Read O Debleskro Drom - I Bibla an o Romano Rakepen 2021 Hiob 34 Bible Online

Hiob 34 - O Debleskro Drom - I Bibla an o Romano Rakepen 2021 bible

Hiob 34

¹Un o Elihu rakras pale un penas:

²Tumer gosewe mursha, shunenn miro rakepen! Tumer, kai sikle han, shunenn, hoi kamau tumenge te penell.

³Jaake har o mui haiwell, hi o chapen latcho oder gar, jaake hunte hatsell o kand win, hi ko rakepen mishto oder gar.

⁴Mer te hatsas kanna khetne win, hoi an kau koowa tchatcho un mishto hi.

⁵O Hiob penas: “Me hom an o tchatchepen tardo. Un miro tchatchepen las o Dewel mandar krik.

⁶Hunte rakrap chochepen un penap: Me lom doosh ap mande? Mange was i baro dukepen dino, ninna te hi kek doosh ap mande.”

⁷Koon hi sawo mursh har o Hiob, kai rikrell pes gar pale te praassell lo i wawaren? Kowa hi leske har te pijals lo pani.

⁸Un jaake hi lo har jek kolendar, kai djungelo koowa krenn, un djal ap o drom, kai i tchilatche djan.

⁹Job penas kokres: Tchi hi jekes kolestar, te kamell lo o Debleskro maal te well!

¹⁰Doleske, tumer mursha, kai jaake bud haiwenn, shunenn ap mande! An kek tsiro krell o sorelo Dewel i tchilatcho koowa. Hako tsiro hi lo an o tchatchepen tardo!

¹¹Job dell o menshes ap o shero pale, hoi job kras, un jaake, har djiwas lo, well kowa ap leste.

¹²Tchatchepah, o sorelo Dewel krell kek tchilatcho koowa, un o tchatchepen rissrell lo gar trujel.

¹³Koon his, koon les i phub an leskre wasta das? Kek! Job kras i phub. Kek hi pral leste tardo.

¹⁴Te lals job peske glan, te lell lo peskro djipaskro ducho palpale o menshestar,

¹⁵palle merans halauter, hoi djiwenn, ap jek kopo, un o mensho wals pale tchik.

¹⁶Hiob, te haiweh, hoi penau, palle shun kawa! De mishto jak ap miro rakepen!

¹⁷Nai wals o Dewel o rai pral i phub, te stakrals lo peskre pirentsa ap o tchatchepen? Kameh doosh ap o sorelo Debleste te anell, kai hako tsiro an o tchatchepen tardo hi?

¹⁸Job nai penell ap i baro rajeste ‘tu tchi-moldo’ un ap i pralstuneste ‘tu tchilatcho’!

¹⁹Job dikell gar i pralstunes feteder an har i wawares, un tserdell o braweles gar o tchorweleske glan. Leskro wast kras len halauter.

²⁰Ap jek kopo merenn le. Mashkral an i rat trissenn le un hi gar buder. Kol sorele wenn krik lino kek mensheskro wasteha.

²¹O Dewel lell hako koowa an o jak, hoi i mensho krell, un dikell les, kai lo ninna djal.

²²Kek rat un kek kalepen hi jaake tamlo, te nai khatrans pen i tchilatche kote dren.

²³O Dewel hunte tchiwell kek tsiro dren, te anell lo i menshes glan peste, te rakrell lo o tchatchepen pral leste win.

²⁴Job dell i sorele rajen khetne, un hunte hatsell gar win, hoi jon kran. Ap lengri platsa tchiwell lo wawaren.

²⁵Tchatchepah, job djinell ko koowa, hoi le kran. Rati mukell lo len te perell, te wenn le khetne stakedo.

²⁶Ap i platsa, kai i tchilatche pengri phagi lenna, un hakeno nai dikell len, dell lo len lengri phagi.

²⁷Kowa krell lo doleske, kai djan jon leskro dromestar tele, un dan gar jak ap kowa, hoi job lendar kamas.

²⁸Jon djan jaake tchilatches i tchorwelentsa trujel, te dan jon gole ap o Debleste. Un job shunas koi gole kolendar, kai tele rikedo wan.

²⁹Te rikrell pes o Dewel pale, nai penell kek leske: ‘Tu anal doosh ap tute!’ Te khatrell lo pes, nai dikell les kek. Hoi nai krenn i menshe, hoi nai krell i natsjona,

³⁰te tchiwals o Dewel i tchilatches pral lende, te well lo lengro rai, un kowa anell len o tchatcho dromestar tele?

³¹I mensho hunte penals ap o Debleste: “Me hidjrau miri doosh, un kamau buder gar tchilatcho koowa te krell.

³²Sike tu man, hoi me gar dikau! Te his kowa tchilatches, hoi me krom, krau me les palle buder gar.”

³³Kameh, te anell o Dewel ap saweste i phagi?[41] Kameh tu kowa gar?[42] Tu hunte peness, hoi kameh, un gar me. Pen menge kanna, har kau koowa dikeh!

³⁴Gosewe mursha un sawe, kai haiwenn bud, un shunan, hoi penom, kolla penenn ap mande:

³⁵O Hiob djinell gar, hoi lo rakrell. Un leskre laba sikrenn, te haiwas lo gar bud.

³⁶Kamoms, te wals o Hiob glan i tchatchepangre murshende anlo, te lenn jon hakenes leskre labendar an o jak, hoi job rakras, Job rakrell har i tchilatche rakrenna.

³⁷Gar kokres doosh anas lo ap peste, na-a, job hadas pes ninna pral o Debleste. Glan mare kanda krell bare laba un rikrell o Debles dineleske.