Read O Debleskro Drom - I Bibla an o Romano Rakepen 2021 Hiob 39 Bible Online

Hiob 39 - O Debleskro Drom - I Bibla an o Romano Rakepen 2021 bible

Hiob 39

¹Prindjreh tu o tsiro, kai i diwji busni peskro ternepen lell? Dikal tu, har i wesheskri grumni peskro ternepen las?

²Nai peneh tu, kitse tchonna jon hunte hidjrenn, un djineh o tsiro, kai le pengro ternepen ap i phub anenn?

³Jon beshenn tele, te perell o ternepen gar ap i phub, te well lo boldo.

⁴Lengre tchawe wenn bares win ap o them, un wenn soreles, un djan penge, un wenn gar buder pale pash lende.

⁵Koon mukas i diwji burika kote te nashell, kai li kamell, un pandas lat gar dren?

⁶Me dom lat i diwjo truk them, te hi li kote khere, un ko londo them, te djiwell li kote.

⁷Koi diwji burika rikrell pes dur krik koi bari goljatar, hoi krenn le an i forja, un hunte shunell gar ko murshes, kai dell gole: Sikeder! Sikeder!

⁸Koi diwji burika hatsell peskro chapen ap i berge, un rodell pal halauter, hoi senelo hi.

⁹Kamell o diwjo gurum tuke te budrell, kamell lo rati kote te atchell, kai tu tire viechenge chapen deh?

¹⁰Nai pandeh tu leske i shello trujel, te budrell lo tuke ap i hachetikri phub, un tserdell ko saster, hoi i phub pre phagell?

¹¹Fothe sorelo job hi, nai deh tu leske tiri budi an o wast, un nai djineh, te krell lo, hoi tu lestar kameh?

¹²Nai patseh leske, te anell lo tiro djob khere ap tiri djobeskri platsa?

¹³Bachteles dell koi bari kachni, hoi kharell straussa, peskre mussjentsa. Lakre mussja hi gar har kol mussja un phora, kolen o storcho hi.

¹⁴I straussa mukell peskre jare ap i phub tchiddo, an koi tchik mukell li len tates te well.

¹⁵Un joi bistrell, te nai stakrell i heri len khetne, un te nai stakrenn i diwje vieche len paash.

¹⁶Joi djal pengre tchawentsa jaake soreles trujel, har te wans jon gar latar. Te merenn le, un joi peskre jare tchitcheske tchiwas, krell kowa lake ninna tchi win.

¹⁷O Dewel das lat kek goswepen, un kras, te haiwell li tchi.

¹⁸Te hadell li pes un nashell, hi li sikeder har i grai un leskro klissepaskro, un nai sal pral lende.

¹⁹Dal tu o grajes peskri soor? Tchiwal tu lengste balla pral ap leskri meen?

²⁰Dal tu leske i soor, te stell lo har i stepaskro? Te phurdell lo soreles win dran peskro nak, darenn i menshe.

²¹O grai stakrell peskre herjentsa an i phub, un hi bachteles pral peskri soor, te nashell lo an o kurepen.

²²O grai prindjrell kek daar, un lell kek traash, un djal glan o charo gar pale.

²³Ap leskri rig hi i possita, an kolate stenn i faile, un i lengste tchurja dikenn win har jag, te perell o kham pre.

²⁴Te shunell o grai i phurdepaskri, witsrell lo pes bari sorjah glan, un mukell pes gar tele te rikrell.

²⁵Hako kopo, kai shunell lo i phurdepaskri, dell lo pre gole: Hui-i! Un sungell o kurepen fun dural — koi kurepaskri gole i lurdendar un lengre pralstunendar.

²⁶Sikral tu o baro tchirkles, har djal lo dur pre an o bolepen, un har te krell lo peskre mussja buchlo un djal kote, kai o kham pralstunes tardo hi?

²⁷Penal tu ap o adlari, te djal lo dur pre ap i berge, te krell lo kote peskro kheer?

²⁸Ap i bare barra hi lo khere, pral pre ap i berge un bare barra djiwell lo.

²⁹Fun kotar dikell lo tele, un rodell peskro chapen. Fun dural dikenn les peskre jaka.

³⁰Leskre tchawe trushenn pal rat, un kote, kai i mule tchiddo hi, kote hi job ninna.