Read O Debleskro Drom - I Bibla an o Romano Rakepen 2021 Hiob 35 Bible Online

Hiob 35 - O Debleskro Drom - I Bibla an o Romano Rakepen 2021 bible

Hiob 35

¹Un o Elihu penas palle:

²Patseh, te hi kowa tchatcho, hoi penal? Tu penal: “Me hom an o tchatchepen glan o Debleste.”

³Un tu putcheh: “Hoi hi man kolestar, te lau kek doosh ap mande? Hawo latchepen lom koleske?”

⁴Kowa kamau tuke te penell, tuke un tire malenge pash tute:

⁵Dik pre, dik an o bolepen pre! Dik ap i wolke dur pral tute!

⁶Koi doosh, hoi tu ap tute leh, kolah nai kreh tu tchi ap o Debleste. Te kral bud tchilatcho koowa, nai kreh tu leske tchi koleha.

⁷Te hal tu an o tchatchepen tardo, hoi hi les kolestar? Na-a, tu nai deh leske tchi dran tiro wast, hoi leske tchomone moldo hi.

⁸Kolla hi i wawar menshe, kolenge kowa djungeles hi, te kreh tchilatcho koowa, un kolenge kowa latcho hi, te kreh latcho koowa.

⁹Te krenn i sorele i wawarenge bud tchilatcho koowa, rowenn kolla, un denn gole pal jekeste, kai lell len win dran i wasta kol sorelendar.

¹⁰Un kek lendar putchell pal o Debleste, kai les kras. Un job hi kowa, kai krell, te nai giwell i mensho gilja an i kali rat.

¹¹Job kras, te djinas mer budeder har i vieche ap i phub, un kras men gosweder har i tchirklen tel o bolepen.

¹²Te denn i tchilatche palle gole, kolla, kai pen jaake bares kran, penell o Dewel lenge tchi pale.

¹³Lengri gole hi tchitcheske! O sorelo Dewel shunell lat gar, un dell kek jak koi pre.

¹⁴Tu Hiob peneh, tu nai dikeh les gar! Tiro koowa hi glan leste tchiddo. Muk gar tele, te dikess ap leste!

¹⁵Tu peneh, o Dewel mukell peskri choli gar te well. Dell lo witar gar jak ap o narwelo rakepen?

¹⁶O Hiob hi i baro mujeskro, job rakrell, hoi tchi-moldo hi, krell bare laba, un djinell gar, hoi lo rakrell.