Read O Debleskro Drom - I Bibla an o Romano Rakepen 2021 Hiob 6 Bible Online

Hiob 6 - O Debleskro Drom - I Bibla an o Romano Rakepen 2021 bible

Hiob 6

¹Un o Hiob penas koi pre:

²Kamoms, te nai lals jek miri duk un miri bibacht, un tchiwals len ap i waga!

³Kolla hi phareder har i tseli santa glan o baro pani. Doleske rakrau har i dinelo rakrell.

⁴Mange djal jaake, har te dals o sorelo Dewel karje ap mande, un leskre faile wans an mande, hoi anenn mange o merepen. Kowa, hoi mukell o Dewel ap mande te well, krell man i bari daar.

⁵Kek burika dell gole, te hi lat senlepen te chal. Kek grumni dell gole, te hi lat doha te chal.

⁶Koon kamell i chapen te chal, kai kek loon dren hi? Koon kamell o parnepen i jalo jarestar te chal?

⁷Sau chapen taprau gar an. Kowa hi mange jaake djungeles, te nai lau les gar tele[6].

⁸Ach, te shunell o Dewel, hoi lestar mangau, un krell kowa, hoi lestar kamau!

⁹Har kamoms, te wals leske shukar, te dell lo man mulo, te lell lo miro djipen mandar.

¹⁰Kowa krals koi duk an miro dji tikneder. An mire tsele bare duka djinau, te krom hako tsiro, hoi o Dewel mange penas.

¹¹Man hi buder kek soor, te nai rikrap dureder win. Hoi atchell miro djipastar, te dikap ap ko tsiro, hoi wella?

¹²Miri soor hi gar dran bar. Un miro mass hi gar dran saster.

¹³Tchatchepah, djinau buder gar dureder. Kek hi koi, kai dell man newi soor.

¹⁴Kones kek dji hi peskro maleske, koles hi gar o sorelo Dewel glan i jaka pash kowa, hoi lo krell.

¹⁵Mire mala sikran pen, te hi le chochene. Har panja hi le, kai truk wenn.

¹⁶An o wend hi kol panja shila un tamlo un gib tchakrell len.

¹⁷Te well o nijal, djal bud un budeder pani krik. Te well tato, hi buder kek pani koi.

¹⁸I khamele un lengre klissepangre djan pengro dromestar tele, te rodenn le kote pani. Jon nashenn an o mulo them trujel un merenn.

¹⁹Mursha pengre khamelentsa wenn dran Tema un Saba un rodenn kal panja.

²⁰Un har wenn le kote, his lauter tchitcheske: Kek pani hi koi.

²¹Jaake har kal panja, hoi buder gar koi hi, jaake wan tumer kanna mange. Tumer dikenn, har djungeles mange djal, un tumen taprell i bari daar.

²²Penom me ap tumende: Denn man lowe? Plaissrenn tumer mange jekes tumaro brawlepastar?

²³Lenn tumer man win dran i wasta kolestar, kai kamell man te marell? Lenn tumer man win dran i wasta kolestar, kai rikrell man tele? Tchatchepah, sawo koowa penom gar.

²⁴Sikrenn mange, kai djom o tchatcho dromestar tele, un me rikrau miro mui. Sikrenn kowa mange jaake, te haiwap les!

²⁵Tchatche laba rakrenn an o dji. Tumare laba hi tchi moldo. Tumer penenn mange gar, hawo tchilatchepen me krom.

²⁶Hi mare laba tchilatcho an tumare kanda? Me hom i mursh, kai djinell buder gar, hoi te krell lo, un koleskro rakepen hi tchitcheske.

²⁷Tumer han sawe, kai khelans trul i tchaweste, koles kek dad buder hi, un bikrans tumaro males lowenge.

²⁸Dikenn mange an i jaka! Chochroms me tumenge an o mui dren?

²⁹Mukenn tele, tchilatchepen ap mande pre te anell! Awa, mukenn tele koleha! O tchatchepen hi ap miri rig!

³⁰Rakrell miro mui chochene laba? Na-a! Me djinau, hoi latcho un hoi tchilatcho hi!