Read O Debleskro Drom - I Bibla an o Romano Rakepen 2021 Hiob 41 Bible Online

Hiob 41 - O Debleskro Drom - I Bibla an o Romano Rakepen 2021 bible

Hiob 41

¹Hakeno, kai patsell, te nai well lo sorleder har o Leviatan, hunte dikell dren, te djal kowa gar. Hi gar jaake, te perell kowa i darjatar ap i phub, kai dikell les?

²Kek hi jaake dineles, te choirell lo les. Un koon hi kowa, kai nai atchell tardo glan mande?

³Koon nai djal i choljah ap mande, un me anau kowa gar ap leskro shero pale? Tel o tselo bolepen hi kek sawo![50]

⁴Me kamau ninna pral kowa te rakrell, hawe herja o Leviatanes hi, un har sorelo un shukar job kerdo hi.

⁵Kek nai riwell leske leskri baja win, hoi hi kerdo har dran saster! Un kek nai dell tchurje koi dren.

⁶Nai krell jek leskro baro mui pre? Na-a! Te dikell lo leskre danda, taprell les i bari daar.

⁷Leskro dumo tchakrenn shuppe, hoi hi sorelo har bar. Jek shuppa pal i wawar hi le pandlo ap leste.

⁸Un jek shuppa tchiwell pes jaake ap i wawar, te nai djal kek ducho mashkral lende dren.

⁹Jon hi jaake khetne kerdo, te taprell jek an o wawar, un kek nai tserdell jek dran o wawar win.

¹⁰Te phurdell lo dran o nak, well tikno pani win, hoi dikell win har brishin an o kham. Leskre jaka hi lolo har o kham, hoi pre djal.

¹¹Dran leskro mui well jag, awa, jagakre kotja denn win karje.

¹²Tampa well dran leskro nak har dran i piri, hoi hi pral i jag tardo, un an kolate tchomone kerell.

¹³Leskro ducho mukell kasht te chatchell, un jag djal dran leskro mui.

¹⁴Leskri meen hi sorelo. Kai lo ninna djal, taprell i menshen i daar.

¹⁵Leskro per hi masselo un sorelo har saster.

¹⁶Leskro dji hi har bar, awa, jaake sorelo har i baro bar[51].

¹⁷Te stell lo pre, taprenn ninna i sorleder bari daar, un i trashatar tserdenn le pen pale.

¹⁸Dell jek o chareha pal leste, krell kowa leske tchi. Kek lengsti tchuri, kek witsepaskro tchuri, kek failo nai dukrell les.

¹⁹Leske hi saster jaake, har te wals lo phuss, un lolo saster har phuro sapeno kasht.

²⁰Kek failo nai tradell les krik, un witsepaskre barra hi leske har phuss.

²¹Ninna i depaskro kasht hi leske gar budeder har i phusseskri halma. Un pral i lengsti tchuri, hoi ap leste witsedo was, sal lo.

²²Leskro per tchakrenn sawe shuppe, hoi tchinenn har i paash-dino tcharo. Te tserdell lo pes pral koi sapeni phub, dikell kowa win, har te djals i tchinepaskro wurdin koi pral.

²³Te djal lo an o baro pani, krell lo les diwjo, har pani, hoi kerell, un har djet, hoi an i piri pre kerell.

²⁴Pal leste mukell lo i parno drom. hoi dikell win, har te wans rupene balla.

²⁵Ap i phub hi kek wawar har job, jaake kerdo, te nai krell leske tchi daar.

²⁶Job dikell halauterenge an i jaka, un hi o rai pral i tsele diwje viechende.