Read O Debleskro Drom - I Bibla an o Romano Rakepen 2021 Hiob 15 Bible Online

Hiob 15 - O Debleskro Drom - I Bibla an o Romano Rakepen 2021 bible

Hiob 15

¹Koi penas o Elifas dran o them Teman ap o Hiob:

²Te wals tchatchepah gosewo, rakrals gar sawe pre-phurde laba! Kawa, hoi tu kate rakreh, hi tchi har i tato ducho.

³Tu rakreh tuke sawe labentsa, hoi kekeske mishto hi. Tiro rakepen hi tchi moldo.

⁴Tchatchepah, tu kreh har te wals o patsepen ap o Debleste tchi moldo, un kreh, te mangell les buder kek an.

⁵Pal bud laba khatreh tiri doosh, un rakreh har i chocheno rakrell.

⁶Hi tiro mui, hoi penell, te hi doosh ap tute. Me hunte penap kowa gar. Hako lab, hoi rakreh, sikrell kowa.

⁷Hal tu o ersto mensho, kai boldo was? Hals tu koi, har kras o Dewel i berge?

⁸Hals tu pashel, har o Dewel peskre bolepangre khetne his, un shunal, hoi kote rakedo was? Patseh, te hal tu kokres gosewo?

⁹Hoi djineh, hoi mer gar djinah? Un hoi haiwal, hoi mer gar haiwam?

¹⁰Mank mende hi ninna phure mursha, mursha parne ballentsa, kai phureder wan har tiro dad.

¹¹Dran mende rakras o Dewel kamles tuha. Job kamell o duk dran tiro dji krik te lell. Hi kowa tuke gar doha?

¹²Hoske kereh tu pral har thud ap i jag? An tire jaka chatchell tiri choli.

¹³Ap o Debleste hal chojedo. Doleske well sawo rakepen dran tiro mui.

¹⁴Hoi hi o mensho, te nai wals lo erligo glan o Debleste? Kek ap kai phub hi an o tchatchepen tardo glan leste.

¹⁵Ninna leskre bolepangren nai patsell lo gar. Un o bolepen hi gar djudjo glan leskre jaka.

¹⁶Har bud budeder hatsell lo doosh ap o mensheste. O mensho krell djungelo koowa un hi tchi-moldo. O tchilatchepen krell lo, har te pijals lo pani.

¹⁷Me kamau tuha te rakrell. Shun ap kowa, hoi me penau! Kowa, hoi me dikom, kamau te penell:

¹⁸Shunom les gosewe menshendar. Lengre phure rikran les lenge gar pale.

¹⁹Lenge kokres his o them dino. Kek wi-themari djas mashkral lende peha.

²⁰I tchilatcho mensho marell pes tele i darjatar peskro tselo djipen. Kowa, kai i wawaren tele rikrell, hi gar bud bersha glan leste.

²¹An leske kanda shunell lo i gole, hoi krell leske daar. An ko tsiro, kai leske latches djal, well o marepaskro pral leste.

²²Job nai patsell gar, te well lo dran o tamlepen pale win. un dikell o charo pral leskro shero.

²³Job djal kate te kote un rodell chapen, un hatsell tchi. Un job haiwas, te well i kalo diwes pral leste.

²⁴Daar un traash perenn ap leste, un pandenn les dren, har i baro rai an o kurepen i foro dren pandell.

²⁵Jaake djal ko mursheske, kai hadas peskro wast ap o sorelo Debleste, un kras pes bares ap leste,

²⁶un nashell peskro shereha ap leste, peskro shilto an o wast.

²⁷Leske djal mishto, un leskro per hi thullo.

²⁸Un job djiwell an mukle forja, an khera, hoi khetne perenn, kai kek hunte djiwell.

²⁹Job atchell gar brawelo. Leskro brawlepen atchell gar. Kowa, hoi les hi, well gar bareder ap kai phub.

³⁰Job nai well gar win dran o tamlepen, un hi har ko ruk, koleskre senele kashta chatchedo wenn an i jag. Un o Dewel phurdell ap leste, un krik hi lo.

³¹Koon rikrell pes ap tchomone, hoi tchi moldo hi, kowa chochell pes kokres. un lell pale, hoi tchi moldo hi.

³²Job hi har i ruk, hoi well djelto glan peskro tsiro, un hidjrell an kek tsiro buder senele patria.

³³Har i drakengro ruk hi lo, kolestar i drake tele perenn an i tsiro, kai hi le gomme tikno. Un har ko djeteskro ruk hi lo, koleskre blume tele perenn, glan te wenn drake lendar.

³⁴Jaake djal i familjenge kolendar, kai djiwenn kek Debleha. Jon atchenn kek tchawentsa. Un i jag chatchrell lengre khera pre, hoi kran le kol lowentsa, hoi lenge plaissedo was te chochenn le.

³⁵An lengre sherja hi midjak koowa. Pral pende un i wawarende anenn le bibacht. Un lengre djia hi pherdo phukepen.