Read O Debleskro Drom - I Bibla an o Romano Rakepen 2021 Hiob 33 Bible Online

Hiob 33 - O Debleskro Drom - I Bibla an o Romano Rakepen 2021 bible

Hiob 33

¹Tut Hiob mangau, shun miro rakepen, un de jak, hoi man tuke penepaske hi!

²Dik, me krom miro mui pre, un mire laba hi mange ap i tchip tchidde.

³Mire laba wenn dran miro dji, un hi tchatcho. Kowa hoi djinau, rakrau i djudjo djijeha.

⁴O ducho o Deblestar kras man. Awa, o ducho o sorelo Deblestar das man o djipen.

⁵Pen mange pale, te haiweh kowa! Muk tuke an o shero te well, hoi kameh glan te anell, un stake glan mande!

⁶Dik, glan o Debleste hom me jaake bud har tu hal. Un me ninna hom dran i tchik kerdo.

⁷Tut hunte well kek daar mandar. Un miro wast well gar phares ap tute tchiddo.

⁸Tu rakral glan mire kanda. Un me shunom kol laba dran tiro mui, har tu penal:

⁹“Me djiwom i djudjo djipen, un krom kek tchilatcho koowa. Kek doosh hi ap mande. O tchatcho dromestar djom gar tele.

¹⁰O Dewel anell tchomone ap mande pre, hoi me gar krom. Job rikrell man har sawo mursheske, kai kamell leske tchilatchepen te krell.

¹¹Job tchiwell mire pire an shelle, un dell jak ap hako drom, kai me djau.”

¹²Dik, Hiob, me hunte penap tuke, kate hal tu gar an o tchatchepen. O Dewel hi bareder har i mensho.

¹³Hoske hal tu chojedo leha, te rakras lo tchi pale ap kowa, hoi penal?

¹⁴Pale te pale rakrell job, jek kopo jaake, un jek kopo jaake. Un mer menshe dah gar jak koi pre.

¹⁵An i rat, te perell o sopen ap i menshende, dell lo len sunja. Te hi le tchiddo ap pengro tchiben,

¹⁶krell lo lenge i kanda pre, te denn le pen jak. Un soreles dell lo len trad,

¹⁷te anell lo len tele pengro tchilatcho dromestar, un te rikrell lo len pale, te wenn le pre-phurdo.

¹⁸Jaake rikrell lo o menshes pale, te nashrell lo gar peskro djipen, un merell.

¹⁹Nai well, te bitchrell o Dewel i mensheske duka, te dell lo les jaake trad — sawe duka, hoi witsrenn les ap o tchiben un djan leske an leskre tsele kokale.

²⁰Un leske well djungeles glan o chapen, ninna glan ko chapen, hoi lo jaake kamas.

²¹Job well sano, kek mass hi buder ap leskre kokale, jaake te stakrenn i tsele kokale glan.

²²Job hi gar dur o merepastar un o themestar, kai i mule hi.

²³Te well palle i bolepaskres pash leste, kowa ap leskri rig hi, jek kol serjendar, kolen o Dewel win bitchrell, te penenn le menge, hoi menge mishto hi,

²⁴palle krell o bolepaskro peskro dji leske pre, un penell ap o Debleste: “Le les win, te hunte djal lo gar tele pash i mulende. Me hatsom leske i lowe, hoi les dran o merepen win ginenn.”

²⁵Pale lell lo pale newi soor, well sasto un sorelo, har an ko tsiro, kai lo terno his.

²⁶Job mangell o Debles, un kowa dikell latches ap leste, un mukell les bachteles glan peste te well. Un o Dewel tchiwell les pale an o tchatchepen.

²⁷Ko mensho giwell palle glan i menshende un penell: “Me lom doosh ap mande, un rissrom mange o tchatchepen jaake har me kamom. Un miro Dewel mukas kowa gar ap miro shero pale te well.

²⁸Job las miro djipen win dran o merepen, te djap gar pash i mulende. Un me hom bachtelo te atchom djido.”

²⁹Dik, kawa lauter krell o Dewel dui, triin kope an o djipen i menshestar,

³⁰te anell lo leskro djipen tele ko dromestar, hoi anell an o mulengro them, un te well lo pale bachtelo pral peskro djipen.

³¹Dik Hiob, shun ap mande! Ma rake tu, muk man te rakrell!

³²Te hi tut tchomone te penell, palle pen mange ap kawa tchomone pale. Rake, kamoms o djijestar, te dap tut tchatches!

³³Te hi tut tchi te penell, palle shun tu ap mande un ma rake, te sikrap tute, har te wess gosewo.