Read O Debleskro Drom - I Bibla an o Romano Rakepen 2021 Hiob 17 Bible Online

Hiob 17 - O Debleskro Drom - I Bibla an o Romano Rakepen 2021 bible

Hiob 17

¹Man hi buder kek soor. miro djipen hi trujel. Ap mande lurell o handako[15].

²Hakeno sal pral mande. Un me hunte dikap, har tchingran le ap mande.

³Hi jaake, har te woms an o stilepen. Mangau tut, plaisse tu kol lowe, te wap win lino! Man hi kek wawar, kai mange mishto rakrell.

⁴I djia mire malendar kral tu korelo, jaake te nai dikenn le tchi dren. Doleske mukeh len tu gar sorleder te well har me.

⁵Hi penlo: Jek chal khetne peskre malentsa[16], un leskre tchawe hunte bokenna.[17]

⁶Kanna wom jek, pral koleste i menshe sapaskre gilja giwenn, un koleske jon an o mui tchungrenn.

⁷Mire jaka dikenn buder gar mishto i dukatar un ropastar. Mire mussja un herja hi sano har i kasht.

⁸Te dikenn man kolla, kai an o tchatchepen tardo hi, atchell lenge o rakepen krik i trashatar. Un kolla, an kolende kek doosh hatslo well, penenn chojedes: “Kowa djiwell gar o Debleha.

⁹Jek, kai an o tchatchepen tardo hi, mukell gar tele peskro dromestar. Un koon i djudjo djipen djiwell, well sorleder un sorleder.”

¹⁰Ninna te wans jon halauter kai glan mande, hatsoms kek gosewo murshes mank lende.

¹¹Miro djipaskro tsiro hi trujel. Kowa, hoi me mange lauter glan lom, un hoi miro dji kamas, was tchitcheske.

¹²Te hi rati, penenn le, te wals diwes. Te well tamlo, penenn le, te wals o diwes sik.

¹³Hi buder tchi, ap kowa nai dikaus. Glan mande hi o mulengro them. Kote an o kalepen nai tchiwau man tele.

¹⁴Ap i grufta penau: Tu hal miro dad! Ap i kirme: Tumer han miri dai un mire phenja.

¹⁵Ap hawo wawar koowa dikap? Koon dikell latchepen mange te well?

¹⁶Ko latchepen, ap hoi dikom, djal mantsa an o mulengro them tele, un well mantsa khetne an i tchik tchiddo.