Read O Debleskro Drom - I Bibla an o Romano Rakepen 2021 Hiob 11 Bible Online

Hiob 11 - O Debleskro Drom - I Bibla an o Romano Rakepen 2021 bible

Hiob 11

¹Pal kowa rakras o Zofar dran o them Naama un penas ap o Hiob:

²Patseh, te nai penah mer tchi pale ap kau bud rakepen? Sikrenn bud laba, te hi jek an o tchatchepen?

³Tiro tselo rakepen nai rikrell men gar pale, te kras mer maro mui pre. Te rikreh men dineleske, patseh, te tchingras gar tuha?

⁴Tu penal: “Kowa hoi me rakrom, hi halauter tchatcho. Me hom djudjo glan o Debleskre jaka.”

⁵Kamoms, te krals o Dewel kanna peskro mui pre un rakrals kokres ap tute!

⁶Job djinell halauter pral halauter. Kamoms, te sikrals lo tute peskro goswepen, hoi menge khatedo hi. Palle hunte haiwess, te dikell o Dewel pral bud doosh tutar pral wergel!

⁷Patseh, te djineh halauter, hoi an o Debleskro dji hi? Nai haiweh tu, har baro o sorelo Dewel hi?

⁸O Debleskro goswepen hi dureder har o bolepen hi, un dureder tele har o mulengro them. Kowa hi bareder har i phub un buchleder har o baro pani. Tu nai haiweh un djineh gar halauter!

¹⁰Te well job un pandell jekes, un anell les glan i tsillo, te krell lo o tchatchepen pral leste win, koon nai rikrals les pale?

¹¹Job djinell, koon i tchi-molde hi, un dikell o tchilatcho koowa, hoi le krenn. Kowa hi gar khatedo glan leste.

¹²Nai well kowa gosewo, koles tchi an o shero hi? Jaake rah gar, har i burika kek menshes ap i phub anell!

¹³Tu, Hiob, hunte rissress tut tiri tseli sorjah pash o Debleste, un hadess tire wasta pre leske.

¹⁴Te kral tchilatchepen, muk tele kolestar, te well kek tchilatchepen an tiro kheer hatslo.

¹⁵Palle nai hidjreh tu tiro shero pre, un hunte ladjess gar. Palle hal soreles tardo un dareh tchi.

¹⁶Tiri bibacht nai bistreh. Te well li tuke an tiro shero, hi li har pani hoi krik nashas.

¹⁷Un pral tiro djipen djal o kham pre, un hi sorelo har mashkral diwes. Ninna te hi kanna tamlo, well i newo diwes.

¹⁸Un tiro dji lell pale newi soor un djineh, lauter well mishto. Rati dikeh tut trujel, un tchiweh tut pale tele kek darjah.

¹⁹Un tu hal tchiddo, un kek well pral tute, un krell tut traash. Un bud wenna, kai mangenn tutar, te kress lenge latchepen.

²⁰I tchilatche haiwenn gar, hoske lenge djungeles djal, un hatsenn gar win dran lengri bibacht. Lenge atchell tchi har te dikenn le ap ko diwes, kai merenn le.