Read O Debleskro Drom - I Bibla an o Romano Rakepen 2021 Hiob 32 Bible Online

Hiob 32 - O Debleskro Drom - I Bibla an o Romano Rakepen 2021 bible

Hiob 32

¹Un kol triin mursha penan buder tchi pale ap o Hiob doleske, kai his job an peskre jaka an o tchatchepen tardo.

²Kote was i choli an o Elihu, koleskro dad o Barachel his i menshendar, kai kharenn Busarja, dran i familja Ram. O Elihu was chojedo doleske, te patsas o Hiob, te wals job budeder an o tchatchepen har o Dewel.

³Ninna was lo chojedo pral o Hiobeskre triin mala: Ninna te hatsan jon tchi, hoi nai penenn le o Hiobeske pale, patsan le, te his doosh ap leste.

⁴O Elihu rikras pes o tselo tsiro pale peskro rakepah, bis te rakran kol wawar o Hiobeha. Jon his phureder har job.

⁵Har job kanna dikas, te his len tchi buder te penell, mukas lo peskri choli win.

⁶Un o Elihu, koleskro dad o Barachel his, ko Busari, penas: Me hom terno. Tumer han phure mursha. Doleske darom tumenge te penell, hoi djinau.

⁷Me penom mange: Muk i phuren te rakrell. Jon hi kolla, kai nai sikrenn, hoi goswepen hi.

⁸Hi tchatcho, kowa, hoi krell i menshes gosewo, hi o ducho o sorelo Deblestar, koles job an i mensheste dren tchiwas.

⁹I phure hi gar hako tsiro i gosweder. Lengro phurepen krell gar, te djinenn le, hoi tchatcho hi.

¹⁰Doleske penau me: Shunenn kanna, hoi man penepaske hi! Me kamau ninna te sikrap, hoi djinau.

¹¹Me mukom tumen win te rakrell, un dom jak hawe laba tumer hatsans, un har tumer kau koowa dikenn.

¹²Un me shunom mishto, hoi penan. Un kek his mank tumende, kai nai sikrals o Hiobeste, te his les gar tchatcho. Kek penals leske ap leskro rakepen tchomone pale.

¹³Ma penenn: “Mer hatsam win, hoi goswepen hi. Kowa hi o Dewel, kai hunte sikrell leste leskri doosh, un kek mensho!”

¹⁴Ap mande rakras o Hiob gar. Un me rakrau witar gar kol labentsa, hoi tumer rakran ap leste pale.

¹⁵Hiob, tire triin malenge atchas o rakepen krik. Jon djinenn buder gar, hoi te penell tuke.

¹⁶Har nai rikrap man kanna pale, kai jon gar buder dureder rakrenn? Kote hi le tardo un nai penenn tchi pale.

¹⁷Me kamau ninna te penell, hoi me djinau, un kowa, hoi me haiwom, tumenge dureder te dell.

¹⁸Man hi bud laba te penell. Me nai rikrau gar mire laba pale, hoi an mande hi un win kamenn.

¹⁹Te nai rakrau gar, djal mange har i moljakro gono, kai newi mool dren hi, hoi nai well gar win, un o gono pre phagell.

²⁰Me hunte rakrap, te nai lap pale ducho. Awa, kamau win te rakrell, hoi kamau tumenge te penell.

²¹Me wau ap kekeskri rig tardo, un kek mensheske rakrau pal o mui.

²²Me haiwau man gar koi pre, te rakrap jekeske pal o mui. Te kroms kowa, lals kowa, kai mange miro djipen das, sik miro djipen pale mandar krik.