Read O Debleskro Drom - I Bibla an o Romano Rakepen 2021 Hiob 12 Bible Online

Hiob 12 - O Debleskro Drom - I Bibla an o Romano Rakepen 2021 bible

Hiob 12

¹Koi rakras o Hiob un penas:

²Tchatchepah, tumer han kolla, ap kolende hakeno hunte shunals! Tumentsa merell o goswepen win!

³Me ninna hom jaake gosewo har tumer. An tchi krenn tumer mange tchomone glan. Hakeno djinell kowa, hoi tumer penan.

⁴Hoske wom mire malenge sapaske? Me dom gole ap o Debleste, un job shunas man. Ninna te hom an o tchatchepen tardo un djau o tchatcho drom, sanenn le man win.

⁵Kolla, kai lenge mishto djal, dikenn tele ap koleste, kai an i bibacht hi, un stakrenn kolen gomme, kolengre herja trissenn.

⁶I khera kolendar, kai i wawaren sorjah tele rikrenn, hi soreles tardo. Un kek krell kolenge daar, kai krenn sawo koowa te well o Dewel chojedo, Jon patsenn, te hi len o Dewel an pengro wast.

⁷Putch i viechen un i tchirklen, hoi djinenn le pral o Debleste. Un jon penenn les tuke.

⁸Putch ninna i tikne viechen ap i phub, un i matche an o baro pani, un jon penenn les tuke.

⁹Koon hi kowa, kai djinell gar, te kras o baro Debleskro wast kowa lauter?

¹⁰An leskro wast hi o djipen halauterestar, hoi djiwella, ninna o djipaskro ducho i tsele menshendar!

¹¹Te shunell i mensho, hoi rakedo well, putchell lo pes gar, hoi tchatcho un hoi gar tchatcho hi? Kowa hi jaake har peskro mui djinell, hawo chapen latcho un hawo chapen gar mishto hi.

¹²Phure menshen hi goswepen. Kolla, kai bud bersha djiwan, haiwenn bud.

¹³O Debles hi goswepen un ninna soor. Job haiwell halauter, un nai penell, hoi te well kerdo.

¹⁴Kowa, hoi job tele phagas, nai tchiwell kek pale pre. Kones job dren pandas, koleske nai krell kek pale pre.

¹⁵Rikrell job o brishin pale, well o tselo them truk. Mukell lo bud brishin te perell, tchakrell bud pani o them, un krell les paash.

¹⁶Pash leste hi i soor un o tchatcho goswepen. Les hi ninna i soor pral koleste, kai perell o tchatcho dromestar tele, un pral koleste, kai anell les o tchatcho dromestar tele.

¹⁷Kol pralstune, hoi i rajenge penenn, hoi te krenn le, kolendar lell lo lengro goswepen krik, un krell i tchatchepangre rajen dinelo.

¹⁸I pandlen kol bare rajendar anell lo dran o pandepen win, un anell i bare rajen an o pandepen.[10]

¹⁹I rashajenge lell lo lengre rashajengre ripja[11] krik, un i sorelenge lengri soor pral i wawarende.

²⁰Kolla, kai nai rakrenn latches glan i wawarende, kolenge lell lo i laba krik, un i phurentsa krell lo, te djinenn le buder gar hoi tchatcho hi un hoi gar tchatcho hi.

²¹Bari ladj anell lo ap i an-dikle pralstunende. Un i sorelendar lell lo lengro kurepaskro koowa krik.

²²Job anell kowa glan, hoi khatedo his an o kalo telstunepen, un krell, te well o tamlepen diklo.

²³Job krell, te wenn i natsjone baro, un ninna, te wenn le pale tikno. Un job dell i menshen i baro them, un tradell len pale kote win.

²⁴Job krell, te wenn lengre raja dinelo, un krell, te nashenn le trujel kote, kai kek drom hi.

²⁵Har korele rikrenn le pengre wasta win, te hatsenn le pengro drom an i kali rat, kai kek momeli hi, un har i mate nashrenn le pen.