Read O Debleskro Drom - I Bibla an o Romano Rakepen 2021 Hiob 13 Bible Online

Hiob 13 - O Debleskro Drom - I Bibla an o Romano Rakepen 2021 bible

Hiob 13

¹Kawa lauter dikan mire jaka, un shunan mire kanda. Un me haiwom les.

²Jaake bud har tumer djinenn, djinau me ninna, An tchi krenn tumer mange tchomone glan.

³Gar tumentsa, na-a, o sorelo Debleha kamau te rakrell. glan leste kamau miro koowa glan te anell.

⁴Tumer tchakrenn o tchatchepen o chochepah, han dramangre, kai tchi-moldo hi, — tumer halauter.

⁵Kamoms, te rikrans tumare muja! Palle dikans jaake win, har te wans gosewo.

⁶Shunenn mishto, har me miro koowa glan anau! Un denn jak, hoi miro mui penell!

⁷Kamenn tumer o Debleske te chochell, un chochepen te rakrell, te well lo an o tchatchepen?

⁸Kamenn tumer tumen ap leskri rig te tchiwell? Kamenn tumer leske mantsa an o tchingepen te djal?

⁹Patsenn tumer, te djal kowa tumenge mishto, te lell lo tumen an o jak?[12] Mukell lo pes tumendar te chochell, har te wals lo i mensho?

¹⁰Te tchiwenn tumer tumen tchorchanes ap leskri rig, tchatchepah, palle sikrell lo tumen i sorelo rakepah, te hunte well kowa gar jaake kerdo.

¹¹Te hadell lo pes, taprell tumen i traash! Un bari daar mukell lo ap tumende te perell.

¹²Tumaro gosewo rakepen hi gar budeder moldo har jagakri tchik. Kowa hoi tumer kate glan anenn, rikrell gar feteder har khera dran tchik.

¹³Rikrenn tumare muja, un mukenn man te rakrell! Un kowa, hoi palle pral mande well, mu well lo!

¹⁴Hoske rikrap ap miro djipen? Me dau gar jak ap miro djipen.

¹⁵Mu marell lo man, man hi tchi te nashrell. Me djom tchatche dromma; un kowa kamau me leske an o mui te penell.

¹⁶Te wap me glan leste, sikrell kowa, te hi kek doosh ap mande. Kek dui djijentsa well glan leste.

¹⁷Shunenn mishto, hoi penau! Denn jak ap hako lab!

¹⁸Me anom kawa pre, te well win kerdo, hoi o tchatchepen hi. Me djinau, te hi man tchatcho.

¹⁹Koon hi, kai nai sikrell, te hi i doosh ap mande? Palle kamaus miro mui te rikrell, un te merell.

²⁰Miro Dewel, kal dui koowa kre mantsa, palle khatrau man ninna gar glan tire jaka:

²¹Le tiri phagi mandar krik, kre mange buder gar daar un traash!

²²Palle de ap mande gole, un me dau pale gole. Oder muk man tut te putchell, un tu peneh mange pale!

²³Har bud doosh lom me ap mande? Hawo tchilatchepen krom me? Muk man te djinell, kai me tiro dromestar tele djom, un krom, hoi tu gar kameh!

²⁴Hoske khatreh tu tiro mui glan mande? Hoske rikreh man jekeske, kai kamell tuke tchilatchepen te krell?

²⁵Hoi hom me? — I patri, hoi o rukestar tele phurdedo was, un i kotar phuss, hoi i ducho krik hidjrell. Hoske kreh mange daar un leh man palla?

²⁶Tu aneh djungelo koowa ap mande pre un tchineh les an i liil. Ninna koi doosh, hoi anom ap mande, har terno homs, aneh tu ap miro shero pale.

²⁷Mire herja tchiwal an shelle, un deh jak ap hako drom mandar, un leh mire pire an o jak, kai le djan.

²⁸Jaake perau khetne har phuro kasht, har kol ripja, kolen i kirme paash chan.