Read O Debleskro Drom - I Bibla an o Romano Rakepen 2021 Hiob 40 Bible Online

Hiob 40 - O Debleskro Drom - I Bibla an o Romano Rakepen 2021 bible

Hiob 40

¹Un o baro Dewel putchas o Hiobes:

²Tu kameh tut mantsa te tchingrell — mantsa, kai o sorelo Dewel hom? Tu, kai doosh ap mande hatsal, un mange penal, hoi gar mishto krom, pen kanna tchomone kai pre!

³Un o Hiob penas ap o baro Debleste:

⁴Dik, me hom tchi moldo! Hoi penap me tuke? Me tchiwau miro wast ap miro mui.

⁵Jek kopo rakrom, un me kamau tchi buder te penell. Un dui kope rakrom, un me kamau les gar buder te krell.

⁶Un o baro Dewel rakras pale o Hiobeha dran i baro phurdepen win, un penas ap leste:

⁷Kanna ste pre har i mursh! Un me putchau tutar. Un tu peneh mange, hoi kamau te djinell.

⁸Kameh tu tchatchepah te penell, me djau gar pal o tchatchepen? Peneh, te anom me doosh ap mande, te nai wess tu koi tardo, har te wals tut tchatches?

⁹Hi tut sawi bari soor har man? Nai rakreh tu sawi sorjah har me?

¹⁰Sike, har baro un an-diklo hal! Muk tut an tiro shukapen un railepen te dikell!

¹¹Tchore tiri tseli choli win, dik ap lauterende, kai pre-phurdo hi, un witse len tele!

¹²Awa, dik ap kol pre-phurde, un kre len tiknes! Un stake i tchilatchen ap jek kopo khetne!

¹³Paske len halauteren an i phub, un pande len dren an o mulengro them!

¹⁴Te kral tu kowa lauter, palle sharau ninna me tut, un penau, te das tiro tchatcho wast tuke i soor, te hal tu o sorleder.

¹⁵Dik ap ko baro viecho, o Behemot, koles me krom, har me tut ninna krom! Job chal senlepen har i grumni.

¹⁶Dik, hawi bari soor les an peskre herja hi, un hawi soor an leskro per!

¹⁷Leskri pori hi jaake sorelo har i zedertikro ruk. Leskre muskle an leskre herja hi sorelo har pesse shelle.

¹⁸Leskre herja hi har dran saster, leskre kokale har dran lolo saster.

¹⁹Job his o glanstuno kol viechendar, hoi krom. Me, kowa kai les kras, das les ninna leskro charo.

²⁰Ap i berge well o senlepen baro, hoi leske chapaske hi, kote, kai i tsele diwje vieche penge khelenn.

²¹Tel subjengre burra tchiwell lo pes tele, un khatrell pes mank shilftikro khass an i sapeni tchik.

²²Kol pesse subjengre burra khatrenn les glan o kham. Un kol ruka[48], hoi pash o pani tardo hi, hi trul leste trujel.

²³Ninna te well ko lengsto pani sorleder un diwjeder, nashell lo gar darenes krik. Ninna te dell o pani Jordan leske an o mui, krell leske kowa tchi.

²⁴Kek nai taprell leske an i jaka, un tserdell leske i shello an o nak.

²⁵Tserdeh tu o Leviatanes i ranjah pash tute, un pandeh i shello trul leskro mui?

²⁶Tserdeh tu leske i shello an o nak, un tchiweh leske i gustri an o kokalo tel leskro mui?

²⁷Mangell job tutar, te kress tiro dji leske pre, un rakrell tuha latche labentsa?

²⁸Krell lo tuha win, te well lo tiro budepaskro hako tsireske?

²⁹Kheleh tu leha, har te wals lo i tikno tchirklo, un pandeh les ap i shello i tchenge an tiro kheer[49]?

³⁰Kamenn les i starepangre te bikrell? Tchinenn les i parepangre an kotja un bikrenn leskro mass?

³¹Nai deh tu an leskri hauta un an leskro shero tchurje tchurjentsa, har te taprals i baro matcho?

³²Tchip tiro wast ap leste! Tu kreh kowa gar i duito kopo. Kau kurepen bistreh tu gar.