Read O Debleskro Drom - I Bibla an o Romano Rakepen 2021 Hiob 3 Bible Online

Hiob 3 - O Debleskro Drom - I Bibla an o Romano Rakepen 2021 bible

Hiob 3

¹Pal kowa kras o Hiob peskro mui pre, un praassas ko diwes, kai lo boldo was.

²Un o Hiob penas:

³Nashedo hunte djal ko diwes, kai me boldo wom, un koi rat, kai miri dai mantsa wawartchandes was!

⁴Mu well ko diwes kali rat, — kai kek bolepaskri momeli pre djal, — kai ninna o Dewel an o pralstunepen ko diwes bistrell!

⁵Mu well ko diwes pherdo kalepen un tamlepen! Kale wolke mu atchenn pral leste! Un o kham mu well kalo ap ko diwes, te well i menshenge bari daar!

⁶Koi rat, kai miri dai mantsa wawartchandes was, mu lell o tamlepen koi rat peske, te well li gar kharedo mank i tsele diwessa an o bersh, witar gar mank i diwessa an o tchon!

⁷Kek djuwel te well wawartchandes an koi rat, Kek te dell gole i bachtjatar an koi rat!

⁸I durkepangre mu praassenn ko diwes — kolla, kai haiwenn i bibacht pral i diwes win te rakrell, un kai nai djangrell o Leviatan[2] pre.

⁹Koi rati te atchell kalo, kek bolepaskri momeli djal pre taissarlakro. Koi rati mu dikell pal o diwes — un kowa well gar. O kham djal gar pre.

¹⁰Koi rati mukas miri dai wawartchandes te well, un mukas man bari bibacht te dikell.

¹¹Hoske merom me gar, har boldo wom, har me dran late win wom?

¹²Hoske las li man an i gali? Hoske das li man i tchutchi te pijap?

¹³Te woms mulo, woms koi tchiddo, un sowoms, un woms pokones.

¹⁴Palle woms tchiddo mank i bare rajende un pralstunende ap kai phub, kai kran pen shukar mulengre khera.

¹⁵Woms tchiddo mank i pralstunende, kolen sonakai his, un kolengre khera pherdo rup his.

¹⁶Palle tchiwans le man tel i phub har sau ternepen, hoi glan o tsiro mules boldo was. Palle woms paskedo har sawo tchawo, hoi o kham kek tsireske dikas.

¹⁷Kote mukenn i tchilatche tele pengri diwji goljatar. Kote nai sowenn kolla, kai hunte maran pen tele.

¹⁸Ninna i pandle wenn buder gar tradedo, un shunenn kekes buder, kai dell len an-gole tchilatche labentsa.

¹⁹Kote hi o baro un o tikno, lauter jek har o wawar. Un o pandlo budepaskres hi buder kek rai pral peste.

²⁰Hoske mukell o Dewel kolen djido, kai len jaake phares hi? Hoske dell lo kolen o djipen, kolengro dji pherdo ropen hi?

²¹Jon kamenn te merenn, un o merepen well gar. Jon rodenn les budeder har brawlepen,

²²un giwans un sans i bachtjatar, te nai merans le.

²³Hoske hunte djiwell kowa, koleskro drom khatedo hi, un koles o Dewel haki rigjatar dren pandas?

²⁴Mire swa hi miro chapen. un koi gole, hoi dau, well dran mande win har pani.

²⁵Kowa, hoi me darom, was pral mande. Kolestar trashom, kowa tapras man.

²⁶Me hatsom kek ruha, un nai lom kek newi soor. Dap ap dap was ap mande.