Read O Debleskro Drom - I Bibla an o Romano Rakepen 2021 Hiob 25 Bible Online

Hiob 25 - O Debleskro Drom - I Bibla an o Romano Rakepen 2021 bible

Hiob 25

¹O Bildad dran Shuach penas koi pre:

²O Debles hi i soor pral halauter, un hakeno hunte trashell lestar. I sorelo wasteha krell lo, te well kek tchingepen an peskro bolepaskro them.

³Kek nai ginell[28] kitse bolepangre lurde les hi. Kek hi koi, pral koleste leskro kham gar pre djal.

⁴Glan o Debleskre jaka hi kek mensho an o tchatchepen tardo. Kek mensho hi erligo glan leste.

⁵Ninna o tchon[29] un i bolepangre momlia hi gar djudjo glan leskre jaka.

⁶Te dikell lo ap i mensheste, hi kowa glan leste gar budeder har i kiri un i kirmo!