Read O Debleskro Drom - I Bibla an o Romano Rakepen 2021 Hiob 18 Bible Online

Hiob 18 - O Debleskro Drom - I Bibla an o Romano Rakepen 2021 bible

Hiob 18

¹Un o Bildad dran Shuach penas koi pre:

²Har rah kamenn tumer gomme dureder te rakrell? Rakrenn tumare djijentsa! Un palle kamah mer khetne te rakrell!

³Hoske rikreh tu men jaake narwelo har vieche? Hoske ham mer dinelo an tire jaka?

⁴An tiri choli dukreh tut kokres! Patseh, i phub hunte well i mulo them, un i bare barra hunte djan jek rigjatar ap i wawar, te well diklo, kai hal tu an o tchatchepen?

⁵Na-a, o djipaskri momeli o tchilatchestar djal win. Un leskri jag chatchell buder gar.

⁶An leskro kheer well tamlo. Un koi momeli pral leste djal win.

⁷Leskre herja, kolentsa job soreles pre stakras, hi palle buder kek soor an lende. Un job perell pral kowa, hoi las lo pes glan.

⁸Leskre pire taprenn pen an i netsa, un job perell an i tchakedi gruba.

⁹Pandle dorja rikrenn leskro piro soreles un mukenn les gar buder win.

¹⁰Khatedo ap ko drom, kai lo djal, hi i dori win tchiddo, te taprell lo les.

¹¹Trul leste trujel well haki rigjatar bari traash, un lell les palla, kai job ninna stakrell.

¹²I bok lell leske leskri soor krik. I bibacht hi tardo pash leste, har te wals li leskro maal.

¹³O nasslepen chal les pre, i merepaskro nasslepen chal leskre mussja un herja krik.

¹⁴O merepen tserdell les win dran o kheer, kolestar job patsas, te nai djal leske tchi. Un job well anlo glan koleste, kai hi o rai pral i mulende.

¹⁵An leskro kheer djiwenn palle kolla, kai gar lestar wenn. Un ap leskro kheer wenn jagakre barra[18] witsedo[19].

¹⁶Job hi har i ruk: Tella merell leskro drab tele, un pral wenn leskre patria djelto.

¹⁷Kek ap i tseli phub djinell gomme, koon job his. Pash hakeneste well lo bistedo.

¹⁸I phubjatar, kai i djide djiwenn, was lo tradedo an ko tamlo them, kai i mule hi.

¹⁹Leske atchell kek tchawo, witar kek tchawengro tchawo mank peskre menshende. Kote, kai djiwas lo, atchell kek lendar djido.

²⁰Te well o diwes, kai well leskri phagi pral leste, lenn kolla traash, kai kote djiwenn, kai o kham pre djal. Un kolenge atchell o rakepen krik i darjatar, kai kote djiwenn, kai o kham tele djal.

²¹Tchatchepah, jaake djal i tchilatchenge un kolenge, kai kamenn tchi o Deblestar te djinell.