Read O Debleskro Drom - I Bibla an o Romano Rakepen 2021 Hiob 1 Bible Online

Hiob 1 - O Debleskro Drom - I Bibla an o Romano Rakepen 2021 bible

Hiob 1

¹An o them Uz djiwas i mursh, kowa kharas Hiob. Job his an o tchatchepen tardo, un kek doosh his ap leste. Job mangas o Debles an, un rikras pes dur krik o tchilatchepastar.

²Un les his efta mursh tchawe un triin tcha.

³Ninna his les bud vieche: 7.000 (efta-serja) bakre un 3.000 (triin-serja) khamele, un jek serja grumja, kolendar hako kopo dui khetne budran, un 500 (pantch-sheel) djuwelkane burike[1]. Un les his bud bud budepangre. Kek mensho his brawleder har o Hiob an ko them, hoi hi kote tchiddo, kai o kham pral djal.

⁴Un leskre mursh tchawe, hakeno lendar, kras i baro chapen an peskro kheer ap peskro diwes. Un jon mukan pengre triin phenjen te well, te chan un pijenn le khetne.

⁵Un har kol diwessa trujel his, kai le chan un pijan, palle bitchras o Hiob pash lende, te wenn le pash leste. Un job stas sik taissarlakro pre, un maras hakeneske lendar i viecho, un chatchras les o Debleske, te well lengri doosh krik lino. Job penas peske: Nai djals, te lan mire mursh tchawe doosh ap pende, un rakran djungeles pral o Debleste an pengre djia. Un jaake kras o Hiob pal hako baro chapen, hoi leskre mursh tchawe kran.

⁶Un was i diwes, kote wan i tsele bolepangre pash o baro Debleste khetne, un tchiwan pen tardo glan leste. Ninna o beng his mashkral lende.

⁷Un o baro Dewel putchas o benges: “Kai weh tu?” Un o beng penas ap o baro Debleste: “Wau i phubjatar. Kote djom trujel.”

⁸Un o baro Dewel putchas o bengestar: “Dal tu ninna jak ap miro budepaskro, o Hiob? Kek wawar hi ap i phub, kai hi jaake har kowa. Job hi an o tchatchepen tardo, un kek doosh hi ap leste. Job mangell man an, un rikrell pes dur krik o tchilatchepastar.”

⁹Un o beng penas ap o baro Debleste: “Patseh, te mangell lo tut tchitcheske an?

¹⁰Tu deh jak ap leskro kheer un ap lauter, hoi les hi. Tu tchiwal tiri bacht ap lauter, hoi job an-taprell. Un leskre vieche wan bud un budeder an o tselo them.

¹¹Hoi hi, te leh tu lestar krik, hoi leskro hi? Tchatchepah palle praassell lo tut!”

¹²Kote penas o baro Dewel ap o beng: “Mishto! Halauter, hoi les hi, dau an tiro wast. Les kokres ma tape an!” Pal kowa djas o beng krik o baro Deblestar.

¹³Ap jek diwes his o Hiobeskre tchawe khetne an o kheer kolestar, kai o phureder lendar hi. Un jon chan un pijan mool khetne.

¹⁴Kote was i bitchepaskro pash o Hiob un penas: “I grumjentsa rissram i phub trujel, un i burike chan kote pash lende.

¹⁵Kote peran kolla dran o them Saba pral mende, un randan i viechen un dan tire budepangren o chareha mulo. Un me nai nashom, me kokres, te nai penap kowa tuke.”

¹⁶Ko budepaskro rakras gomme, koi was i wawar un penas ap o Hiob: “Jag dran o bolepen peras tele, un chatchras i bakre un i busja un tire budepangre, kai ap lende jak dan. Un me nai nashom, me kokres, te penap kowa tuke.”

¹⁷Har ko budepaskro gomme rakras, was i wawar un penas: “I Kaldearja wan ap triin rigja un peran pal tire khamele dren un lan len penge krik, un dan tire budepangren o chareha mulo. Un me nai nashom, me kokres, te nai penap kowa tuke.”

¹⁸Kowa rakras gomme, koi was i wawar un penas: “Tire mursh tchawe un tire tcha his pash o chapen beshdo, un pijan mool an o kheer pengro phureder phralestar.

¹⁹Koi was i phurdepen dran o mulo tato them un das ap ko kheer ap leskre star rigja. Un ko kheer peras khetne pral kol terne menshende. Un jon meran. Un me nai nashom, me kokres, te nai penap kowa tuke.”

²⁰Kote stas o Hiob pre, un sorjah tserdas lo peskre pralstune koola pestar tele, un kras len paash, jaake bud dukas leskro dji. Job tchinas peskre balla tele, mukas pes ap i phub te perell un mangas o Debles an.

²¹Un job penas: “Har boldo wom, his kek koola ap mande. Un ap ko diwes, kai merau, lau kek koola mantsa. O baro Dewel das man lauter, hoi man hi. Un o baro Dewel las les pale mandar. Job well sharedo!”

²²Ninna te was kowa lauter jaake, anas o Hiob kek doosh ap peste, un witsras o Debleske kek tchilatchepen glan.