Read O Debleskro Drom - I Bibla an o Romano Rakepen 2021 Hiob 30 Bible Online

Hiob 30 - O Debleskro Drom - I Bibla an o Romano Rakepen 2021 bible

Hiob 30

¹Kanna sanenn le pral mande, kolla, kai terneder hi har me, kolengre dada an mire jaka gar doha moldo his, te denn le jak ap mire bakre khetne mire djuklentsa.

²Len his buder kek soor an pengre mussja. Hoi wals man kolestar, te budrans le mange?

³Tchorwele his le, un i bokatar dandran le ap kowa trujel, hoi le an o mulo diwjo them hatsan, kai kek djiwell.

⁴Kote rodan le pen o londo senlepen khetne mashkral i burra, un chan ninna i draba kol burrendar, hoi kharenn Ginster.

⁵Fun kotar, kai i menshe khetne djiwenn, wan jon win tradedo. Jon dan pal lende gole, har pal i tchorepaskro.

⁶An i barrengre berge, hoi djan ap i rigja i lengsto panjestar dur pre, hi le khere, ninna tel i phub, un mank i bare barra.

⁷Mashkral i burra denn le gole, un tel i subjengre burra wenn le khetne.

⁸Tchi-molde hi le, kolengre laba kek prindjrell, un kai wan win tradedo dran o them.

⁹Un kanna giwenn lengre tchawe sapaskre gilja pral mande. Me wom lenge rakepaske.

¹⁰Lenge well djungeles glan mande, un rikrenn pen dur krik mandar, un tchungrenn mange an o mui.

¹¹O Dewel phagas miri soor, un kras man tiknes. Doleske krenn le mantsa, hoi le kamenn.

¹²Ap miri tchatchi rig hadenn pen tchilatche terne mursha, un stakrenn mange mire herja krik. Un kran mange sawe dromma, te hunte perap ap lende.

¹³Jon kran bare chebja an miro drom, te nashap mange gar. Un kek hi koi, kai len pale rikrell.

¹⁴Har lurde i foreskri massuri paash krenna, un tel i barra, hoi tele peran, dren wenna, wenn jon pash mande.

¹⁵Bari daar tapras man. Miro an-dikepen djas peske, har te phurdals les i ducho krik. Un miri bacht djas krik har i wolka.

¹⁶O djipen an mande nashell krik har pani. Tchilatche diwessa wan pral mande.

¹⁷Rati dell i duk tchurje an mire kokale. un koi duk, hoi man chal, sowell gar.

¹⁸Peskri sorjah krell li miri hauta phuro. Koja hi mange har miro gad, hoi mange buchlo trul i meen hi.[38]

¹⁹Job witsras man an i tchik. Kanna hom me ninna buder tchi har tchik.

²⁰Me dau ap tute gole un tu rakreh ap mande gar pale. Me hom kai tardo, un tu deh gar jak ap mande.

²¹Tu wal mange har i tchilatcho, un tiri tseli sorjah leh man palla.

²²Tu mukeh i ducho te well, hoi hadell man pre un phurdell man krik, un witsrell man pre un tele an i baro phurdepen.

²³Me djinau kanna, tu kameh man an o mulengro them te anell, kai i tsele djide khetne wenn pal lengro merepen.

²⁴Te peras jekeskro kheer khetne, un job hi tchiddo tel i barra, rikrell lo gar peskro wast win? Te well i bibacht pral jekeste, dell lo gar gole?

²⁵Me rowom kolenge, kai len sawe phare diwessa his. Un miro dji dukas, har dikom ko tchorweles.

²⁶Me patsom, te well latchepen ap mande, un tchilatchepen was. Mire jaka rodan pal i momeli, un kalepen was.

²⁷Lauter an mande chatchella, un i duk mukell gar pale. Phare djungele diwessa peran pral mande dren.

²⁸Ropah djau me trujel, un kek kham dikau me buder. Kote kai i menshe khetne wenn, stau me pre un dau gole.

²⁹Miri gole hi har i gole i diwje djuklendar un kol tchirklendar, kai kharenn Strausse.

³⁰Miri hauta was kalo ap mande, un perell mandar tele. Un o fibro chatchell an mire kokale.

³¹Miri dorjengri bashepaskri bashrell kokres ropaskre gilja. Un o bashepen ap miri tikni phurdepaskri[39] hi har o ropen pral jekeste, kai meras.