Read O Debleskro Drom - I Bibla an o Romano Rakepen 2021 Hiob 37 Bible Online

Hiob 37 - O Debleskro Drom - I Bibla an o Romano Rakepen 2021 bible

Hiob 37

¹Koi pral trissell miro dji, un dell sik un diwjo.

²Shunenn, har bares job gole dell, har chojedo koja gole dran leskro mui well!

³Tel o tselo bolepen mukell lo koi jag karje te dell, un koja djal pral i tseli phub jek rigjatar ap i wawar.

⁴Pal kowa well koi bari soreli gole shunlo, hoi hi har o baro Debleskro rakepen. Un job rikrell peskri jag gar pale, te mukell lo peskro rakepen te shunell.

⁵Te mukell o Dewel peskro rakepen te shunell, krell lo kowa sawi bari goljah, te atchell menge o rakepen krik. Job krell baro koowa, hoi nai haiwah mer gar.

⁶Ap o gib penell lo: Pere ap i phub! Ap i wolke: De sorelo brishin!

⁷Jaake krell lo, te mukenn i menshe pengri budi tchiddo, te dikell hakeno, hoi job nai krell.

⁸I diwje vieche djan an pengro khatepen, un tchiwenn pen kote tele.

⁹O sorelo phurdepen well fun tchatches[45] dran peskro kheer, un o shil well fun serwes[46].

¹⁰Dran o ducho, hoi dran o Debleskro mui win djal, djajell o pani. Un kol buchle bare panja wenn sorelo har bar.

¹¹Job krell i wolke pharo un pherdo pani, un dran lende dell i jag karje.

¹²Kol wolke djan kate te kote, jaake har job len bitchrell, te krenn le halauter jaake, har job les kamell ap i tseli phub.

¹³Nai well, te bitchrell lo o brishin, te dell lo o themes i phagi, ninna nai well, te bitchrell lo les, te sikrell lo peskro latchepen.

¹⁴Hiob, shun kawa mishto! Atch, un de jak ap kowa, hoi o Dewel an peskri soor krell!

¹⁵Djineh tu, har o Dewel i wolkenge penell, kai te djan le? Un har lo i jag dran lende karje win dell?

¹⁶Haiweh tu, har i wolke tel o bolepen djan, un gar tele perenn? Sawo koowa nai krell kokres kowa, kai halauter djinell.

¹⁷Tu, koleske tel i koola tato well, te phurdell i tato ducho pral o them,

¹⁸nai kreh tu o bolepen buchles pral i phub, har job kowa kras, te well o bolepen soreles har i dikepaskri[47]?

¹⁹Pen tu menge, hoi penas mer leske? Mer djinah tchi. Un men hi tchi, te anas glan leste!

²⁰Penell jek leske: Dik, kate hi jek, kai kamell tuha te rakrell? Na-a! Kowa wals jaake, har te kamals lo maredo te well.

²¹Kanna nai dikell kek an o kham, jaake sorelo hi o kham, te phurdas o ducho i wolke krik.

²²Fun kotar, kai norden hi, well tchomone har sonakai. O Dewel well an peskro railepen. Ko railepen trul leste krell men daar.

²³Pash leste, ko soreleste, nai wah mer gar. Leskri soor hi baro. Hako tsiro krell lo, hoi mishto hi, un dell hakeneske peskro tchatchepen.

²⁴Doleske dikenn i menshe pre ap leste. Job dikell kekes an, kai rikrell pes jekeske, kai hi gosewo.