Read O Debleskro Drom - I Bibla an o Romano Rakepen 2021 Hiob 20 Bible Online

Hiob 20 - O Debleskro Drom - I Bibla an o Romano Rakepen 2021 bible

Hiob 20

¹Un o Zofar dran o them Naama penas koi pre:

²Mange djan jaake bud laba an o shero trujel; doleske hunte rakrap me tuha pale:

³Tu praassal man tiro tchingepah. Shun, me djinau, hoi te penap tuke koi pre.

⁴Djinal tu gar hako tsiro, jaake rah har i mensho ap kai phub hi,

⁵well koi bachteli gole kol tchilatchendar kokres i tikno tsiro shunlo. Un koi bacht kolestar, kai kamell tchi o Deblestar te djinell, djal sik trujel.

⁶Ninna te well lo jaake baro, te djal lo bis pash o bolepen pre, un leskro shero pral bis pash i wolke,

⁷well lo krik lino, un well pale tchik. Kek tsireske well lo buder hatslo. Un kolla, kai prindjran les putchenn palle: Kai hi lo?

⁸Job djal krik har i suni, un well buder gar hatslo. Har kowa, hoi jek suni das, buder gar koi hi, jaake atchell tchi lestar.

⁹Kolla, kai dikan les, dikenn les buder gar. Kote, kai djiwas lo, hi lo buder gar.

¹⁰Leskre tchawe hunte denn kowa pale, hoi lengro dad i tchorwelendar tchoras.

¹¹Ninna te hi lo gomme terno un sorelo, hunte merell lo, un well an i tchik tchiddo.

¹²An leskro mui hi o tchilatchepen har i gudlo chapen, hoi job khatrell tel peskri tchip,

¹³un rikrell les kote jaake rah har djala, te pijell lo i rah tsiro leskro gudlepen.

¹⁴Te well ko chapen an leskro per, nashrell lo peskro gudlepen, un well har i sapeskro tchunger, hoi anell o merepen.

¹⁵Leskro randedo koowa hi har i chapen, hoi hunte tchadell lo pale win. O Dewel lell ko randedo koowa lestar krik.

¹⁶Ko tchilatcho koowa, hoi lo kras, hi an leste har sapeskro tchunger, un marell les har i tchilatcho sap, kai dandras les.

¹⁷Job dikell buder tchi o brawlepastar an kau them, ko bud gwin un thud, hoi har lengste panja nashenn.

¹⁸Kowa, hoi lo peske khetne anas, hunte dell lo pale, un nai rikrell les gar. Un kowa, hoi lo dren paras, krell les gar bachtelo.

¹⁹I tchorwelen rikras lo tele, un was lenge gar ap i rig. Job tradas menshen dran pengre khera, te lell lo peske kol khera, hoi job gar kras.

²⁰An kek tsiro nai las lo doha. Doleske atchell leske ninna tchi fun leskro kutch koowa.

²¹Job chas lauter an peste dren, mukas tchi pral i wawarenge. Doleske atchell leskro shukar djipen gar.

²²An ko tsiro, kai les an lauter budeder har doha hi, well i daar pral leste. I phari bibacht dell les tele.

²³Ap ko tsiro, kai krell lo peskro per pherdo, bitchrell o Dewel peskri soreli choli ap leste, un mukell lat har brishin tele ap leste te perell.

²⁴Ninna te nai nashell lo glan o sasterno charo, dell les jek tele karje.

²⁵Ko failo well an leskro buko karje dino, un dran o dumo djal lo win. Bari traash taprell les.

²⁶Leskro tselo kutch koowa well paash kerdo. Un i jag, hoi kek mensho tchiwas, chatchrell les pre, un kolla, kai an leskro kheer pral atchan.

²⁷O bolepen rakrell win, hawi doosh job ap peste anas, un i phub hadell pes un penell: Tu hal tchilatcho.

²⁸Leskro tselo brawlepen an leskro kheer well krik lino — ap ko diwes, kai well o Debleskri choli pral i tchilatchende har diwje panja.

²⁹Kawa hi, hoi o Debles i tchilatchenge hi, kowa, hoi lo lenge glan dikas.