, hoi i laintikre kotja rikrenna. Ninna tchiwan le les trul i shere kol pesse kashtendar.

²⁹Ko lolo saster, hoi i menshe pendar dan, his budeder har efta-desha zentnarja.

³⁰Kolestar mukas o Bezalel kol herja te krell, ap kolende i pesse kashta tardo hi, hoi hi serwes un tchatches pash o wudar. Ninna kran le kolestar koi sasterni chatchepaskri[91] un koi sasterni netsa, hoi koi pashel hi, un i tsele koola, kolentsa i rashaja budrenna.

³¹Dran o lolo saster kran le ninna i herja, ap kolende i pesse kashta trul i glanstuni platsa tardo wenn, ninna i herja tel i pesse kashta pash o wudar glan i glanstuni platsa, un ninna i tsele tikne kotja, hoi wenn an i phub dino, te rikrenn le soreles ko kheer un kol laintikre kotja trul i glanstuni platsa.