Read O Debleskro Drom - I Bibla an o Romano Rakepen 2021 Hiob 19 Bible Online

Hiob 19 - O Debleskro Drom - I Bibla an o Romano Rakepen 2021 bible

Hiob 19

¹Un o Hiob penas koi pre:

²Har rah kamenn tumer mange miro dji te phagell, un man tumare labentsa paash te krell?

³Deesh kope praassan man kanna, un ladjenn tumen gar, te dukrenn man.

⁴Ninna te wals man tchatchepah gar tchatches, wals kowa miro koowa.

⁵Tchatchepah, tumer patsenn, te han feteder har me, un kamenn mange te sikrell, te hi miri doosh, hoi anas man an i ladj!

⁶Dikenn tumer gar dren, te hi kowa o Dewel, kai djas gar mishto mantsa trujel? Hi jaake, har te taprals lo man an i netsa.

⁷Te dau win gole ‘Awenn ap miri rig’, shunell man kek. Ninna te dau soreles gole, dell kek man miro tchatchepen.

⁸Ap miro drom tchiwas lo jaake bud barra, te nai djau gar pral wergel. Un job mukell man an o kalepen miro drom te hatsell.

⁹Job las miro tselo brawlepen mandar, ninna miro an-dikepen pash i menshende.

¹⁰Job dell man khetne haki rigjatar, sik hom gar buder. Job kras, te patsap buder gar ap o latchepen, te dell lo man kowa.

¹¹Un peskri choli mukas lo pral mande pre chatchell, un rikrell man har sawo mursheske, kai kamell leske tchilatchepen te krell.

¹²Hi jaake, har te bitchrals job peskre lurden, te djan le ap mande. Jon kran penge i drom pash mande, un tchiwan pen pre trul miro kheer.

¹³Job rikras mire phralen dur mandar krik. Un kolen, kai me latches prindjrom, krenn jaake, har prindjrans le man gar.

¹⁴Mire menshe wenn gar pash mande, un mire mala bistran man.

¹⁵Kolla, kai mantsa an miro kheer djiwenn un kol djuwja, kai mange budrenn, an lengre jaka hom har i wi-themari, har jek, koles prindjrenn jon gar.

¹⁶Te dau gole ap miro budepaskro, shunell lo gar, ninna te mangap les sorjah.

¹⁷Miro ducho dran miro mui khandell jaake, te rissrell pes miri romni mandar krik. Ninna mire phralenge[20] hom i khand.

¹⁸Ninna i tchawenge hom tchi moldo. Te kamau me pre te stell, sanenn le pral mande.

¹⁹Mire latche mala dikenn tele ap mande. Un kolen, kai me o djijestar kamom, sikrenn mange o dumo.

²⁰Mire mussja un herja hi sane har kashta. nashrom halauter, kokres miro djipen atchas.

²¹Mire mala, krenn tumare djia mange pre! Awenn mange latches! O Debleskro wast das man!

²²Hoske lenn tumer man palla har o Dewel kowa krell? Kran tumer mange gomme gar doha duka?

²³Kamoms, te wans mire laba an i liil tchinlo, te wenn le gar bistedo.

²⁴Kamoms, te wenn le i sasteha dino an i baro bar, te atchenn le hako tsireske!

²⁵Me djinau, te djiwell o Dewel, kowa, kai miro koowa an peskro wast lell. Un an o tsillo, kai o tchatchepen win rakedo well pral kai phub, hi job miro rakepaskro.

²⁶Ninna te hi miro mass jaake dukedo un wom jaake sano, well ko tsiro, kai dikau miro Debles.

²⁷Awa, dikau les mire jakentsa. Un job hi mange kek, kai prindjrau gar. Miro dji nashell leste palla.

²⁸Te putchenn tumendar: “Har nai lah les palla? Hawo koowa nai anah ap leste pre?”

²⁹Palle darenn tumen o charestar! Jek, kai sawi doosh ap peste anell, pral leste well o charo. Palle djinenn tumer, te hi o Dewel o tchatchepaskro mursh.