Read O Debleskro Drom - I Bibla an o Romano Rakepen 2021 Hiob 4 Bible Online

Hiob 4 - O Debleskro Drom - I Bibla an o Romano Rakepen 2021 bible

Hiob 4

¹Un o Elifas dran o foro Teman penas ap leste:

²Te rakrau ap tute, muk kowa tuke gar chojedo te krell. Me nai rikrau gar mire laba pale.

³Tu sikral bud menshen o tchatcho drom, un kral khine wasta pale soreles.

⁴Tire laba hadan koles pale pre, kai peras. Tu kral kol herja pale soreles, hoi trissan.

⁵Kanna, kai was i bibacht pral tute, nashreh tiri soor. Kanna, kai tut kowa tapras, pereh tu khetne i trashatar.

⁶Tu rikreh tuke o Debles glan i jaka pash halauter, hoi kreh, un djah o tchatcho drom. Doleske nai leh newi soor, un patseh, te well lauter pale mishto tuke.

⁷Rake tiro djijeha, un pen mange, kai maras o Dewel jekes, ap koleste kek doosh his? Kai las lo o djipen jekestar krik, kai his an o tchatchepen tardo?

⁸Jaake har me les dikom, well tchilatchepen pral kolende, kai tchilatchepen kran, un bibacht pral kolende, kai bibacht ap wawarende anan.

⁹O Dewel phurdell ap lende, un jon merenn. Leskri choljakro ducho marell len.

¹⁰Jon nai denn bari gole har i lewe, o Dewel phagell lenge i danda win.

¹¹I lewe merenn, te hi len tchi marepaske un chapaske. Un lengre terne nashrenn pen kate te kote.

¹²Mange wan tchorchanes laba penlo. I tikni goljah rakras jek an miro kand.

¹³Rati, har sowom soreles dom djungeles suni.

¹⁴Traash un trisslepen was ap mande. Mire tsele kokale trissan.

¹⁵I ducho phurdas ap miro mui, un mire balla ap mande his pre tardo.

¹⁶Glan mire jaka dikom jekes tardo, un djinom gar koon kowa his. Shunom tchi. Palle rakras jek un penas:

¹⁷Har nai well i mensho an o tchatchepen tardo glan peskro Debleste? Har nai djiwell i mursh i djudjo djipen glan o Debleste, kai kras les?

¹⁸O Dewel nai patsell gar peskre budepangren an o bolepen. Un ap leskre bolepangre hatsell lo doosh.

¹⁹Har bud budeder hatsell lo doosh ap kolende, kai wan dran tchik kerdo — ap kolende, kai nai wenn khetne stakedo har i kirmo[3].

²⁰An i tsalla djal lenge mishto, un rati merenn le, un hi buder gar koi. Un kek dell jak pre.

²¹Un wawar lenn, hoi len his.[4] Jon merenn un haiwenn gar, hoi lenge djal[5].