Read O Debleskro Drom - I Bibla an o Romano Rakepen 2021 Hiob 14 Bible Online

Hiob 14 - O Debleskro Drom - I Bibla an o Romano Rakepen 2021 bible

Hiob 14

¹O mensho, boldo i djuwjatar, djiwell i tikno tsiro, un marell pes tele peskro tselo djipen.

²Har i bluma well lo baro un merell tele. Jaake har i shatto, hoi well buder gar diklo, te djal o kham tele, hi lo buder gar.

³Un sawo hom me. Un tu leh man an o jak, un aneh man glan i tsillo, te kress o tchatchepen win pral mande.

⁴I tsele menshen hi doosh ap pende. Har nai well lendar jek, koles kek doosh ap peste hi?

⁵Tu penal, har phuro i mensho well, kitse tchonna job djiwell. Un penal, ap hawo diwes leskro djipaskro tsiro trujel hi.

⁶Palle dik lestar krik, muk les kokres, te nai krell lo peskro diweskri budi!

⁷Te dell jek i ruk tele, hi leske gar lauter trujel. Dran leste nai wenn pale newe tikne kashta win, un wenn bud un budeder.

⁸Ninna te wenn leskre draba phuro an i phub, un o telstuno kotar merell tele an i tchik,

⁹te perell pani ap leste, well lo pale senelo, ninna te hi kowa gar bud pani. Un newe tikne kashta wenn dran leste, har te wals lo i terno ruk.

¹⁰Merell i mursh, hi lo buder gar. Kek ducho atchell an leste. Kai hi lo?

¹¹Dran o baro pani nashell o pani win. Un o lengsto pani nashrell bud un budeder pani, bis te hi lo truk.

¹²Jaake hi ko mensho, kai tchiwell pes tele un merell. Job stell gar buder pre. Jaake rah har o bolepen koi hi, well lo buder gar djangelo, un kek djangrell les pre dran peskro sopen.

¹³Har kamoms, te khatress tu man an o mulengro them, te pandess man kote dren, bis te tiri choli trujel hi. Kamoms te mukals man jek tsiro koi, un palle woms tuke pale an o shero!

¹⁴Te merell i mensho, well lo palle pale djido? Palle bistroms, har djungeles mange kanna djal, un dikoms ap ko tsiro, kai mange feteder djal.

¹⁵Tu dals ap mande gole, un me shunaus un daus pale gole. Un tiro dji nashals pal mande, koles tu tire wastentsa kral.

¹⁶Tu dals jak ap mire dromma, dals gar jak, hawi doosh me ap mande laus!

¹⁷Ko tchilatchepen, hoi krom, pandals khetne har an i possita. Koi doosh, hoi ap mande lom, tchakrals tu, te well li buder gar diklo.

¹⁸I berga nai phagell an peste khetne, un i baro bar hi buder gar koi, kai lo his.

¹⁹O pani thowell i barra jaake rah tele, bis te tchi lendar atchell. Jaake har hidjrenn sorele panja i tchik krik, jaake leh tu kowa krik, hoi i mensho glan-wi dikell peskro djipaske.

²⁰Tu witsreh les tele, te stell lo buder gar pre. An o merepen hi leskro mui buder gar shukar. Tu bitchreh les krik — job well buder gar pale.

²¹Te wenn leskre tchawe an-dikle menshe, job djinell kowa gar. Te well tele diklo ap lende, job haiwell kowa gar.

²²Kokres peskro mass dukrell les. Un les hi ropaske trul peste kokres.