Read O Debleskro Drom - I Bibla an o Romano Rakepen 2021 Hiob 10 Bible Online

Hiob 10 - O Debleskro Drom - I Bibla an o Romano Rakepen 2021 bible

Hiob 10

¹Kamau buder gar te djiwell. Doleske rikrau miro ropen ninna gar pale, un rakrau jaake, har miro dukedo dji mange penell.

²Me penau ap o Debleste: Ma pen: Doosh hi ap tute! Pen mange, hawi doosh tu ap mande hatsal?

³Hoi aneh kawa tuke, te rikreh man sorjah tele? Hoske witsreh man tutar krik, man, koles tire wasta kran, un mukeh kowa mishto te djal, hoi lan pen i tchilatche glan?

⁴Hi tut mensheskre jaka? Dikeh tu jaake har i mensho dikell?

⁵Hi tiro djipen jaake tikno har i mensheskro djipen? Djan tire bersha jaake sik trujel har i menshengre bersha?

⁶Hoske rodeh doosh ap mande, un dikeh palla, hawo tchilatchepen krom?

⁷Tu djineh, te hi ap mande kek doosh, un te hi kek koi, koon nai lell miro djipen dran tiro wast win.

⁸Tu kral man tire wastentsa, lauter ap mande hi tutar kerdo; un kanna chah tu man pre!

⁹Ma biste, te kral man dran tchik. Kameh tu kanna, te wap pale tchik?

¹⁰Tu kral, te was miri dai mantsa wawartchandes, un kral, te wom me i tikno mensho an late.

¹¹Tu dal man kokale un muskle, pandal len khetne, un tchakral mass un hauta pral lende.

¹²Tu dal man djipen un kral latchepen ap mande, un dal mishto jak ap miro djipen.

¹³Ninna te his jaake, djinau, khatedo an tiro dji his tut tchomone wawar mantsa glan:

¹⁴Tu kamal jak ap mande te dell, te dikess, te loms me doosh ap mande. Palle kamal miri doosh ap mande te mukell.

¹⁵Te lom doosh ap mande, djal mange djungelo! Ninna te lom kek doosh ap mande, hunte rikrap miro shero tele. Miri ladjatar un miri dukatar hom har mato.

¹⁶Te hadau miro shero pre, palle leh tu man palla, har te wals i lewo, un sikreh tiri bari soor, te dukress man.

¹⁷Tu tchiweh menshen pre tardo, kai tchomone ap mande pre anenn. Un tiri choli ap mande well gomme bareder. Un tu bitchreh jek phagi pral i wawar ap mande.

¹⁸Hoske mukal man boldo te well? Hoske mukal tu man gar glan kowa te merell? Palle dikals man kek!

¹⁹Mange wals feteder, te woms har kolla, kai wan mules boldo, un paskedo.

²⁰Kol diwessa, hoi man gomme hi, hi buder gar bud. Muk mandar tele, dik krik mandar, te nai wap i tikno tsiro gomme bachtelo,

²¹glan te djau koi, kai wau buder gar pale — an o tamlo them, kai hako tsiro kali rat hi

²²awa, an ko them pherdo tamlepen un kali rat, kai lauter diwjes trujel tchiddo hi, un kai ninna i momeli tamlo hi.