Read O Debleskro Drom - I Bibla an o Romano Rakepen 2021 Hiob 2 Bible Online

Hiob 2 - O Debleskro Drom - I Bibla an o Romano Rakepen 2021 bible

Hiob 2

¹Un was o diwes, kai wan i bolepangre pale khetne pash o baro Debleste un tchiwan pen tardo glan leste. Un o beng his ninna pale mashkral lende.

²Un o baro Dewel penas ap o beng: “Fun kai weh tu?” Un o beng penas ap leste: “Wau i phubjatar. Kote djom trujel.”

³Un o baro Dewel putchas o bengestar: “Dal tu ninna jak ap miro budepaskro, o Hiob? Kek wawar hi ap i phub, kai hi jaake har kowa. Job hi an o tchatchepen tardo, un kek doosh hi ap leste. Job mangell man an, un rikrell pes dur krik o tchilatchepastar. Ninna kanna anell lo kek doosh ap peste, kai tu mandar kamal, te anap les an i bibacht, ninna te kras lo tchi.”

⁴Un o beng penas ap o baro Debleste: “Lauter, hoi i menshes hi, dell lo peskro djipaske.

⁵Hade tiro wast un tape leskre kokale un leskro mass an! Palle dikeh, te praassell lo tut glan hake menshende!”

⁶Kote penas o baro Dewel ap o beng: “Mishto, dau les an tiro wast. Leskro djipen ma tape an!”

⁷Kote djas o beng win o baro Deblestar, un das o Hiobes i djungelo nasslepen ap peskro mass, hoi chandjras un dukas leske fun o shero bis tele pash i pire.

⁸Un o Hiob las i kotar i paash-dino khorestar, te chandjrell lo pes koleha. Un job his beshdo mashkral i jagakri tchik.

⁹Kote penas leskri romni ap leste: “Rikreh tu gomme ap tiro patsepen? Pen tut o Deblestar tele un mere!”

¹⁰O Hiob penas ap late: “Tu rakreh jaake har i dineli tchai rakrell. O latchepen lam o Deblestar. Las mer gar ninna o tchilatcho koowa lestar?” Ninna te was kowa lauter jaake, anas o Hiob kek doosh ap peste un witsras o Debleske kek tchilatchepen glan.

¹¹O Hiobes his triin mala. Har shunan jon fun koi bibacht, hoi was pral o Hiob, wan le pash leste khetne, hakeno fun kotar, kai job djiwell: O Elifas dran o foro Teman, o Bildad dran o them Shuach, o Zofar dran o them Naama. Un jon kran penge win, te djan le pash leste, te sikrenn le leste, har khaitell lo len, un te penenn le leske latche laba.

¹²Har dikan le les fun dural, prindjran le les gar buder pale. Un jon rowan phares. Un sorjah tserdas hakeno lendar peskre koola pestar tele, un kras len paash. Un jon witsran tchik pre un ap pengre sherja.

¹³Un jon his kote pash leste ap i phub beshdo efta diwessa un efta ratsja. Un kek lendar rakras leha. Jon dikan, leskre duka his baro un pharo.