Read O Debleskro Drom - I Bibla an o Romano Rakepen 2021 Hiob 22 Bible Online

Hiob 22 - O Debleskro Drom - I Bibla an o Romano Rakepen 2021 bible

Hiob 22

¹Un o Elifas ko Temanari penas koi pre:

²Nai well kowa, hoi i mensho krell, o Debleske tchomone moldo? Te hi i menshes goswepen, hi kowa leske kokres tchomone moldo.

³Te hal tu i latcho un tchatcho mursh, un kek doosh hi ap tute, hi o sorelo Debles tchomone kolestar?

⁴Tchingrell o Dewel tuha, un dell tut i phagi doleske, kai djiweh leha!

⁵Na-a! Tiro tchilatchepen hunte wals baro — doleske krell lo kowa! Kreh tu gar pale te pale tchilatcho koowa?

⁶Har tiro phraal tutar patsas, lal tuke tchomone lestar, te rikress les, bis te job peskri sijaan plaissras. Leskre koola lal lestar, un mukal leske kek an-ripaske.

⁷Koles, kai trush his, dal kek pani. Koles, kai bokas, dal kek maro.

⁸O mursh, koles bud penepaske hi, las peske o them, un o an-diklo djiwell kote dren.

⁹Koi djuwel, kolakro rom meras, bitchral tu tutar krik, un dal lat tchi an o wast. Un djal kol tchawentsa tchilatches trujel, kolengro dad meras.

¹⁰Doleske djal tuke kanna, har te wals pandlo an i netsa. Un tu trisseh i darjatar, hoi tut ap jek kopo tapras.

¹¹Tamlepen hi trul tute, te nai dikeh tchi. Un bare panja djan pral tute.

¹²Hi o Dewel gar dur pre an o bolepen? Dik pre pash i bolepangre momlia, dik, har dur pre kolla hi!

¹³Un tu putcheh: “Hoi nai djinell o Dewel? Hi lo gar khatedo pal kale wolke? Har nai rakrell lo o tchatchepen pral mende win?

¹⁴Job nashell kote, kai o bolepen un i phub khetne wenn, un pesse wolke hi trul leste, jaake te nai dikell lo tchi.”

¹⁵Kameh tu o phuro drom te djal, kai i tchilatche pre djan?

¹⁶Kolla meran, har his le gomme gar phuro — wan krik thodo har i kheer i sorelo panjestar.

¹⁷Un jon penan ap o Debleste: “Dja tuke mendar!” Un: “Hoi nai krell menge o sorelo Dewel?”

¹⁸Un job his kowa, kai kras lengre khera pherdo latcho koowa! Hoske i tchilatche sau koowa rakrenna an pengre djia, haiwau me gar.

¹⁹I latche menshe hi bachtelo, te dikenn le, har lenn i tchilatche pengri phagi, Un kolla, ap kolende kek doosh hi, sanenn pral lende:

²⁰“Tchatchepah, halauter, hoi i tchilatchen his, hi paash, Un kowa, hoi pral atchas, chatchras i jag.”

²¹Jaake, ab o Debleha pale an o latchepen! Un ma tchinge leha! Palle well pale bacht an tiro djipen.

²²Muk tuke dran leskro mui tchomone te penell, un rike leskre laba an tiro dji!

²³Te weh tu pale pash o sorelo Debleste, krell lo tut pale sorelo. Tchip o tchilatchepen dur krik dran tiro kheer!

²⁴Te hi tuke tiro sonakai gar budeder moldo har tchik, tiro latcheder sonakai[23] gar budeder har kol barra an i tikne panja,

²⁵palle well tuke o sorelo Dewel har tiro sonakai un kutch rup.

²⁶Palle hal bachtelo pral o sorelo Debleste. Un tu hadeh tiro shero pre pash leste.

²⁷Tu mangeh les an, un job shunell ap tute. Un tu aneh leste kowa, hoi tu leske sowel dal.

²⁸Hoi tu tuke glan lal, kowa djal tuke mishto. Un i momeli djal pre pral tire dromma.

²⁹Ap kolende, kai hunte djan i telstuno drom, peneh tu: Stenn pre! Un o Dewel hadell koles pale pre, kai hidjrell peskre jaka gar pre.

³⁰Ninna koles, kai doosh ap peste hi, lell lo dran o merepen win, dran kowa, kai tu kek tchilatchepen kreh.