Read O Debleskro Drom - I Bibla an o Romano Rakepen 2021 Hiob 31 Bible Online

Hiob 31 - O Debleskro Drom - I Bibla an o Romano Rakepen 2021 bible

Hiob 31

¹Me djom i sowel mire jakentsa dren, te dikap gar lubekanes i terni tchake palla.

²Te rikroms me gar ap kowa, hoi krals palle mantsa o Dewel an o pralstunepen? Tchatchepah o sorelo Dewel, kai hi an o pralstuno bolepen, dals man kek latcho koowa koleske!

³Pral i tchilatcho well bibacht, un koleske, kai krell djungelo koowa, djal tchi mishto.

⁴O Dewel dikell halauter, hoi krau, un djinell, hawo drom mire pire djan.

⁵Djom me i chocheno drom? Rakrom dui tchipjentsa?

⁶Me mangau o Debles, te dikell lo palla an o tchatchepen: Lom me doosh ap mande oder gar? Palle dikell lo, te hom an o tchatchepen tardo.

⁷Te djan mire herja tele leskro dromestar, un te nashas miro dji mire jakenge palla, un te kran mire wasta tchomone, hoi gar mishto hi,

⁸palle kamau djob an i phub te witsrell, un i wawar nai chal kowa, hoi kolestar bares was. Un kowa, hoi mange dran i phub win was, tserdenn palle i wawar dran i phub win.

⁹Te mukas pes miro dji i wawareskri djuwjake dren, un te luroms me ap late pash koleskro wudar,

¹⁰palle te kerell miri romni i wawareske, un wawar mursha te sowenn lah!

¹¹Kowa wals i wi-ladjedo koowa, un i doosh, hoi hunte well glan i tchatchepaskre murshende anlo.

¹²Sawi doosh wals har i jag, hoi man tseles chatchrell, un ninna halauter, hoi man hi, pre chals.

¹³Te doms miro budepaskres — nai well i mursh, nai well i djuwel — gar tchatches an i tchingepen, kai les tchatches his,

¹⁴hoi kroms me nai palle, te hadals pes miro Dewel pre, un dikals ko koowa palla? Hoi nai penoms me leske?

¹⁵Job, kai kras man an miri dakro per, hi kowa, kai kras ninna kolen, kai mange budrenn.

¹⁶Dom me gar o tchorweles kowa, hoi lo mandar mangas? Wom me gar koi djuwjake ap i rig, kolakro rom meras, un kai gar doha djipaske his?

¹⁷Chom me miro chapen kokres, un dom kolen tchi, kolen buder kek dad his?

¹⁸Fun tiknes pre dom me ap lende jak, har te woms me lengro dad. Un miro tselo djipen wom kol djuwjenge ap i rig, kolengro rom meras.

¹⁹Te dikom jekes, kai jaake tchorwelo his, te his les kek ripen, te tatsrell lo pes,

²⁰dom me leste koola kerdo dran i balla mire bakrendar, te was leske tato. Un job parkras pes pash mande o tselo djijestar.

²¹An kek tsiro hadom me miro wast pre ap i tchaweste, koles kek dad buder hi, ninna te djinom, te hi halauter ap miri rig, kai his an o foreskro wudar beshdo.

²²Te kroms me sau koowa, palle mu phagell miri mussi, un win tserdedo well dran miri phik!

²³Sau koowa nai kroms me gar, me trashau o Deblestar, un hunte daroms, te well leskri choli pral mande!

²⁴Miro sonakai was gar miro dewel. Ap leste penom me gar: Tu hal kowa, hoi man hunte well!

²⁵Me stom gar i bachtjatar, te was miro brawlepen baro, un mange jaake bud khetne lom.

²⁶Me mangom gar o kham an peskro railepen an, witar gar o tchon[40] an peskro shukapen.

²⁷Miro dji rissras pes gar tchorchanes pash lende, te witsroms me lenge i wasteskri tchum koi!

²⁸Kowa wals i doosh, hoi hunte wals glan o tchatchepangre murshende anlo. Koleha phukroms ap o Debleste an o pralstunepen.

²⁹Me wom gar bachtelo koi pral, har djas koleske djungeles, kai mange tchilatchepen kamas. Witar gar dom gole i bachtjatar, har was i bibacht pral leste.

³⁰Me anom kek doosh ap mande, te rakroms i bibacht pral leste win, te merell lo.

³¹Na-a, lauter kai pash mande djiwenn, djinenn, hakeno, kai pash mande was, las latches un doha te chal.

³²Kolla, kai ap pengro drom pash miro wudar wan, kolenge krom me pre. Kek wi-themari hunte sowas win ap o drom.

³³An kek tsiro kamom miri doosh te khatrell, har wawar menshe krenn.

³⁴Man his kek daar kolestar, hoi nai rakrens i menshe pral mande, witar kek traash i ladjatar, hoi nai anens mire menshe ap mande, te penoms doleske tchi, un djoms gar glan miro wudar.

³⁵Ach, te wals jek koi, kai ap mande shunell! Hoi penom, tel kowa nai tchinau miro lab. O sorelo Dewel te rakrell pale! Kai hi ko liil, an koleste kowa miri doosh pre-tchinas, kai penell, te lom doosh ap mande?

³⁶Tchatchepah me hadaus kau liil ap miri phik pre, un hidjraus les har i rajeskri stadi ap miro shero.

³⁷Me penaus leske hako koowa, hoi krom an miro djipen, un har i rai waus me glan leste.

³⁸Te das miri hachetikri phub gole pral mande, un leskri tchik hunte rowas,

³⁹te chom ko djob, un plaissrom koleske tchi, un mukom i hachen i bokatar te merell,

⁴⁰palle te well buder kek gib un djob win dran miri phub! Na-a, palle te anell i phub subjengre burra un djungelo senlepen win! Kate herell o Hiobeskro rakepen pre.